الگىندە سەنات «ساياسي پارتيالار» جانە «سايلاۋ» تۋرالى زاڭ جوبالارىن ماقۇلداعانىن بىلەسىزدەر. ۇلتتىق كەڭەستە تالقى بولىپ، ارتىنان پرەزيدەنت پارمەن بەرىپ، ازدى-كەم وزگەرتۋ جاسالعان زاڭ جوباسى تۋرالى باياندامانى ادىلەت ءمينيسترىنىڭ مىندەتىن اتقارۋشى ناتاليا پان دەيتىن ادام جاساعان ەدى. قازاق تىلىندە. مەملەكەتتىك تىلدە.

سەناتتاعى سول جيىندا مينيستر مىندەتىن اتقارۋشى ناتاليا پان قازاقشا سويلەدى. دەپۋتاتتاردىڭ قازاق تىلىندەگى ساۋالدارىنا قازاق تىلىندە جاۋاپ بەردى. راس، ناتاليا پاننىڭ مەملەكەتتىك تىلدە جاساعان 6 مينيۋتتىق بايانداماسىن «5-كە» باعالاۋعا جانە كەلمەس. دەسە دە، ونىڭ قازاقستاننىڭ مەملەكەتتىك تىلىنە دەگەن قۇرمەتى كوپتىڭ كوڭىلىنەن شىقتى. سەنات توراعاسى ماۋلەن اشىمباەۆ تا، الەۋمەتتىك جەلى قولدانۋشىلارى دا، اقپارات قۇرالدارى دا، ساياساتشىلار دا، ءبارى-ءبارى پان حانىمعا «پاح» دەستى.

قازاقستاندا مەملەكەتتىك ءتىل – قازاق ءتىلى. بۇل كونستيتۋتسيادا جازىلعان. دەمەك، قازاقستاننىڭ نەگىزگى زاڭ شىعارۋشى ورگانى – پارلامەنتكە كەلگەن ءاربىر مينيستر مەملەكەتتىك تىلدە سويلەۋى مىندەت! بۇل جاڭالىق ەمەس، زاڭدىلىق!

سولاي دەسەك تە، 28-29 جىلدا ەكى-اق زاڭدى قازاق تىلىندە قابىلداعان قازاقستان پارلامەنتى مەن بوتەن ەلدىڭ مەملەكەتتىك تىلىنە «بۋازكوڭىل» قازاق بيلىگىندەگى ىڭعاي «جولتانداردىڭ», «انا ءتىلىمدى ۇمىتىپ قالدىم، ۋاقىت بەرسەڭىزدەر قازاقشا سويلەپ كەلەمىن» دەپ مۇلايىمسىگەن مينيسترلەردىڭ مەملەكەتتىك تىلگە كورسەتكەن وگەيلىگىنىڭ قاسىندا ناتاليا پاننىڭ بۇل جولعى جاساعانى «ءاپ، بارەكەلدى» دەگىزەر جاڭىمدى جاڭالىق بولدى، راس.

دەسە دە، سول جيىندا سولتۇستىكتەگى سويى بولەك جۇرتتىڭ، بوتەن ەلدىڭ مەملەكەتتىڭ تىلىنە مۇقتاجدىعىن اڭعارتىپ، ءوز ساۋالىنا «ورىسشا» جاۋاپ بەرۋىن تالاپ قىلعان دەپۋتات تا بولىپتى. ول – ەدىل مامىتبەكوۆ دەيتىن ادام ەكەن. مىنە، «azattyq-ruhy.kz», «rast.kz» سايتتارى سەناتور مامىتبەكوۆتىڭ قازاقشا سويلەگەن مينيستردەن ورىسشا جاۋاپ بەرۋىن سۇراعانىن جارىسا جازىپ جاتىر.

ەندى بۇعان نە دەيسىز؟ وسىدان كەيىن سۇراق تۋادى. قازاق تىلىنە قىرىن قارايتىن كىم؟ قازاقشا سويلەمەيتىن كىم؟ ناتاليا پان كىم؟ ەدىل مامىتبەكوۆ كىم؟

ناتاليا پان. قاراعاندىنىڭ ابايىندا تۋعان ادام. اقش-تا وقىپ كەلگەن ەكونوميست. قارجى مينيسترلىگىندە، پرەزيدەنت اكىمشىلىگىندە قىزمەت ىستەگەن. قازىر قر ادىلەت ۆيتسە-ءمينيسترى ەكەن.

ال ەدىل مامىتبەكوۆ شە؟

1964 جىلى تۋعان. بيىل قازاندا 56 جاسقا تولادى.

لەنينگرادتاعى جدانوۆ اتىنداعى ۋنيۆەرسيتەتتە وقىعان. ماماندىعى – ماتەماتيك. ءوزى عىلىم كانديداتى، دوتسەنت ەكەن.

«Wikipedia-داعى» دەرەكتە – ول تۋرالى: «كازاحستانسكي گوسدارستۆەننىي دەياتەل»، دەپ جازىلعان ەكەن. قازاقشاعا قوتارساق – مەملەكەت قايراتكەرى.

1991-96 جىلدارى ءال-فارابي اتىنداعى قازمۋ-دا ساباق بەرگەن، اكىمشىلىك جۇمىستار اتقارعان. 1996-98 جىلدارى ۇكىمەت اپپاراتىندا، پرەمەر-مينيستر كەڭسەسىندە قىزمەت ىستەگەن. 1996-2008 جىلدارى پرەزيدەنت اكىمشىلىگىندە قىزمەتتە بولعان.

2008-2009 جىلى قر يندۋستريا جانە ساۋدى ۆيتسە-ءمينيسترى، 2009-2014 جىلدارى ەاەو مەن كەدەندىك وداقتا جاۋاپتى حاتشىنىڭ ورىنباسارى قىزمەتىن اتقارعان. 2014-2015 جىلدارى استانا اكىمى اپپاراتىن باسقارعان. 2015-2017 جىلدارى «نۇر وتاننىڭ» استاناداعى فيليالىندا توراعا ورىنباسارى بولعان. 2017 جىلى پارلامەنت سەناتىنىڭ دەپۋتاتى. 2019 جىلدان باستاپ نۇر-سۇلتان قالاسىنىڭ وكىلى.

اقپاراتتا ءجيى ايتىلا بەرمەگەسىن بە، ايتەۋىر بۇل دەپۋتاتتىڭ ەسىم-سويىن بۇرىن-سوڭدى ەستىمەگەن ەكەنبىز. ءسويتىپ، سەناتتىڭ رەسمي سايتىنداعى ەدىل مامىتبەكوۆ تۋرالى دەرەكتەرگە كوز جۇگىرتتىك.

اۋەلى، قىسقارتىلعان سوزدەر مەن سانداردى قوسا ەسەپتەگەندە 51 سيمۆولدان (سوزدەن) تۇراتىن ءومىربايانىن وقىپ شىقتىق.

«زاڭ شىعارۋ قىزمەتى» دەيتىن ايداردى اقتارىپ كورىپ ەك، 2019 جىلدىڭ قىركۇيەك، قاراشا جانە جەلتوقسان ايلارىنا تيەسىلى «باقانداي» ءۇش زاڭ جوباسى جازىلىپتى.

«حالىقارالىق قىزمەتى» دەگەن ايداردا دا ءىلىپ-الار اقپارات جوق. بار بولعانى 4 حالىقارالىق جيىنعا قاتىسىپتى. ونىڭ ءوزى 2019 جىلدىڭ ەنشىسىندە ەكەن.

«سوزدەرى، ماقالالارى مەن جاريالانىمدارى» دەگەن داۋدەي ايدار ءتىپتى قاڭىراپ تۇر ەكەن. «استانا» ارناسىنا بەرگەن جالعىز-جارىم سۇحباتىنىڭ سىلتەمەسى ءىلىنىپتى.

«ايماقتارعا ساپارلار» ايدارىنان 9 ماتەريال تاپتىق. ونىڭ ۇشەۋى 2020 جىلعا تيەسىلى ەكەن. 08.01.2020 جانە 09.01.2020 جىل دەگەن داتامەن كورسەتىلگەن «نۇر-سۇلتان ق. حالقىمەن كەزدەسۋ» اتتى ءۇش ماتەريالدى اشىپ كوردىك.

«فوتوگالەرەيا» ايدارىن اقتارىپ شىقتىق. 170-تەن كوپ سۋرەت (بالكىم فوتو-ەسەپ) بار ەكەن.

سەناتور مامىتبەكوۆتىڭ دەپۋتاتتىڭ قىزمەتى تۋرالى باسقا اقپارات جوقتىڭ-قاسى. رەسمي سايتتى ارى اقتارىپ، بەرى اقتارىپ وتىرىپ تاپقانىمىز وسى.

ماقۇل، مامىتبەكوۆ مىرزا دەپۋتات بولعان 2017 جىلدان بەرى تۇك بىتىرمەي وتىردى دەسەك، «جاپتىم جالا، جاقتىم كۇيە» بولار... ءۇش جىلدا ءۇش زاڭ جوباسىن ازىرلەپ، سوسىن 4 رەت شەتەلگە شىعىپ، 9 رەت ايماقتاردى الاراپ، ءبىر سۇحبات بەرىپ، «قۇدا دا تىنىش، قۇداعي دا تىنىش» دەپ وتىر ەكەن دەگەنگە سەنۋدىڭ ءوزى قيىن عوي. الايدا، دەپۋتاتتىڭ دەپۋتاتتىق قىزمەتى تۋرالى ەگجەي-تەگجەيلى اقپاراتتى باسقا-باسقا ەمەس، سەناتتىڭ رەسمي سايتىنىن ىزدەيتىنىمىز وتىرىك ەمەس. ال ونداعى تاپقانىمىزدى جوعارىدا جازدىق.

حوش! دەپۋتات ەدىل مامىتبەكوۆ تۋرالى ازدى-كەم اقپارات بەردىك.  ۇش جىل دەپۋتات بولعاندا قانداي جۇمىستار اتقارعانى اۋەلى قۇدايعا، سوسىن مامىتبەكوۆ مىرزانىڭ وزىنە ايان شىعار. ءبىزدىڭ ايتپاعىمىز، قازاقستاننىڭ نەگىزگى زاڭ شىعارۋشى ورگانى – پارلامەنتتىڭ جوعارعى پالاتاسىنا كەپ، مەملەكەتتىك تىلدە سويلەپ تۇرعان مينيستردەن بوتەن مەملەكەتتىڭ تىلىندە جاۋاپ سۇراعان دەپۋتات «سەناتورلىققا» لايىق پا؟ وزدەرىڭىز باعامداي بەرىڭىزدەر...

Abai.kz