جەتپىسكە جۋىق تىلگە اۋدارىلعان، بالالارعا ارنالعان ەڭ اتاقتى كوميكس-رومانداردىڭ ءبىرى «تەنتەك بالاقايدىڭ كۇندەلىگى» («Wimpy Kid») قازاق تىلىندە جارىق كوردى. اقش جازۋشىسى، سۋرەتشى جەفف كينني جازعان بۇل كىتاپتى قازاقستاندىق «Steppe & WORLD Publishing» باسپاسى شىعاردى. 

باسپا وكىلدەرىنىڭ ايتۋىنشا، كىتاپتى قازاق جانە اعىلشىن تىلدەرىندە وقۋعا بولادى، ياعني ءبىر باسىلىمدا ەكى تىلدەگى نۇسقا قاتار بەرىلىپ وتىر. 

«بالالار پلانشەت پەن تەلەفوننان ايرىلمايدى، كىتاپتان قاشادى. سونىڭ كەسىرىنەن بويىندا پسيحولوگيالىق تەرىس وزگەرىستەر بولىپ جاتادى. مۇنى قۇمارلىققا تەڭەر ەدىم. كوپ اتا-انا ۇل-قىزىنا كىتاپ وقۋدىڭ پايداسىن تۇسىندىرە الماي قينالادى. «تەنتەك بالاقايدىڭ كۇندەلىگى» كوميكس-رومانى وسىندايدا جاقسى كومەكشى بولماق. بۇل ەڭبەكتى بالالار ءسۇيسىنىپ وقيدى جانە باسقا كىتاپتى وقۋعا دەگەن قۇلشىنىس پايدا بولادى. ال تۇپنۇسقا ءماتىننىڭ قاتار بەرىلۋى اعىلشىن ءتىلىن جاقسارتادى»، - دەيدى باسپا باسشىسى رايسا سايرانقىزى قادىر. 

رايسا قادىر 2019 جىلى جەفف كيننيمەن كەزدەسكەنىن جانە اۆتوردىڭ قازاقستانعا كەلۋگە نيەتتى ەكەنىن ايتتى. 

«كىتاپتىڭ بۇدان بولەك تاعى بىرنەشە ءبولىمىن شىعارعان سوڭ اۆتوردى ارنايى شاقىرىپ، وقىرماندارعا ەرەكشە كەش سىيلايمىز دەپ ۇمىتتەنەمىن»، - دەيدى باسپا باسشىسى. 

«تەنتەك بالاقايدىڭ كۇندەلىگىن» قازاق تىلىنە اۋدارعان – ناركەز بەرىكقازى. رەداكتورى – نازگۇل قوجابەك. 

كىتاپتىڭ باس كەيىپكەرى – قاراپايىم وقۋشى گرەگ حەففلي. ول باسىنان وتكەن الۋان ءتۇرلى قىزىق وقيعانى كۇندەلىك رەتىندە جازىپ جۇرەدى. گرەگتىڭ سۋرەتتەگەنىن وقىعان ءار بالا ءوزىن تانيدى، ساباق الادى. 

«ءماتىنى جەڭىل، سۋرەتتەرى تارتىمدى، كەيىپكەرلەرىنەن بالالىق اڭعالدىق پەن تازالىق لەبى ەسىپ تۇرعان كىتاپتا ءار وقۋشىنىڭ باسىنان وتەتىن، اتا-انامەن، مۇعالىمدەرمەن، سىنىپتاستارمەن اراداعى قاتىناس، جاقسى مەن جاماننىڭ بايىبىنا بارۋ، باردى بار، جوقتى جوق دەپ ءتۇسىنۋ ەۆوليۋتسياسى سيپاتتالعان»، - دەيدى رايسا. 

«تەنتەك بالاقايدىڭ كۇندەلىگىنە» «Steppe & WORLD Publishing» باسپاسىنىڭ الەۋمەتتىك جەلىلەردەگى پاراقشالارى (Facebook, Instagram) ارقىلى، سونداي-اق whatsapp مەسسەندجەرىمەن +7 700 246 35 30 ءنومىرى بويىنشا تاپسىرىس بەرۋگە بولادى. بۇدان بولەك «مەلومان»، «قازىنا»، «ماما، پوچيتاي»، «سوسوbee»، «كنيجنىي گورود»، «Knizhka.kz» سەكىلدى كىتاپ دۇكەندەرىنەن ساتىپ الۋ مۇمكىندىگى بار. 

قوسىمشا اقپارات: 

«Steppe & WORLD Publishing» باسپاسى بالالارعا ارنالعان جۋليا دونالدسوننىڭ «اقىن قويان» جانە «گرۋففالو»، ەريك كارلدىڭ «قوماعاي جۇلدىزقۇرت»، ەلەن دەلفورجدىڭ «ماما»، سونداي-اق «اننا فرانكتىڭ كۇندەلىگى» سەكىلدى كىتاپتاردى قازاق تىلىنە اۋدارىپ، شىعارعان. 2020 جىلى باسپا جوان ءروۋليڭتىڭ «ءحارري پوتتەر مەن ءپالساپا تاس»، «ءحارري پوتتەر مەن جاسىرىن بولمە» كىتاپتارىن ۇسىندى. قازىر «ءحارري پوتتەر» سەرياسىنا كىرەتىن قالعان بەس كىتاپ اۋدارىلىپ جاتىر. 

Abai.kz