جالپى، بىزدەگى بيلىكتىڭ، اسىرەسە جەرلىگىكتى جەردەگىلەردىڭ، قاراپايىم حالىقتان ىرگەسىن اۋلاق سالىپ، ارا جىگىنىڭ اجىراپ كەتكەندىگى ەشكىمگە دە قۇپيا ەمەس. بۇل - ولارعا نە جوعارىدان، نە تومەننەن باقىلاۋدىڭ جوقتىعىنان تۋىنداعان تىم «سوزىلمالى» سىرقات. وسىنىڭ سالدارىنان بۇلار حالىقپەن نەمەسە ولاردىڭ وكىلدەرىمەن ەمىن-ەركىن، بۇكپەسىز اشىق سويلەسۋ، سۇيكىمسىزدەي بولسا دا پىكىرىن تىڭداۋ ياعني تەڭ دارەجەدە ديالوگ جۇرگىزۋ سەكىلدى دەموكراتيالىق ءادىس-تاسىلدەردەن مۇلدەم جۇرداي بولعان. سوندىقتان دا ولار حالىقتىڭ ءسال دە بولسا نارازىلىعىنان قورقىپ، كەڭ كابينەتتەرىندە تىعىلىپ وتىرۋدى داستۇرگە اينالدىرعان. ءسىرا، «سەن تيمەسەڭ، مەن تيمەن، بادىراق كوز» دەگەن ساياسات قانداي قيىندىقتان قۇتقارادى دەگەنگە مىقتاپ سەنسە كەرەك.

ال مۇنىڭ ءوزى كەيدە ادام كۇلەرلىك، ۇلكەن ءبىر كومەدياعا جۇك بوارلىق سيىقسىز وقيعالارعا اكەلىپ سوعاتىندىعىن قايتەرسىڭ. جاقىندا ءبىزدىڭ قوستاناي قالالىق اكىمدىگى وسىنداي جاعدايدى باستان وتكەرىپ، حالىقتى ءبىر كۇلكىگە قارىق قىلدى.

قالا تۇرعىندارى كەشەگى سەنبى كۇنى تاڭەرتەڭ بالا-شاعالارىن الىپ، وسى شاھاردىڭ ورتالىعىنداعى ساياباققا اعىلماي ما؟ سويتسە ولاردىڭ الدىن پوليتسيا قىزمەتكەرلەرى بوگەپ، ەشقايدا جىبەرمەيدى. اڭ-تاڭ قالىپ، اڭىرعان جۇرتقا: «بۇگىن مەن ەرتەڭ بۇل ساياباقتا كورونوۆيرۋسقا قارسى دەزينفەكتسيا شارالارى جۇرگىزىلەدى. سوندىقتان وعان ەشكىم دە جىبەرىلمەيدى» دەپ ءبىر-اق كەسەدى. بۇعان نارازى بولعان جۇرت ايقايعا باسادى. ونىڭ اياعى ەكونوميكالىق تالاپتارعا ۇلاسادى. جينالعاندار قىمباتشىلىقتىڭ بوي بەرمەي بارا جاتقاندىعىن، از عانا زەينەتاقىنىڭ ەشتەڭەگە جەتپەيتىندىگىن ايتىپ، بۇلاردى قالاي شەشەتىندىگىن سۇراپ جاتتى. ال كەيبىرەۋلەرى: «ءبىزدىڭ دە 500 مىڭ تەڭگە ايلاق العىمىز كەلەدى» دەگەندى دە قىستىرىپ قويادى.

مۇندايدى كۇتپەگەن جەرگىلىكتى بيلىك، باياعى سول ەسكى ادىسىنە سالادى. قالالىق اكىمدىكتەن قالا اكىمىنىڭ ورىنباسارى اندرەي فينك پەن قالالىق ارداگەرلەر قوعامىنىڭ توراعاسى يۋري حارياكوۆ دەرەۋ جەتكىزىلەدى. ەكىنشىسىنىڭ بۇعان قانداي قاتىسى بار ەكەندىگىن، ءبىر قۇداي ءبىلسىن. اكىمدىكتەگىلەر ءسىرا مۇندا تەك ەرىككەن زەيەتكەرلەر جينالىپ، قىسىر اڭگىمە سوعىپ جاتىرعان شىعار دەپ توپشىلاعان بولار. شەنەۋنىكتەر بۇلاردى وتىرىپ، ەركىن سويلەسۋگە اكىدىكتىڭ عيماراتىنا شاقىردى. جينالعاندار ودان بىردەن باس تارتتى. نارازى توپ وزدەرىنە وبلىس اكىمىنىڭ كەلۋىن تالاپ ەتتى.

قىزىق بۇدان كەيىن باستالدى. الگى ەكەۋى كەتكەننەن سوڭ، جارتى ساعات وتەر-وتپەستەن ەكى شاعىن اۆتوبۋس كەلىپ توقتاپ، جينالعانداردىڭ تاراۋىن تالاپ ەتتى. نەگىزىنەن ايەلدەردەن قۇرىلاعان بۇل ازعانا توپتىڭ ىشىنەن بىرنەشەۋىن اۆتوبۋسقا سالىپ، الىپ كەتتى. ال بۇل وقيعانى كوزىمەن كورۋگە ۇمتىلعان تىلشىلەرگە پوليتسيا قىزمەتكەرلەرى كەدەرگى كەلتىرىپ باقتى.

مىنە، حالىقپەن دۇرىس جۇمىس جاساۋدان ماقۇرىم قالعان، تەك كابينەتتىك ءتاسىلدى عانا مەڭگەرگەن بيلىك وسىلايشا نارازىلىق ميتينگىسىن وزدەرى جاساپ الدى. بۇلاي دەۋىمىزدىڭ وزىندىك سىرى بار. جارايدى، سەنبى-جەكسەنبى كۇندەرى ساياباقتى دەزينفەكتسيادان وتكىزسىن دەلىك. ەندەشە نەگە وسى تۋرالى الدىن-الا حابارلانبايدى. «وسىلاي دا وسىلاي، بۇل كۇندەرى ساياباقتان باسقا جاققا قىدىرىڭدار» دەپ. سوندا جينالعان توپتىڭ بەتىن بىردەن قايتارۋعا مىقتى سەبەپ بار ەدى. ونىڭ ورنىنا نەگە ەكەنى بەلگىسىز، وسىندا قانشاما اقپارات قۇرالدارى بولا تۇرا، جۇرت مۇلدەم حابارسىز قالدى. سوسىن، الگى دەزينفەكتسيا دەگەن دۇنيە نە سەبەپتى دەمالىس كۇندەرى ەمەس، ماسەلەن، بەيسەنبى مەن جۇما كۇندەرى نەگە وتكىزىلمەيدى؟ 

مۇمكىن، ماسەلەنىڭ ءمانىسى سول ءدال سەنبىدە، ياعني 6 ماۋسىمدا شىعار. مۇمكىن بۇل جەرگىلىكتى بيلىكتىڭ اناۋ شەتەلدە جاتىپ، جۇرتتىڭ ءبارىن نارازىلىققا شاقىرۋدان شارشامايتىن، پارتياسى زاڭسىز دەپ جاريالانعان «مىقتىنىڭ» ءوزىنىڭ كەزەكتى «ساياسي شاراسىن» وسى كۇنگە بەلگىلەۋىنە قارسى جاساعان وزىندىك قام-قارەكەتى بولار. كوزى اشىق جۇرتتىڭ ول وليگارحتىڭ بۇل كەزەكتى ۇندەۋىن ەستىمەدى دەيسىڭ بە؟ سوسىن، ارينە، ساياباقتىڭ جابىلۋىن وسى وقيعامەن بايلانىستىراتىنندىعى قيسىنعا كەلمەيدى دەپ قالاي ايتارسىڭ.

ماسەلە، ءتىپتى سول وليگارحتا عانا ەمەس. اڭگىمە، جەرگىلىكتى بيلىكتىڭ مۇنداي ارەكەتتەرگە دايىن ەمەستىگى. «قورىققانعا قوس كورىنەدى» دەگەندەي وزدەرىنشە دۇرىسى ساياباقتى جاۋىپ تاستاعان دەگەن ويعا كەلگەن بولار شاماسى. ونىڭ ۇستىنە ادەتتە حالىق جينالاتىن جەر - وبلىستىق اكىمدىكتىڭ الدىنداعى الاڭ. ول سول ساياباقتىڭ جانىندا. وسىنى سىلتاۋ ەتكەن بيلىك ونى دا جاۋىپ تاستادى. راس، سالدەن كەيىگن اكىمدىكتىڭ الدى اشىلدى. ءسىرا، بيلىك وزدەرىنىڭ قاتەسىن تۇسىنگەن بولار.

ال ءبىزدىڭ تۇسىنبەگەنىمىز، بىرنشە ايەلدى اۆتوبۋسقا سالىپ اكەتكەننەن ماسەلە شەشىلە قويار ما ەكەن؟ مۇمكىن، ساياباقتىڭ جابىلاتىندىعىن ءبىر ەمەس، بىرنەشە كۇن بۇرىن جۇرتتى حاباردار ەتكەندە ەشكىم دە مۇندا كەلمەس تە ەدى. دەمەك، بار كىنا قالا اكىمدىگىندە. وزدەرىنىڭ بەيجايلىعى مەن نەمكەتىلىگىنەن ستيحيالى ميتينگىگە ۇلاساتىن، ماعىناسىز ارەكەتتى قولدان جاساپ الدى. ولاردىڭ فانتازياسىنىڭ جەتكەن جەرى وسى بولسا، قايتەرسىڭ.

جايبەرگەن بولاتوۆ

Abai.kz