قورعانىس ءمينيسترىنىڭ تاپسىرماسى بويىنشا قازاقستان رەسپۋبليكاسىنىڭ قارۋلى كۇشتەرىندە زاتتاي مۇلىكپەن قامتاماسىز ەتۋدىڭ جاڭا ۇلگىلەرى ەنگىزىلمەكشى. مۇنداي شەشىم قابىلداۋدا اسكەري قىزمەتشىلەردىڭ ءوز پىكىرلەرى ەداۋىر ماڭىزدى.

كوپ دەڭگەيلى تەكسەرۋ جۇيەسى كەزىندە اسكەري كيىم-كەشەك پەن كەرەك-جاراقتىڭ جاڭا ۇلگىلەرىن دالالىق تەستىلەۋ ءۇشىن ارنايى بولىمشەلەر قۇرىلاتىن بولادى.

جاڭعىرتۋ شەڭبەرىندە تۇبەگەيلى جاڭا ءتاسىل ەنگىزىلەدى، ياعني اسكەرگە جىبەرىلەردە بارلىق ۇلگىلەر ارنايى قۇرىلعان ەكسپەريمەنتتىك بولىمشەلەردە زەرتحانالىق سىنامالاردان جانە ماقۇلداۋدان وتەتىن بولادى. نەگىزگى كەزەڭدە اسكەري قىزمەتشىلەردىڭ وزدەرىنىڭ كوزقاراستارى ەسكەرىلەدى. ەگەر ءونىم جەكە قۇرامنىڭ كۇتكەنىنە سايكەس كەلمەسە، وعان تاپسىرىس بەرىلمەيدى.

قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى گەنەرال-مايور الماز جۇماكەەۆ اتاپ وتكەندەي، جاراقتاردىڭ ساپاسى وقۋ-جاۋىنگەرلىك مىندەتتەردى ورىنداۋدا ىڭعايلى بولۋىمەن تىكەلەي بايلانىستى:

«وقۋ-جاۋىنگەرلىك مىندەتتەردى ورىنداۋدا ساربازدار، كەلىسىمشارت قىزمەتىندەگىلەر جانە وفيتسەرلەر زاماناۋي، ىڭعايلى جانە جوعارى ساپالى فورمامەن قامتاماسىز ەتىلۋى ءتيىس. ءبىز اسكەري قىزمەتشىنىڭ پىكىرى شەشۋشى بولاتىنداي جۇيەگە كوشەمىز. ەگەر سارباز اياق كيىمىم ىڭعايسىز نەمەسە كيىمىم تالاپتارعا ساي ەمەس دەسە، مۇنداي ءونىم اسكەرگە جىبەرىلمەيدى».

مەرزىمدى قىزمەتتەگى اسكەري قىزمەتشىلەردىڭ سىرتقى كەلبەتىنە ەرەكشە نازار اۋدارىلادى. اسكەري انت بەرۋ، زاپاسقا شىعارۋ، دەمالىس بەرۋ كەزىندە قولدانىلاتىن كەڭسە كيىمى ەنگىزىلەدى. بۇل اسكەري قىزمەتشىنىڭ بىرىڭعاي جانە لايىقتى كەلبەتىن قالىپتاستىرۋعا مۇمكىندىك بەرەدى. سونىمەن قاتار، وسى اسكەري كيىمگە ساربازدارعا ارنالعان اسكەري داڭقتىڭ توسبەلگىلەرى ازىرلەنۋدە.

اسكەري قىزمەتشىلەردىڭ دەنساۋلىعىنا تىكەلەي اسەر ەتەتىن كيىم-كەشەكتىڭ نەگىزگى ەلەمەنتتەرىنىڭ ءبىرى رەتىندە اياق كيىمنىڭ ساپاسىنا ايتارلىقتاي نازار اۋدارىلادى. بۇل بولىمدە اسكەرلەردىڭ ءىس جۇزىندەگى جورىقتارى مىندەتتى تۇردە ەسكەرىلىپ، قاتاڭ ىرىكتەۋ قاعيداسى ەنگىزىلىپ جاتىر.

جاڭا جۇيەنىڭ نەگىزگى ەلەمەنتتەرىنىڭ ءبىرى «انالار  جۇرەگى» ساربازدار انالار كوميتەتىنىڭ قاتىسۋى بولىپ تابىلادى. كوميتەت تەك قوعامدىق باقىلاۋشى رەتىندە عانا ەمەس، سونىمەن قاتار اسكەرلەردەگى ناقتى جاعداي تۋرالى وبەكتيۆتى اقپاراتتىڭ تاۋەلسىز كوزى رەتىندە دە ارەكەت ەتەدى.

–  كوميتەت وكىلدەرى باقىلاۋ جۇيەسىندە ەرەكشە ءرول اتقارادى. ساربازدار انالارى كوميتەتى ءبىز ءۇشىن ناقتى جاعدايدىڭ كورسەتكىشى. سارباز ءاردايىم كومانديرگە اشىق ايتا المايدى، ال ولار كوميتەت وكىلدەرىمەن شىنايى سويلەيدى. سوندىقتان ولاردىڭ قاتىسۋى بىزگە وبەكتيۆتى كورىنىس الۋعا جانە پروبلەمالارعا ۋاقتىلى جاۋاپ بەرۋگە مۇمكىندىك بەرەدى، – دەپ اتاپ ءوتتى گەنەرال-مايور الماز جۇماكەەۆ.

كوميتەتپەن ءوزارا ءىس-ارەكەت تۇراقتى تۇردە قالىپتاسقان. ارميا، تاپسىرىس ورىنداۋشىلار جانە قوعام وكىلدەرىنىڭ قاتىسۋىمەن توقسانىنا كەمىندە ءبىر رەت كەزدەسۋلەر وتكىزۋ تۋرالى شەشىم قابىلداندى. بۇل فورمات پروبلەمالىق ماسەلەلەردى تەز انىقتاۋعا جانە شەشىمدەردى بىرلەسىپ جاساۋعا مۇمكىندىك بەرەدى.

قازىرگى زامانعى كۇتىم قۇرالدارىمەن قامتاماسىز ەتۋدى، ينفراقۇرىلىمدى دامىتۋدى جانە زاتتاي مۇلىكپەن قامتاماسىز ەتۋ ستاندارتتارىن جەتىلدىرۋمەن قوسا اسكەري قىزمەتشىلەردىڭ قىزمەتى مەن تۇرمىس جاعدايلارىن جاقسارتۋ بويىنشا قوسىمشا جۇيەلى جۇمىس جۇرگىزىلىپ جاتىر.

Abai.kz