قازىر "اتامەكەن" كاسىپكەرلەر پالاتاسى "بيزنەس -باستاۋ" اتتى ونلاين كۋرس وتكىزىپ جاتىر. بۇرىن ءبىر اي وتەتىن كۋرس ەكى اپتاعا قىسقارعان. ەكى اپتادا ۇيدە كاسىپ اشقىسى كەلگەن انالار 64 ساباقپەن تانىسىپ، تاپسىرما ورىنداۋى، بيزنەس جوسپار جاساپ ۇلگەرۋى قاجەت. كۇنىنە 11 ساباققا دەيىن وقۋعا بولادى. سەنبى-جەكسەنبى دەمالماي وقىپ جاتقان كەيبىر انالاردى پالاتا ورتا جولدان شىعارىپ جىبەرگەن. سەبەپ، ساباققا ەكى كۇن كىرمەگەن. ءبىر انا 17, ەكىنشىسى 27-
ساباقتا شىعىپ قالعان. بۇل تۋرالى الدىن الا ەسكەرتىلمەگەن.

جالپى ونلاين-وقۋ دەگەن، ۋاقىتتى شەكتەمەيتىن وقۋ ەمەس پە؟ كۇندىز وقي ما، تۇندە وقي ما، ەمتيحانعا دەيىن تانىسىپ، مەڭگەرسە بولدى ەمەس پە؟ الدە "اتامەكەن" پالاتاسى قازاقستاندا بارلىق تۇرعىنعا جوعارى جىلدامدىقتى ينتەرنەت قولجەتىمدى، ۇيدە وتىرعان انالاردىڭ بارلىعىندا نوۋتبۋك بار دەپ ويلاي ما؟ ءبىر انانىڭ ينتەرنەت ترافيگى ءبىتىپ قالعان، ەكىنشىسىندە تەلەفون سىنىپ، ساباققا كىرۋگە مۇمكىندىك جوعالتقان.

جالپى بۇل وقۋ مەملەكەتتىك "ەڭبەك" - حالىقتى جۇمىسپەن قامتۋ" باعدارلاماسى اياسىندا ءوتىپ جاتقان كۋرس. ەندەشە پالاتا وقيمىن دەگەن ادامعا كاسىپكەرلىك نەگىزدەرىن قانداي دا ءبىر كەدەرگىلەرگە قاراماستان بەرۋى ءتيىس. سەبەبى، بۇل باعدارلاماعا رەسپۋبليكالىق بيۋدجەتتەن قوماقتى قارجى بولىنگەن. قىركۇيەككە دەيىن قاراعاندىدا "بيزنەس -باستاۋدى" 1800 ادام وقىپ، سەرتيفيكات الۋى ءتيىس. ال مىنانداي قاتاڭ تالاپپەن قانشا ادام سەرتيفيكات الماق؟

جالپى "اتامەكەن" كارانتين كۇشەيىپ تۇرعان كەزدە ساباق سانىن قىسقارتقانى دۇرىس. ەكىنشىدەن، ەكىنىڭ بىرىندە تىماۋ، ەكى وكپەسى قابىنعان جاقىنى بار ادامدى ەكرانعا تەلمىرتىپ، وقۋدان ورتا جولدان شىعارىپ جىبەرۋى ەلدىڭ سالىن ءتۇسىرىپ جىبەردى. بۇل كۋرس - كاسىپ اشۋ ءۇشىن 555 مىڭ گرانت ۇتىپ، 4 پايىزدىق نەسيە الۋعا اپاراتىن باسپالداق. بۇل كۋرستىڭ سەرتيفيكاتىنسىز گرانتقا دا، جەڭىلدەتىلگەن نەسيەگە دە قۇجات قابىلدامايدى. ەندەشە ونى نەگە "اتامەكەن" قيىنداتىپ جىبەرگەن؟

وقۋدان شىعىپ قالعاندارعا، 6 شىلدەدە وتەتىن كەلەسى كۋرسقا قابىلداناسىز دەپتى. وسى جولى تالاي ادام ىلىنبەگەن. قاتىسۋشىلار سانى شەكتەۋلى. كەلەسى كۋرستى كۇتۋشى كوپ. ەندى ولاردىڭ ورنىن وسى جولى شىعىپ قالعاندارمەن تولتىرادى. سوندا بىرىنەن بىرىنە ىسىرىپ، وقۋى ءتيىس 1800 ادامنىڭ ەسەبىن وسىلاي جاپپاق پا؟

بۇرىن مۇنداي كۋرسقا قاتىسۋشىلارعا شاكىرتاقى تولەيتىن. بيىل وقۋ ونلاين بولعاندىقتان، ول جوق. حالىق شاكىرتاقىسىز دا وقۋعا ىنتالى. ءبىلىم بەرسە ەكەن دەيدى. وقۋ وقىعان ادامدا كەلەشەككە دەگەن ءۇمىت ويانادى، كاسىپ اشۋعا ىنتالانعان ادام كوپ. مۇمكىندىك بەرىڭىزدەر.

بيىل اتاۋلى كومەك الاتىندار "باستاۋ-بيزنەس" وقىماسا دا 555 مىڭنىڭ گرانتىنا قاتىسا الادى دەگەن جەڭىلدىك ەندى. الايدا، وقۋ وقىماي قاتىسقانداردىڭ ەشقايسى بۇل گرانتتى ۇتپادى. نەگىز بولماسا، بيزنەس جوسپاردى قالاي جاساماق؟

قاراعاندى قالاسىندا 25-26 شىلدەدە وتكەن 555 مىڭ تەڭگەنىڭ قايتارىمسىز گرانت بايقاۋىنا 86 ادام قۇجات تاپسىرىپتى. ونىڭ ىشىندە 22 ادام گرانت ۇتقان. مەنىڭشە وتە از.

جازدىڭ ورتاسى بولدى. جۇرت وقۋىن وقىپ، گرانتىن ۇتىپ، نەسيەسىن راسىمدەپ، قارا كۇزگە دەيىن كاسىبىن اشۋعا قامدانۋى كەرەك. كۇزدە كۇن سۋىتقاندا تج كۇردەلەنبەسىنە كىم كەپىل بەرەدى؟ سول سەبەپتى "بيزنەس-باستاۋ" كۋرسىنا قاتىسۋشىلاردى ءجۇز ادامنان عانا شەكتەمەي، اقىرى ونلاين ءوتىپ جاتقان وقۋدى بىرنەشە پوتوك قىلىپ، 500 ادامعا دەيىن ءبىر مەزەتتە وقىتۋعا كوشسە دەگەن ۇسىنىسىم بار. سەبەبى بۇل كۋرستىڭ سەرتيفيكاتى ءۇش جىلعا جارامدى.

ءبىلىم العان ادامدا، كاسىپ اشسام دەگەن وي پايدا بولادى، ىزدەنەدى. كارانتيننەن تارىقپاي شىعۋعا ەل دە مۇددەلى. بيىك مىنبەرلەردە ايتىلعان مەملەكەتتىك باعدارلامالار شىنىمەن دە ىسكە اسسا ەكەن.

ءلاززات قوجاحمەتتىڭ الەۋمەتتىك جەلىدەگى جازباسى

Abai.kz