پرەزيدەنت بۇۇ باس حاتشىسىمەن تەلەفون ارقىلى سويلەستى
مەملەكەت باسشىسى قاسىم-جومارت توقاەۆ بۇۇ باس حاتشىسى انتونيۋ گۋتەرريشپەن تەلەفون ارقىلى سويلەستى،- دەپ حابارلايدى اقوردا.
اڭگىمەلەسۋ بارىسىندا COVID-19 پاندەمياسىن جانە ونىڭ سالدارىن جويۋ اياسىندا بۇۇ مەن قازاقستاننىڭ قابىلداعان ناقتى ءىس-شارالارى تالقىلاندى.
قازاقستان پرەزيدەنتى پاندەميانىڭ ۇلتتىق ەكونوميكا مەن دەنساۋلىق ساقتاۋ جۇيەسىنە تيگىزگەن كەرى اسەرىن جەڭىلدەتۋگە قاتىستى بۇۇ باس حاتشىسىنىڭ بەلسەندى ارەكەتتەرىنە جوعارى باعا بەردى. قاسىم-جومارت توقاەۆ قازىرگى جاعدايدىڭ جاھاندىق داعدارىسقا قارسى كۇرەستە الدىڭعى شەپتە جۇرگەن بۇۇ مەن ونىڭ اگەنتتىكتەرىنىڭ ماڭىزدى ءرول اتقاراتىنىن ايقىنداپ بەرگەنىن اتاپ ءوتتى. قازاقستان حالىقارالىق قاۋىپسىزدىكتى نىعايتۋعا جانە ەكونوميكانى قايتا قالپىنا كەلتىرۋگە باعىتتالعان بۇۇ باستامالارىن تولىقتاي قولدايدى.
انتونيۋ گۋتەرريش قاسىم-جومارت توقاەۆقا بۇۇ-نىڭ باستامالارىن قولداعانى جانە وڭىرلىك دەڭگەيدەگى كوروناۆيرۋسقا قارسى كۇرەسكە قوسقان ەلەۋلى ۇلەسى ءۇشىن ريزاشىلىعىن ءبىلدىردى. باس حاتشى ازاماتتاردىڭ دەنساۋلىعىن ساقتاۋ، حالىقتىڭ جاعدايى تومەن توپتارىنا قارجىلاي كومەك كورسەتۋ، بيزنەستى قولداۋ جانە داعدارىستان كەيىنگى كەزەڭدەگى جاڭا ەكونوميكالىق باعىتتى ايقىنداۋ ماقساتىندا قازاقستاننىڭ قابىلداعان شارالارىن قۇپتادى. سونىمەن قاتار انتونيۋ گۋتەرريش قازاقستاننىڭ تەڭىزگە شىعاتىن جولى جوق دامۋشى ەلدەر توبىنا توراعالىق ەتۋىنە (2020-2021 ج.ج) وڭ باعا بەرىپ، قاسىم-جومارت توقاەۆتى "COVID-19 تۇسىندا جانە ودان كەيىنگى كەزەڭدە دامۋدى قارجىلاندىرۋدىڭ جوعارى دەڭگەيدەگى سەگمەنتى" اتتى فورۋمعا قاتىسۋعا شاقىردى.
اتالعان شارا 28 مامىر كۇنى بەينە كونفەرەنتسيا فورماتىندا وتەدى. وعان بىرقاتار ەلدىڭ باسشىلارى مەن كوپتەگەن ينستيتۋتتاردىڭ جەتەكشىلەرى قاتىسادى. كوروناۆيرۋس ەپيدەمياسى جالعاسقان جاعدايدا ارتتا قالعان جانە دامۋشى مەملەكەتتەرگە قولداۋ كورسەتۋ ماسەلەسىن تالقىلاۋ جيىننىڭ باستى تاقىرىبى بولماق.
مەملەكەت باسشىسى الداعى ونلاين فورۋمعا قاتىسۋعا كەلىسىم بەردى. سونداي-اق الەمدىك قوعامداستىقتىڭ تىلەكتەستىك رۋحى مەن بىرلەسكەن ءىس-قيمىلدارى ادامزاتتىڭ پاندەميانىڭ كەشەندى قاۋپىن ەڭسەرىپ، بۇۇ-نىڭ 2030 جىلعا دەيىنگى ورنىقتى دامۋ ماقساتتارىن جۇزەگە اسىرۋعا مۇمكىندىك بەرەتىنىنە سەنىم ءبىلدىردى.
تەلەفون ارقىلى سويلەسۋگە بۇۇ باس حاتشىسى باستاماشى بولدى.
***
تەڭىزگە شىعاتىن جولى جوق دامۋشى ەلدەر توبىنا 32 مەملەكەت (افريكانىڭ 16, ازيانىڭ 10, ونىڭ ىشىندە ورتالىق ازيانىڭ 5 مەملەكەتى مەن اۋعانستان، ەۋروپانىڭ 4, وڭتۇستىك امەريكانىڭ 2 ەلى) كىرەدى. قازاقستان ءوزىنىڭ توراعالىعى اياسىندا "تەڭىزگە شىعاتىن جولى جوق دامۋشى ەلدەردىڭ 2014-2024 جىلدارعا ارنالعان ءىس-قيمىلدارىنىڭ ۆەنا باعدارلاماسىن" جۇزەگە اسىرۋدى ماقسات ەتەدى.
