جۇما, 29 ناۋرىز 2024
ساڭلاق 10323 22 پىكىر 7 شىلدە, 2020 ساعات 17:03

كومانداسى جوق قالادا 31 ملن. دوللارعا ستاديون سالىنادى

تۇركىستان وبلىسىنىڭ ورتالىعى تۇركىستان قالاسىندا 7000 ورىندىق ستاديون سالىنىپ جاتىر. بۇل ستاديوننىڭ سالىناتىنى جايلى وتكەن جىلى حابارلانعان. 2019 جىلى اقپان ايىندا باستالعان قۇرىلىس 2020 جىلدىڭ جەلتوقسانىندا اياقتالادى دەپ جوسپارلانىپ وتىر.

ءبارىمىز بىلەتىندەي، 2018 جىلدىڭ جازىندا وڭتۇستىك قازاقستان وبلىسى تۇركىستان وبلىسى دەپ اتالىپ، بۇرىنعى ورتالىعى شىمكەنت رەسپۋبليكالىق ماڭىزى بار قالا مارتەبەسىن الدى. ال ۇزاق تاريحى بار تۇركىستان قالاسى جاڭا وبلىستىڭ اكىمشىلىك ورتالىعىنا اينالدى.

وبلىستى دامىتۋ جوسپارىنا سايكەس، 2019 جىلدان 2021 جىلعا دەيىن ەكى جۇزگە جۋىق جاڭا نىسان بوي كوتەرەدى دەپ جوسپارلانعان. بۇل نىسانداردىڭ قۇرىلىسىنا 528 ميلليارد تەڭگە بولگەن. بۇل تىزىمگە ءبىز ءسوز ەتىپ وتىرعان 7000 ادامعا ارنالعان جاڭا ستاديون دا كىرەدى. سپورت نىساندارىنان بولەك ايماقتا كونگرەسس-ورتالىق، مەكتەپ وقۋشىلارىنا ارنالعان ساراي، دراما تەاترى مەن ياسساۋي مۇراجايى سياقتى مادەني ورتالىقتار سالىنادى.

ارەنانى BI Group كومپانياسى سالىپ جاتىر. بۇعان دەيىن مەكەمە باسشىلارى ەلدەگى توتەنشە جاعدايعا قاراماستان قۇرىلىس جالعاسادى دەپ مالىمدەگەن بولاتىن.

وتاندىق اقپارات قۇرالدارىنىڭ حابارلاۋىنشا، وسى ستاديوندى سالۋعا شامامەن 13 ملرد. تەڭگە (31 ملن. اقش دوللارى) جۇمسالاتىن كورىنەدى. تاپسىرىس بەرۋشى - «سامۇرىق-قازىنا» ۇلتتىق ءال-اۋقات قورى.

ەندىگى سۇراق، تۇركىستاندا سالىناتىن وسى ستاديون ءۇشىن 31 ميلليون دوللار كوپ پە، الدە از با؟

بىرىنشىدەن، تۇركىستان قالاسىندا 2005 جىلدان بەرى فۋتبول كلۋبى جوق. جەرگىلىكتى «ياسسى» كلۋبى 2005 جىلى تاراتىلعان، ودان بەرى دە 15 جىل ءوتتى. قالا بيلىگى «الداعى ۋاقىتتا كيەلى ءوڭىردىڭ ءوز فۋتبول كومانداسىن قۇرىپ، وڭىردەگى فۋتبول سۇيەر قاۋىمنىڭ قاراسىن كوبەيتەمىز» دەپ ۋادە بەرىپ وتىر.

بىراق ول كوماندانىڭ قۇرىلىپ، پرەمەر ليگاعا شىعىپ، جەرگىلىكتى جانكۇيەردى قۋانتۋىنا ءالى تالاي ۋاقىت كەرەك. دەمەك، تۇركىستاندا جوق كوماندا ءۇشىن 31 ميلليون دوللارعا ستاديون سالىنىپ جاتىر دەگەن ءسوز.

ەكىنشىدەن، جاڭا كوماندا قۇرىلعان، ءتىپتى بۇرىننان كوماندا بولعان كۇننىڭ وزىندە 7000 مىڭ ادامعا عانا ارنالعان شاعىن ستاديوندى مىناداي مول قارجىعا سالۋ اقىلعا قونا ما؟! تۇركىستان وبلىسى ەلىمىزدەگى زات باعاسى، ەڭبەك كۇشى ەڭ ارزان وڭىرلەردىڭ ءبىرى ەمەس پە؟.. ەندەشە ەلدەگى ەڭ ارزان ءوڭىر ەڭ كىشكەنتاي ستاديوندى نەگە سونشا قىمباتقا سالىپ جاتىر؟

بىراق ءبىزدىڭ شەنەۋنىكتەردىڭ ساۋساعىنىڭ ۇشى قيمىلداسا بولعانى ميلليوندار مەن ميلليادتار «اتقا قوناتىنى» بۇرىننان بەلگىلى. قازاق بيلىگى از قارجى جۇمساپ كوپ ءىس تىندىرۋدى جاقىن ارادا ۇيرەنە المايتىن سەكىلدى. ستاديون سالۋعا جۇمسالعان ەسەپسىز قارجى جايلى «شەتەل ستاديون سالاتىن قارجىعا شىمكەنتتە رەمونت جاسايدى» دەگەن ماقالامىزدا دا ءسوز ەتكەن ەدىك. وندا شىمكەنت قالاسىنداعى «قاجىمۇقان اتىنداعى ورتالىق ستاديوندى» قايتا جوندەۋگە 44 ملن. ەۋرو (مولشەرمەن 50 ملن. دوللار) جۇمساعالى وتىرعانى ءسوز بولعان.

سول كەزدە ءبىزدى 50 ملن. دوللارعا ستاديوننىڭ كەم-كەتىگىن تۇزەتىپ جۇرگەن قازاق بيلىگى زاماناۋي جاڭا الاڭ سالۋ ءۇشىن قانشا قارجى جۇمسايدى دەگەن سۇراق مازالاعان ەدى. سونىڭ جاۋابى تابىلدى. جەتى-اق مىڭ ادامعا ارنالعان شاعىن ارەناعا 31 ملن. دوللار جۇمساعالى وتىرمىز. بۇل نەگە شىمكەنتتىڭ ستاديونىن جوندەگەن قارجىدان از بولدى دەمەڭىز. شىمكەنتتەگى «ورتالىق ستاديون» قۇشاعىنا 20 مىڭ ادامدى سىيدىرا الاتىن، تۇركىستانداعىدان 3 ەسە ۇلكەن ستاديون. ەگەر تۇركىستاندا مۇنداي ۇلكەن ارەنا سالىنسا، 31 ملن. ەمەس، 90 ملن. جۇمسالار ەدى.

تاعى ءبىر ايتا كەتەرلىگى، تاۋەلسىزدىك العاننان بەرى ەلىمىزدە جالعىز ستاديون - «استانا ارەنا» عانا سالىندى. تۇركىستاندا سالىنىپ جاتقان ستاديون ەلىمىز تاريحىنداعى ەكىنشى جاڭا ارەنا بولماق. توبەسىندە اشىلىپ-جابىلاتىن قوزعالمالى شاتىرى بار «استانا ارەنانى» سالۋعا ەل بيۋدجەتىنەن 182 ملن. دوللار جۇمسالعان بولاتىن.

اقشانىڭ كوزىنە قارامايتىن قازاق بيلىگى 30 مىڭ ادامعا ارنالعان «استانا ارەنانى» 182 ملن. دوللارعا، 7 مىڭ ادامعا ارنالعان تۇركىستانداعى ستاديوندى 31 ملن. دوللارعا سالادى ەكەن. ەندەشە وزگە ەل فۋتبول الاڭىن سالۋعا قانشا قارجى جۇمسايدى دەگەن سۇراققا جاۋاپ بەرە كەتەيىك.

1. «ۋدينەزە» ستاديونى (يتاليا) - «داچيا ارەنا». سىيىمدىلىعى: 25 144 كورەرمەن، قۇنى: 23,6 ميلليون دوللار، سالىنعان جىلى: 2013-2015 جج.

2. «سيۆاسسپور» ستاديونى - «سيۆاس ارەنا». سىيىمدىلىعى: 27 532 كورەرمەن، قۇنى: 21,3 ميلليون دوللار، سالىنعان جىلى: 2013-2016 جج.

3. «پەنياروليا» ستاديونى - كامپەون-دەل-سيگلو. سىيىمدىلىعى: 40 005 كورەرمەن، قۇنى: 40 ميلليون دوللار، سالىنعان جىلى: 2014-2016 جج.

4. ستاديون «كونياسپور» - توركۋ ارەنا. سىيىمدىلىعى: 42 276 كورەرمەن، قۇنى: 21,3 ميلليون دوللار، سالىنعان جىلى: 2012-2014 جج.

5. «تيمسا ارەنا» (تۇركيا). سىيىمدىلىعى: 43 877 كورەرمەن، قۇنى: 24,5 ميلليون دوللار، سالىنعان جىلى: 2011-2015 جج.

6. «دنەپر-ارەنا» (ۋكراينا). سىيىمدىلىعى: 34 000 كورەرمەن، قۇنى: 40 ميلليون دوللار، سالىنعان جىلى: 2008 جىل.

قۋانىش قاپپاس

Abai.kz

22 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2274
عيبىرات

قايسار رۋحتى عازيز جان

مۇحتار قۇل-مۇحاممەد 3591