ەلوردادا «اۋىل» پارتياسى مەن «قازاقستان فەرمەرلەرى قاۋىمداستىعى» ىنتىماقتاستىق مەموراندۋمىن بەكىتتى.

قۇجاتقا «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ پەن «قازاقستان فەرمەرلەرى قاۋىمداستىعى» رەسپۋبليكالىق قوعامدىق بىرلەستىگىنىڭ باسقارما توراعاسى جيگۋلي دايراباەۆ قول قويدى.

مەموراندۋم اياسىندا تاراپتار اگروونەركاسىپ كەشەنىن دامىتۋعا، اۋىل شارۋاشىلىعى سالاسى مەن اۋىل ەڭبەككەرلەرىنىڭ وزەكتى ماسەلەلەرىن شەشۋگە، اۋىل شارۋاشىلىعى تاۋار وندىرۋشىلەرى مەن اگروونەركاسىپتىك كەشەننىڭ باسقا دا قاتىسۋشىلارىنا مەملەكەتتىك جانە مەملەكەتتىك ەمەس قولداۋ جۇيەسىن جەتىلدىرۋگە جاردەمدەسۋگە باعىتتالعان بىرلەسكەن ءىس-شارالاردى وتكىزۋ تۋرالى كەلىسىمگە كەلدى.

«قازاقستان فەرمەرلەرى قاۋىمداستىعى» - قازاقستاننىڭ بارلىق وبلىستارىنىڭ 40 مىڭنان استام فەرمەرىن بىرىكتىرەتىن ءىرى قوعامدىق ۇيىمداردىڭ ءبىرى. اتالمىش قوعامدىق بىرلەستىكپەن ورتاق مۇددەلەرىمىز كوپ. بۇعان دەيىن دە رەسپۋبليكالىق جانە ايماقتىق دەڭگەيدە ارىپتەستىك قارىم-قاتىناستا بولدىق. اسىرەسە اۋىل شارۋاشىلىعى سالاسىنىڭ دامۋىنا قاتىستى ماسەلەلەردە قاۋىمداستىق پەن پارتيانىڭ ۇستانعان باعىتىنىڭ ورتاق ەكەنىنە كوز جەتكىزدىك. بۇگىنگى ىنتىماقتاستىق مەموراندۋمى ارقىلى «اۋىل پارتياسىنىڭ» الەۋەتى ارتىپ، اۋىل شارۋاشىلىعىنىڭ دامۋىنا قوسار ۇلەسىمىز ەسەلەنە تۇسەدى دەپ ۇمىتتەنەمىن»، - دەدى «اۋىل» پارتياسىنىڭ توراعاسى ءالي بەكتاەۆ «اگرارلىق سالانى دامىتۋ – ورتاق مۇددەمىز» اتتى بىرلەسكەن وتىرىستا.

ونىڭ ايتۋىنشا، الەمدى جايلاعان كوروناۆيرۋس ىندەتى اگرارلىق سەكتوردىڭ، ازىق-تۇلىك قاۋىپسىزدىگىنىڭ ماڭىزدىلىعىن ايقىنداپ بەردى.

«ءدال قازىر ادامعا قىمبات كولىكتىڭ دە، قىمبات كيىمنىڭ دە كەرەگى جوق. ەڭ نەگىزگىسى – دەننىڭ ساۋلىعى. ەلدى ەتپەن دە، سۇتپەن دە، نانمەن دە قامتاماسىز ەتىپ وتىرعان سول اۋىلدىڭ بەرەكەلى تىرلىگى، ەرەن ەڭبەگى. وتىز جىلدىڭ ىشىندە ەكونوميكامىزدىڭ شيكىزاتقا تاۋەلدىلىك قۇرساۋىنان شىعا الماي قالعانى جاسىرىن ەمەس. باسقاسىن ايتپاعاندا، قازاقستاننىڭ اۋىلشارۋاشىلىق ءوندىرىس كەشەنىن دامىتۋعا الەۋەتى جەتكىلىكتى. مال باعىپ، جەر ەمگەن اتا كاسىبىمىزدى قايتا جاڭعىرتىپ، وڭدەۋ ونەركاسىبىن دەرەۋ جانداندىرۋىمىز قاجەت»، - دەدى پارتيا توراعاسى.

ءوز كەزەگىندە «قازاقستان فەرمەرلەرى قاۋىمداستىعى» ربك باسقارما توراعاسى جيگۋلي دايراباەۆ: «بۇگىندە ەلىمىزدەگى ءاربىر اۋداندا فەرمەرلەر قاۋىمداستىعى جۇمىس ىستەيدى. نەگىزگى ماقساتىمىز – اۋىل الەۋەتىن كوتەرۋ. مەنىڭ ايتايىن دەگەنىم، سوڭعى جىلدارى «كەلەشەگى جوق اۋىلدار» دەگەن حالىققا جاعىمسىز شەشىم قابىلداندى. كەيبىر دەرەكتەرگە سۇيەنسەك، 1100 اۋىل كەلەشەگى جوق دەگەن جەلەۋمەن وڭتايلانىپ، ءىرى اۋىلدارعا، قالاعا كوشىرىلىپ جاتىر. بۇل دۇرىس ەمەس. ءبىزدىڭ قازاقتىڭ تامىرى اۋىلدا. ەكى وتباسى تۇراتىن اۋىل بولسا دا، سول اۋىلدىڭ جاعدايى جاسالۋى كەرەك. وسى ماسەلەنى قولعا الساق پا دەپ وتىرمىز. اۋىلدى كوركەيتپەي، مەملەكەتتىڭ جاعدايى وڭالادى دەپ ايتۋ قيىن. اۋىلدا تۇرۋ ءۇشىن اۋىل ەڭبەككەرلەرىنە تياناقتى جاعداي جاسالۋى كەرەك. ءبىلىم، مادەنيەت، سپورت سىندى قاي سالانى الساق تا، قالادان كەم تۇرماۋى كەرەك»، - دەدى ج. دايراباەۆ.

مەموراندۋمعا قول قويۋ راسىمىندە «اۋىل» پارتياسىنىڭ توراعاسى ءالي بەكتاەۆ «قازاقستان فەرمەرلەرى قاۋىمداستىعىنان» قابىلدانعان پارتيانىڭ جاڭا مۇشەلەرىنە پارتيالىق بيلەتتەردى تابىس ەتتى. «قازاقستان فەرمەرلەرى قاۋىمداستىعىنىڭ» باسقارما توراعاسى مەن ورىنباسارلارى، اتقارۋشى ديرەكتورى جانە ايماقتىق فيليالدارىنىڭ توراعالارى سالتاناتتى راسىممەن «اۋىل» پارتياسىنىڭ قاتارىنا قابىلداندى.

Abai.kz