ەلىمىزدە كوروناۆيرۋس دەرتى دەندەپ بارادى. كەشە ءبىر تاۋلىكتە ەلدە 1759 ناۋقاس تىركەلدى. وسىدان-اق، ىندەتتىڭ بەتى قاتتى ەكەنىن بايقاۋعا بولادى. ۆيرۋس جۇقتىرعان العاشقى ناۋقاس تىركەلە سالا توتەنشە جاعداي جاريالاپ، ەكى ايدان اسا قاتاڭ كارانتين ەنگىزىلسە دە بۇگىنگى جاعداي مىناداي بولىپ وتىر. 

جەرى كەڭ، حالىق سانى از قازاقستاندا كوروناۆيرۋستىڭ وسىنشا تەز ءارى كوپ تارالعانى تاڭقالدىرماي قويمايدى. بۇعان حالىق بيلىكتى، بيلىك حالىقتى كىنالايدى. بيلىك باسىنداعىلاردىڭ ويىنشا، حالىق كارانتيندى ەلەمەي ساقتىق شارالارىن جاسامادى، توي وتكىزدى. ال حالىق بيلىكتىڭ توتەنشە جاعداي كەزىندەگى دارمەنسىزدىگىنە نارازى. ەلدەگى ەمحانالاردىڭ، مامان-دارىگەرلەردىڭ جەتىسپەگەنىنە، ءدارى-دارمەكتىڭ تاپشىلىعىن ايتادى. ءتىپتى ىندەت جۇقتىرعان ناۋقاستاردى ەمدەيتىن مەديتسينالىق اپاراتتاردى حالىق ءوزى اقشا جيناپ الىپ جاتىر.

حالىق پەن بيلىك كىنانى ءبىر-بىرىنەن ىزدەپ وتىرعاندا ەلدە كوروناۆيرۋستىڭ جاڭا ءتۇرىن جۇقتىرعاندار 63 514 ادامعا جەتىپتى. بۇل كورسەتكىش بويىنشا الەمدە 30-ورىنعا بىراق شىقتىق. ال ءبىر تاۋلىكتە (15 شىلدە) ىندەت جۇقتىرعاندار سانى بويىنشا 15-ورىندا تۇرمىز (1759 ادام).

وسىلايشا قازاقستان الەمدى وزىق تەحنولوگياسىمەن، باي ەكونوميكاسىمەن ەمەس، كوروناۆيرۋستى جۇقتىرۋ كورسەتكىشى بويىنشا تاڭقالدىرىپ وتىر. بىزدەن ءبىر ساتى جوعارى تۇرعان بەلارۋس (65 269) مۇلدە كارانتين ەنگىزگەن جوق. ال قازاقستان العاش ۆيرۋس جۇقتىرعاندار انىقتالا سالا، تەتەنشا جاعداي مەن كارانتين جاريالاعان. كوروناۆيرۋسپەن كۇرەسكە بولىنگەن قارجى دا شاش-ەتەكتەن. جاقىندا عانا تاعى 150 ميلليارد تەڭگە ءبولىندى. سويتە تۇرا ىندەتتىڭ بەتى قايتار ەمەس.