كوروناۆيرۋس ىندەتى باستالعالى الەمدەگى وسى اۋرۋمەن كۇرەس بارىسىن عالامتوردان قاداعالاپ وتىرامىن. ءوزىمنىڭ كوز جەتكىزگەنىم، بۇل ورايدا جاقسى ناتيجەگە قول جەتكىزگەن كۋبا ەكەن.

حالىق دەنساۋلىعى مينيسترلىگىنىڭ (MinSAP) 25 شىلدەدەگى مالىمەتىنشە بۇل ەلدە كوۆيد-19-دىڭ 17 جاڭا وقيعاسى تىركەلگەن. ال كوروناۆيرۋس جۇقتىرعانداردىڭ جالپى سانى 2495 بولسا، 2349 ناۋقاس (94,2%) جازىلىپ شىققان، 87 ادام قايتىس بولعان.

قازىرگى قازاقستانمەن سالىستىرعاندا بۇل كەرەمەت جەتىستىك ەكەنى داۋسىز. جالپى كۋبادا دەنساۋلىق ساقتاۋ جۇيەسى بارلىق سانكتسيالارعا، ەكونوميكالىق قيىندىقتارعا قاراماستان جاقسى دامىعان. سوتسياليستىك جۇيەنىڭ قاعيداسىنا ساي بۇل ەلدە حالىقتىڭ دەنساۋلىعى ءبىرىنشى ورىندا تۇر. دۇنيە ءجۇزى دەنساۋلىق ساقتاۋ ۇيىمىنىڭ مالىمەتىنشە كۋبادا بالا ءولىمى لاتىن امەريكاسى ەلدەرى اراسىندا ەڭ تومەنگى دەڭگەيدە.

تاعى ءبىر ايتارلىعى، دۇنيە ءجۇزى دەنساۋلىق ساقتاۋ ۇيىمى جانىنان قۇرىلعان كوروناۆيرۋسقا قارسى كۇرەس كوميسسياسىنىڭ قۇرامىنا الەمنىڭ ءار ەلدەرىنەن 60 مامان كىرەتىن بولسا، سونىڭ سەگىزى كۋبادان شاقىرىلعاندار. بۇل كۋبا مەديتسيناداعى جەتىستىگىن الەمدىك دەڭگەيدە مويىنداۋ ەمەس پە؟!

كوروناۆيرۋسپەن كۇرەستەگى جاقسى ناتيجەگە سوتسياليستىك جۇيەنىڭ ارتىقشىلىقتارى عانا ەمەس، ادامداردىڭ ۇجىمشىلدىق ساناسى، ۇيىمشىلدىق تا وڭ اسەر ەتەتىن سياقتى. ىندەت جاعدايىندا كۋبالىقتار «Mi salud depende de su responsabilidad, como la suya depende de cuán responsable sea yo» («مەنىڭ دەنساۋلىعىم سەنىڭ جاۋاپكەرشىلىگىڭە بايلانىستى، ال سەنىڭ دەنساۋلىعىڭ مەنىڭ قانشالىقتى جاۋاپتى ەكەنىمە بايلانىستى») دەگەن قاعيدانى ۇلتتىق ۇران ەتىپ ۇستانىپ وتىر.

ءبىزدىڭ ەلدە كوروناۆيرۋستىڭ ورشۋىنە ازاماتتاردا وسىنداي ءبىر-ءبىرىنىڭ ومىرىنە دەگەن جاۋاپكەرشىلىكتىڭ بولماۋى ەڭ باستى سەبەپ دەپ ويلايمىن. مەن سوتسياليستىك جۇيەنى دارىپتەۋدەن اۋلاقپىن، بىراق، قازىرگى سانانى اقشا، قوعامدى جەكە مەنشىك بيلەگەن زاماندا ادامداردىڭ ءوز قارا باستارىنىڭ مۇددەسىنەن اسپاۋى، رۋحاني وقشاۋلانۋى، الەۋمەتتىك ەگويزم، تاسباۋىرلىق، جاۋاپسىزدىق كاپيتاليستىك جۇيەدەن العان «قۇندىلىقتارىمىزدىڭ» ادامي قۇندىلىقتارمەن ۇيلەسپەيتىنىن كورسەتىپ وتىر.

ارينە، كۋبانىڭ ۇلگىسىن تۇتاستاي بۇگىنگى قازاق قوعامىنا كوشىرە المايمىز. بىراق، ءوزىمىز وتكەن سوتسياليستىك جۇيەنىڭ كەيبىر ۇتىمدى تۇستارىن پايدالانۋعا، مىسالى، دەنساۋلىق سالاسىنىڭ ءدارى-دارمەك ءوندىرىسى مەن ساۋداسىن، جەكە مەنشىك فارماتسەۆتيكالىق كاسىپورىنداردى مەملەكەت مەنشىگىنە اۋىستىرۋ، مەديتسينالىق وقۋ ورىندارىن، دارىگەرلەردى دايارلاۋ ءىسىن مەملەكەتكە بەرۋ، قارجىنى ورتالىقتاندىرۋعا كوشسەك بۇگىنگى مۇشكىل احۋالدى جاقسارتۋعا بولار ەدى.

ءبىز سوتسياليزمنەن كاپيتاليزمنىڭ نۋ ورمانىنا ەنگەندە وزگەنىڭ قاڭسىعىن تاڭسىق كورەتىن قازاقى ادەتپەن باتىستىڭ جاقسىسىن دا، جامانىن دا قۇشاعىمىزعا باستىق. ال ورتاقشىلدىق جۇيەنىڭ تاجىريبەدە سىنالعان ۇتىمدى  تۇستارىن، بولاشاعى بار «جاس نارەستەنى»، شايىندى سۋمەن بىرگە تاريح قوقىسىنا توگە سالدىق. بىراق قاتەلىكتى ءالى دە تۇزەۋگە بولادى.

مارات ەرمۇقانوۆ

Abai.kz