پرەزيدەنت قاسىم-جومارت توقاەۆ «مير» ارناسىنا بەرگەن سۇحباتىندا ەكىنشى دۇنيەجۇزىلىك سوعىسقا قاتىسقان اكەسى تۋرالى دا ەستەلىك ايتتى، دەپ حابارلايدى قازاقپارات ءتىلشىسى.

«اكەمنىڭ بالا كەزىنەن تاعدىرى قيىن بولدى. ەرتە جەتىم قالدى. بالالار ۇيىندە، سودان كەيىن ينتەرناتتا تاربيەلەندى. كوپ ۋاقىت وتپەي سوعىس باستالدى. سوعىس ول ءۇشىن تاعى دا باتىلدىق پەن توزىمدىلىكتىڭ سىناعى بولدى. ول سوعىستا كوپ قيىندىقتى باسىنان وتكەردى، ونىڭ ۇرەيلى سىناعىنان ءوتتى. قورقىنىش پەن قايعى-قاسىرەتتى جەڭە ءبىلدى. ايتسە دە اكەم باسقا مايدانگەرلەر سياقتى سوعىس تۋرالى، اسىرەسە ءوزىنىڭ ەرلىگى مەن ماراپاتتارى تۋرالى ايتۋدى ۇناتپايتىن. ءوزىنىڭ سەزىمى، جاۋمەن العاش بەتپە-بەت كەلۋى، جاۋىنگەرلەردىڭ ەرلىگى، باتىرلىعى جانە جەڭىسپەن ۇيگە ورالۋى جايلى ءوزىنىڭ «سولدات سوعىسقا كەتتى» اتتى ومىرباياندىق كىتابىندا ايتىپ بەردى»، – دەپ ەسكە الدى اكەسىن قاسىم-جومارت توقاەۆ.

مەملەكەت باسشىسى اكەسىنىڭ بالا كەزىنەن بىلىمگە قۇشتار ادام بولعانىنا توقتالدى.

«اسىرەسە، قازاق ءتىلى مەن ادەبيەتىنە ەرەكشە قۇمار ەدى. سوعىستان كەيىن ول اسكەري فورما كيگەن كۇيى بالداقپەن كەلىپ، الماتىداعى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنىڭ ءبىرىنشى كۋرسىنا تۇسەدى. سودان كەيىن جۋرناليست بولىپ قىزمەتكە ورنالاسادى. جازۋشىلىققا ءبىرجولا دەن قويدى، جىلدار وتكەننەن كەيىن لايىقتى ماراپات پەن اتاققا يە بولدى.

ول – قازاق ادەبيەتىندە دەتەكتيۆ جانرىنىڭ نەگىزىن قالاعان قالامگەر. مەن جاقىندا اكەمنىڭ 1945 جىلدىڭ اقپان-ماۋسىم ايلارىندا اۋىر جاراقات العاننان كەيىن ەمدەلگەن ومبىداعى سوعىس ارداگەرلەرى اۋرۋحاناسىنىڭ قاسبەتىنە اكەمە ارنالعان ەسكەرتكىش تاقتا ورناتىلعانى تۋرالى ءبىلدىم. مەن اكەمدى جانە جالپى سوعىس ارداگەرلەرىن ەسكە الىپ، ۇمىتپاي جۇرگەن ومبى وبلىسى مەن قالا باسشىلىعىنا ريزامىن»، – دەدى مەملەكەت باسشىسى.

 Abai.kz