جۇما, 29 ناۋرىز 2024
2587 1 پىكىر 29 ماۋسىم, 2020 ساعات 11:09

شىمكەنتتە مەكتەپتىڭ اۋرۋحاناعا اينالۋىنا قارسى بولعان تۇرعىندار كوشەنى جاپتى

28 ماۋسىم كۇنى شىمكەنتتەگى سامال-3 شاعىن اۋدانىنىڭ 50 شاقتى تۇرعىنى قۇرىلىسى ەندى اياقتالعان جاڭا مەكتەپكە ناۋقاستاردى اكەلىپ، پروۆيزورلىق ورتالىق اشۋعا نارازىلىق ءبىلدىردى.

تۇرعىنداردىڭ سوزىنشە، مەكتەپكە كوروناۆيرۋس جۇقتىرعان جانە پنەۆمونياعا شالدىققان ناۋقاستاردى اكەلمەك. ولاردىڭ ايتۋىنشا، بۇل جەرگىلىكتى تۇرعىندار ءۇشىن قاۋىپتى. اكىمدىك مەكتەپتىڭ ەمدەۋ ورتالىعىنا اينالاتىنىن جەرگىلىكتى تۇرعىندارعا ايتپاعان.

– مەكتەپتەن اۋرۋحانا اشۋعا كىم رۇقسات بەردى؟ اكىم بە، دارىگەر مە، كىم بولسا دا حالىقتىڭ الدىندا جاۋاپ بەرسىن. حالىق كوپ شوعىرلانعان جەرگە جۇقپالى اۋرۋمەن اۋىرىپ جاتقان ادامداردى الىپ كەلگەنىنە قارسىمىز، – دەيدى جەرگىلىكتى تۇرعىن بەردىعالي بەينەتوۆ.

مەكتەپ ماڭىندا جينالعان تۇرعىنداردى جيىرما شاقتى پوليتسيا كۇزەتىپ تۇردى. مەكتەپ ورنالاسقان كوشە باسىنا بلوكپوست قويىلدى. ەكى ساعاتتىڭ ىشىندە مەكتەپ ارتىنان كىرەتىن جولمەن شامامەن جيىرما شاقتى جەدەل جاردەم كولىگى بىرىنەن سوڭ ءبىرى ناۋقاستاردى الىپ كەلدى. مۇنى كورگەن تۇرعىندار ولاردى ىشكە كىرگىزبەيمىز دەپ كوشەنى جاپتى. شىمكەنت قالاسى اباي اۋدانى اكىمىنىڭ ورىنباسارى سانجار بورلىباەۆ كوشەنى جابۋ زاڭسىز ەكەنىن ايتىپ، جينالعانداردان تاراۋىن سۇرادى.

وسى كوزدە كەزەكتى جەدەل جاردەم كولىگى كەلدى. تۇرعىندار كولىكتى ىشكە كىرگىزبەيمىز دەپ الدىن جاپتى. پوليتسيا بىرنەشە ايەلدى كۇشتەپ كولىككە وتىرعىزدى. جينالعان تۇرعىندار پوليتسيانىڭ كولىگىن بوگەپ، ايەلدەردى جىبەرۋدى تالاپ ەتتى. ون مينۋتتان سوڭ پوليتسيا ۇستالعان ايەلدەردى كولىكتەن شىعاردى. پوليتسيا “جولدى جابۋ – زاڭسىز. تاراڭىزدار، ايتپەسە زاڭدى شارا قولدانامىز” دەپ جينالعاندارعا ەسكەرتتى. سودان كەيىن تۇرعىندار ءبىر-بىردەن تارادى.

مەكتەپ شىمكەنت قالالىق №6 ەمحانادان 200 مەتردەي جەردە ورنالاسقان.

جەرگىلىكتى باسىلىمداردىڭ حابالاۋىنشا، 26 ماۋسىم كۇنى قالاداعى "شىمسيتي" شاعىن اۋدانىندا ءدال وسىنداي جاعداي بولىپ، جەرگىلىكتى تۇرعىندار ءوز مەكتەبىنىڭ ەمدەۋ ورتالىعىنا اينالۋعا جول بەرمەگەن. نارازىلىق بىلدىرگەن تۇرعىندارعا قالا اكىمى مۇرات ايتەنوۆتىڭ ءوزى كەلىپ، بيلىكتىڭ شەشىمىن تۇسىندىرگەن. بىراق تۇرعىندار دەگەنىنەن قايتپاعان سوڭ، اكىم رايىنان قايتىپ، مەديتسينالىق جابدىقتاردى مەكتەپتەن شىعارۋدى تاپسىردى.

ماۋسىمنىڭ باسىنان بەرى شىمكەنتتە پنەۆمونيامەن اۋىرعاندار سانى كۇرت وسكەن. 22 ماۋسىمدا قالا بيلىگى پنەۆمونيامەن اۋىرعانداردىڭ 7.2 ەسەگە وسكەنىن، اۋرۋحانالاردا ورىن جەتپەي جاتقانىن ايتتى. 26 ماۋسىمدا قالا اكىمى مۇرات ايتەنوۆ قوسىمشا پروۆيزورلىق ورتالىقتار اشىلاتىنىن مالىمدەدى.

قازاقستان بيلىگى 3 ماۋسىمنان كوروناۆيرۋس جۇقتىرعانداردى اۋرۋ بەلگىلەرىنىڭ بار-جوعىنا قاراي “اۋىرعاندار” جانە “تاسىمالداۋشىلار” دەپ ەكى بولەك ساناق جۇرگىزىپ كەلەدى. نەگىزگى ستاتيستيكاعا تەك “اۋىرعاندار” قوسىلىپ جاتىر. بولمەي ساناعاندا شىمكەنتتە ەپيدەميا باستالعالى 2856 ادامنان كوروناۆيرۋس انىقتالدى. اۋرۋ بەلگىلەرى ونىڭ 1556-ىندا بار، 1300-ىندە جوق. ۆيرۋس جۇقتىرعانداردىڭ 686-سى جازىلعان، 14-ءى قايتىس بولعان.

Abai.kz

1 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2257
عيبىرات

قايسار رۋحتى عازيز جان

مۇحتار قۇل-مۇحاممەد 3536