"تەڭىزشەۆرويل" كومپانياسىنىڭ ءباسپاسوز قىزمەتى، ولاردىڭ ۆاحتا اۋىسىمى ءبىتىپ، كەتىپ بارا جاتقان قىزمەتكەرلەر ەكەنىن، كوروناۆيرۋس جۇقتىرماعانىن ايتادى.
"تەڭىزشەۆرويلدىڭ" ۆاحتالىق جاتاقحاناسىنداعى جۇمىسشىلار نارازىلىعى 19 ساۋىردە ءتۇن ورتاسىندا Facebook الەۋمەتتىك جەلىسى ارقىلى تارادى. ۆيدەو ءتۇسىرىپ، ءارى كوممەنتاري جاساپ تۇرعان ادام "بۇل - تەنىزدىڭ "بولاشاق" جاتاقحاناسىنداعى ايقاي-شۋ. ەمدەلىپ، كارانتيندە جاتىپ شىققان ادامدار كورىنەدى" دەيدى.
ۆيدەودا نارازى جۇمىسشىلاردىڭ "قابىلداۋ بولمەسى" دەپ جازىلعان عيماراتتىڭ الدىندا نارازىلىق ءبىلدىرىپ تۇرعانى بايقالادى.
"تەڭىزشەۆرويل" كومپانياسىنىڭ ءباسپاسوز حاتشىسى ەرلان يسلياموۆتىڭ ازاتتىققا ايتۋىنشا، "بولاشاق" لاگەرىندە ۆاحتالىق اۋىسىممەن جۇمىس ىستەپ جاتقان ادامدار جاعدايدى دۇرىس تۇسىنبەگەن. جۇمىسشىلار "ەكسپرەسس تەستىلەۋدەن ءوتىپ، "بولاشاقتاعى" بلوك ىشىندە ۇيلەرىنە كەتەتىن كولىك كۇتىپ وتىرعان ءارتۇرلى مەردىگەر مەكەمەلەردىڭ قىزمەكتەرلەرىن "كوروناۆيرۋس جۇقتىرعاندار" دەپ ويلاعان".
- الاڭدايتىن ەشتەڭە جوق. ولار كوروناۆيرۋس جۇقتىرعاندارمەن قارىم-قاتىناستا بولماعان ادامدار جانە ەندىگى ۇيلەرىنە كەتىپ تە قالدى. ناقتى سانىن ايتا المايمىن. ءمان-جايدى تۇسىندىرگەن سوڭ جۇمىسشىلار تاراپ كەتتى، - دەدى ول.
بۇعان دەيىن "تەڭىزشەۆرويلدىڭ" "ۆاتەرناس" ۆاحتالىق پوسەلكەسىندە ءبىر ادامنىڭ ۆيرۋس جۇقتىرعانى بەلگىلى بولعان ەدى. بۇل تۋرالى اتىراۋ وبلىستىق اكىمدىگىنىڭ ىشكى ساياسات باسقارماسىنىڭ باستىعى جاسۇلان بيسەمبيەۆ ءوز پاراقشاسىندا تشو-نىڭ رەسمي جاۋابىن جاريالادى. وندا 17 ساۋىردە تەڭىزدە ۆاحتالىق اۋىسىممەن جۇمىس ىستەپ جاتقان قىزمەتكەرلەردىڭ ءبىرىنىڭ سۋىق تيگەنگە ۇقسايتىن بەلگىلەرمەن ۆاحتالىق پوسەلكەدەگى مەديتسينا بولىمشەسىنە شاعىمدانعانى ايتىلعان. 19 ساۋىردە الىنعان تەست قورىتىندىسى ونىڭ COVID-19 ۆيرۋسىن جۇقتىرعانىن راستاعان.
"ول جۇمىسشى قازىر اتىراۋ قالاسىنداعى ينفەكتسيالىق اۋرۋحانادا ەمدەلىپ جاتىر. ول جۇرگەن عيمارات تولىق دەزينفەكتسيالاندى. تشو-داعى وندىرىستىك جۇمىستار ىستەپ تۇر» دەيدى ءباسپاسوز حابارلاماسىندا.
"تەڭىزشەۆرويل" كومپانياسى اتىراۋ وبلىسىنداعى قازاقستاننىڭ ءىرى كەن ورىندارىنىڭ ءبىرى - تەڭىز كەنىشىن 1993 جىلدان بەرى يگەرىپ كەلەدى.
Abai.kz
