بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن پالاتانىڭ جالپى وتىرىسى ءوتتى. وندا دەپۋتاتتار سىبايلاس جەمقورلىققا قارسى ءىس-قيمىل ماسەلەلەرى تۋرالى زاڭ جوباسىن ءبىرىنشى وقىلىمدا ماقۇلدادى.

ءماجىلىس توراعاسى اتاپ وتكەندەي، زاڭ جوباسىنا ەنگىزىلگەن جاڭا تۇزەتۋلەر ارقىلى اعىمداعى جىلى پارلامەنت سەسسياسىنىڭ اشىلۋىندا مەملەكەت باسشىسى قاسىم-جومارت توقاەۆتىڭ تاپسىرماسى جۇزەگە اسىرىلدى.

- وسى ماقۇلدانعان زاڭ جوباسى ەلىمىزدىڭ اشىق جانە تۇراقتى دامۋى جولىنداعى تاعى ءبىر ماڭىزدى قادام دەۋگە بولادى. سەبەبى، ءاربىر دەموكراتيالىق دامىعان ەلدە سىبايلاس-جەمقورلىققا جول جوق. سوندىقتان، تىكەلەي مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن ازىرلەنگەن وسى زاڭ جوباسى جەمقورلىقپەن كۇرەستى ودان ءارى كۇشەيتۋگە باعىتتالىپ وتىر. وسى جولدا زاڭ جوباسىنا جەمقورلىقپەن كۇرەستى جۇيەلى تۇردە جۇرگىزۋگە ارنالعان كوپتەگەن وزگەرىستەر ەنگىزىلدى. ونىڭ باستى ماقساتى - كەز-كەلگەن زاڭ بۇزۋدىڭ الدىن-الۋ جانە بولدىرماۋ، – دەدى نۇرلان نىعماتۋلين.

ءماجىلىس دەپۋتاتتارى مەملەكەت باسشىسىنىڭ تاپسىرماسىنا سايكەس، قىلمىستىڭ كەز-كەلگەن ءتۇرىن ارانداتقانى ءۇشىن قىلمىستىق جاۋاپكەرشىلىكتى سىبايلاس جەمقورلىققا قارسى ورگانداردىڭ قىزمەتكەرلەرىنە عانا ەمەس، جالپى كەز كەلگەن قۇقىق قورعاۋ ورگاندارىنىڭ قىزمەتكەرلەرىنە بەلگىلەۋدى ۇسىندى.

باس پروكۋراتۋرانىڭ، سىبايلاس جەمقورلىققا قارسى ءىس-قيمىل اگەنتتىگىنىڭ، ىشكى ىستەر جانە قارجى مينيسترلىكتەرىنىڭ وكىلدەرى دەپۋتاتتاردىڭ بۇل ۇسىنىسىمەن كەلىسىپ، قۇجات جوباسى ەكىنشى وقىلىمعا دەيىن پىسىقتالاتىن بولادى.

سونىمەن قاتار، بۇگىنگى جالپى وتىرىستا ءماجىلىس دەپۋتاتتارى كوتەرگەن تاعى ءبىر ماسەلە ءوز شەشىمىن تاپتى. ول جونىندە ءماجىلىس توراعاسى نۇرلان نىعماتۋلين:

-ەندى تەك ءبىرىنشى باسشىلار عانا ەمەس، كۆازيمەملەكەتتىك سەكتوردا قىزمەت ەتەتىن لاۋازىمدى تۇلعالار دا جەمقورلىق ءۇشىن جاۋاپقا تارتىلاتىن بولادى. بۇل نورما بويىنشا دا مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسى جۇزەگە اسىرىلادى. بۇل ءادىل جانە دۇرىس قادام دەپ ەسەپتەيمىن. ونى قولداۋىمىز كەرەك، - دەدى.

تالقىلاۋدى قورىتىندىلاعان ءماجىلىس توراعاسى وسى زاڭ جوباسىنىڭ ناتيجەسىندە سىبايلاس جەمقورلىققا قارسى كۇرەستىڭ تيىمدىلىگى ارتاتىنان اتاپ ءوتتى.

سونداي-اق، زاڭ جوباسىمەن قۇقىق قولدانۋ پراكتيكاسىندا تۋىنداعان قۇقىقتىق ولقىلىقتار مەن كولليزيالاردى جويۋعا، سونداي-اق سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگاننىڭ مارتەبەسى مەن ۇيىمدىق قىزمەتىنە قاتىستى ماسەلەلەردى رەتتەۋگە باعىتتالعان نورمالار بەكىتىلەدى.

Abai.kz