قۇدايعا شۇكىر، قازاقستاندا، استانادا ءيتتىڭ ەمەس، مىسىقتىڭ ەمەس، ادامنىڭ جۇرەگىنە ترانسپلانتاتسيا جاسالدى! اۋىزعا جۇدىرىقپەن قويىپ قالعانداي،  بۇقانى اتىپ جىعىپ، سويىپ سالعانداي ەتىپ ايتساق، ادامنىڭ جىرتىق-تىرتىق جۇرەگىنىڭ ورنىنا،  جاڭادان ولگەن ادامنىڭ ساۋ جۇرەگى اۋىستىرىلىپ سالىندى!

قۇدايعا شۇكىر، قازاقستاندا، استانادا ءيتتىڭ ەمەس، مىسىقتىڭ ەمەس، ادامنىڭ جۇرەگىنە ترانسپلانتاتسيا جاسالدى! اۋىزعا جۇدىرىقپەن قويىپ قالعانداي،  بۇقانى اتىپ جىعىپ، سويىپ سالعانداي ەتىپ ايتساق، ادامنىڭ جىرتىق-تىرتىق جۇرەگىنىڭ ورنىنا،  جاڭادان ولگەن ادامنىڭ ساۋ جۇرەگى اۋىستىرىلىپ سالىندى!

ماسەلەن، مىجبان دەگەن ميللياردەر سىنىپتاسىم وسى جۋىردا عانا گەرمانياعا بارىپ، جۇرەگىنە اشەيىن ەرىككەننەن وپەراتسيا جاساتىپ كەلدى.  وعان نەگردىڭ جۇرەگى سالىندى. ءسان ءۇشىن... بىراق يەگوۆاشىل نەگر ەكەن، مىجبانىمىز وتانىنا ورالا سالىسىمەن يەگوۆا سەكتاسىنا جىلىپ-ەڭىرەپ كىرىپ كەتتى. ونىڭ بۇيرەگى دە امەريكادا اۋىستىرىلعان. يزرايل ازاماتىنىڭ بۇيرەگى. سوندىقتان دەيمىن-اۋ، پالەستيناعا قاراي زىمىراندارىمەن اتقىلاي باستاعان سوعىسقۇمار ەۆرەيلەردى  ءجۇدا جاقسى كورەدى. باۋىرى دا وزىنىكى ەمەس. ليۆيالىق جەسىر ايەلدىڭ باۋىرى كورىنەدى... سول ەلدىڭ ەكس- پرەزيدەنتى كاددافي كوتەرىلىسشىلەر قولىنان قازا تاپقاندا، وكىرىپ جىلاعانى بار. اقشاسى كوپ بولعان سوڭ، مىجەكەڭ نە ىستەمەدى دەسەڭىزشى! ءيتتىڭ وكپەسىن سالدىرىپ الىپ، تالاي وتانداستارىنا يتتىك جاساپ جۇرگەنى بار. «ورىستار رەسەيگە جاپپاي كوشىپ جاتىر! ءبىز ولارعا قىسىم جاساپ جاتىرمىز!» دەپ ءبوستى تەلەديداردان! بىلتىر جول اپاتىنا ۇشىراپ، مۇرنى تۇبىنەن كەسىلىپ قالعان ەدى. قىتايعا بارىپ، اسىلىپ ولگەن قىتاي جىگىتىنىڭ مۇرنىن مۇرىن ورنىنا جالعاتتىرىپ الدى. سودان بەرى: «قىتايدان قورقاتىن ەشتەڭە جوق... مەكتەپتەردە قىتاي ءتىلىن وقىتا باستايىق!» دەپ ايقايلاپ قويادى دا، قىتاي جاققا قاراي تۇشكىرەدى كەلىپ... ايتپاقشى، بىلتىر قىستا جيرينوۆسكيدىڭ تۋعان كۇنىندە كوپ ءىشىپ قويىپ، دالادا ۇيىقتاپ قالعان ەكەن. قىزىعى سول، اۋزىن اشىپ، ءتىلىن سىرتقا شىعارىپ ۇيىقتاعاندىقتان، ءتىلى ءۇسىپ كەتىپ، تۇككە جاراماي قالعان. ماسكەۋگە بارىپ، ءپۋتيننىڭ كوڭىلدەسىن اراعا سالىپ ءجۇرىپ، «سۆەجي» ولگەن ورىس ايەلدىڭ ءتىلىن  تىلىنە جالعاتتىرىپ العان ەدى. ويپىرماي، سودان بەرى ورىسشىل بولىپ، رەسەي پرەزيدەنتى مەدۆەدوۆتىڭ پورترەتىن قوينىنا الىپ جاتاتىندى شىعارىپتى.  «كەدەندىك وداعى نەسى، دىنارالىق وداق تا جاساسايىق، ورىستىڭ پوپتارى مەن قازاق مولدالارى بىرىگىپ، تويلاردا ءجۇرسىن!» دەپ ساندىراقتاپ بارىپ، تالىپ قالعانى بار...

ءبىردى ايتىپ، بىرگە كەتەمىن-اۋ، مەن مىجبان سياقتى ميللياردەر ەمەسپىن. مۇشەلەرىمدى  ءسان ءۇشىن اۋىستىرىپ سالا بەرتىن... قازاقستاندا جۇرەك اۋرۋى-يشەميامەن اۋىراتىندار ءبىرىنشى ورىندا تۇر. قارا حالىقتىڭ قالتاسى شۇرق تەسىك... شۇرىق تەسىك وكپەسى سياقتى... مەن دە ءماز ەمەسپىن، دەگەنمەن، جۇرەگىم تازا... كۇن سايىن جۇرەك تۇسىمدى سابىنداپ جۋىپ ­تۇرا­مىن. ارام جۇرەگىم جوق. وتانىنا ادال.  قىسقاسى، قاراجاتتان قىسىلىپ، كوشە-كوشەلەردەگى ايالدامالارعا حابارلاندىرۋ قاعازدارىن جابىستىرىپ تاستادىم. وندا بىلاي دەپ جازىلعان:

«جۇرەگى اۋىراتىن قازاقستان ازاماتتارى! الدىن-الا، ولمەي تۇرىپ، جۇرەگىمدى ساتامىن! جۇرەگىم وتانىنا شەكسىز بەرىلگەن، ناعىز قازاقى جۇرەك! ەركەك جۇرەك. وسى ۋاقىتقا دەيىن قىمباتشىلىقتان، ساتقىنداردان، ءدىني ەكسترەميستەردەن، ءبىر باسىندا بەس التى پاتەرلەرى بار استانالىق شەنەۋنىكتەردەن، ءتىپتى اشتان ولەيىن دەپ جاتقان ايەلىمنەن دە قورىققان ەمەس! ومىرىندە ينفاركت العان ەمەس... تازا سالماعى بىرنەشە كيلوگرامم... حالال جۇرەك. جۇرەگىمنىڭ جاسى قىلشىلداعان قىرىقتا... جۇرەك اۋىستىراتىندارمەن كەلىسىم- شارتقا وتىرامىن»

سول كۇنى ءبىر سەمىز ايەل جەتىپ كەلدى.

- جۇرەگىڭىزدى ساتاسىز با؟-دەپ سۇرادى ول.

- يا.

- تىرىدەي ساتاسىز با؟

- جوعا... مەن ولگەن سوڭ... سوعان الدىن-الا اقشا الامىن...

- قاشان ولەسىز سوندا؟

- قۇداي بىلەدى...

- ولمەي قويساڭىز شە؟

- شايتان ەمەس شىعارمىن ەندى...

- جۇرەگىم اۋىرادى مەنىڭ... بالا-شاعامنىڭ بولاشاعىن ويلاپ، جۇرەگىم اۋىرادى. اتىس، جارىلىستار... كۇندە ءولىپ جاتقان جاستار... ءدىني اعىمدار...

- بىلاي عوي اپاي، كەنەتتەن ميىما قان قۇيىلىپ ءولىپ تە كەتۋىم مۇمكىن. بىراق جۇرەگىم ءتىرى بولادى. ماشينا باسىپ تا كەتۋى مۇمكىن. سول كەزدە جۇرەگىمدى  الۋىڭىزعا بولادى. ەگەر اقشاسىن الدىن-الا تولەپ قويساڭىز...-دەپ تۇسىندىرگەن بولدىم... اپايىمنىڭ اۋزى اڭقيىپ كەتىپ قالدى. ەرتەڭىنە ەڭىرەپ ەر كىسى كەلدى.

- جۇرەك ساتادى دەپ ەستىدىم...

--يا.

- قانشاعا ساتاسىز؟

- وپتوم...

- نەمەنە، ءبىر وزىڭىزدە بىرنەشە جۇرەگىڭىز بار ما سوندا؟-دەپ ول مۇرنىن شۇقىلادى. جامان ادەتى بولسا كەرەك.

- جوعا... بازارلاردا «وپتوم، وپتوم» دەپ ارزان ايتىپ جاتادى عوي... سوعان ەلىكتەپ... كەشىرىڭىز...

- قانشا دەيمىن؟

- ون مىڭ دوللار...

- قىمبات ەكەن.

- گەرمانياعا بارساڭىز، 50 مىڭ دوللار سۇرايدى.

- سوندا ءسىز مەن وپەراتسياعا جاتاردا «سروچنو» ولەسىز بە؟

- قويىڭىزشى، اۋزىڭىز اۋعانستانعا قاراي قيسايىپ قالعىر... مەن كەنەتتەن ءولىپ قالۋىم مۇمكىن...

- قاشان ويباي؟

- اشتان قاتىپ دەگەندەي...

- قاشان دەمى تاۋسىلادى ەكەن دەپ كۇتى-ءىپ جۇرەدى ەكەنمىن دە!

- قازاقستاندا قانشاما استىق قار استىندا قالدى، ءبارىبىر نان قىمبات. اشتان ولمەگەندە، نەم قالدى؟ ءتاڭىر جارىلقاسىن، مىڭ تەڭگە بەرە تۇرىڭىزشى، تاماققا تىڭقيىپ تويىپ الايىن...

- ولگەن سوڭ اينىپ كەتسەڭىز شە؟

- ولگەن ادام سويلەمەيدى. نوتاريۋس ارقىلى كەلىسىم-شارت جاسايمىز...

كەلەسى كۇنى امەريكا پرەزيدەنتى باراك وبامادان حات كەلدى! «مۇسىلمانداردى جاقسى كورۋىم ءۇشىن ءسىزدىڭ جۇرەگىڭىزدى ساتىپ العىم كەلەدى! ءسىزدىڭ جۇرەگىڭىزدى وزىمە سالسام، اراب ەلدەرىنە قيتۇرقى ساياسات جۇرگىزبەيتىن بولارمىن دەپ سەنەمىن. ەندىگى اپتادا جۇرەگىڭىزدى كۇتەمىن...» دەپتى. قۇرىپ كەتسىنشى! مەنىڭ ءومىر سۇرگىم كەلەدى! جۇرەگىم ساتىلمايتىن بولدى، جاراندار! جۇرەكتەر جىلاماسىن...

«اباي-اقپارات»