گرۋزيا پرەمەر-ءمينيسترى گەورگي گاحاريا ەلدە كوروناۆيرۋس پاندەمياسىنىڭ ەكىنشى تولقىنى باستالعانىن مالىمدەدى. 

10 قىركۇيەك كۇنى گرۋزيادا 57 ادام COVID-19-بەن اۋىرىپ، ەڭ جوعارى تاۋلىكتىك كورسەتكىش تىركەلگەن. سوڭعى مالىمەتتەر بويىنشا، ناۋقاستاردىڭ سانى 1830 ادامعا جەتىپ، 19 ادام قايتىس بولعان.

«بۇگىنگى 57 جانە كەشەگى 44 جاعداي ەلدەگى ەپيدەميولوگيالىق جاعداي بىرتىندەپ وزگەرىپ جاتقانىن كورسەتىپ وتىر. ءبىز ەكىنشى تولقىن بولادى دەپ بولجادىق جانە بۇل پروتسەسس باستالىپ كەلە جاتىر. كۇزدە بولادى دەپ ەسەپتەدىك، كۇزدە باستالدى. باستىسى دۇربەلەڭگە ەش سەبەپ جوق. سەبەبى ءبىز جاعدايدى تولىعىمەن باقىلاۋعا الىپ وتىرمىز»، - دەدى گاحاريا.

10 قىركۇيەكتەن باستاپ ەلدە مەرەيتوي، ۇيلەنۋ تويى، باسقا دا ءىس-شارا ۇيىمداستىرۋعا تىيىم سالىنعان.

1 قازاندا اشىلادى دەپ جوسپارلانعان تەاتر، كينوتەاتر جانە بالالاردىڭ ويىن-ساۋىق ورتالىعىنىڭ اشىلۋى 1 قاراشاعا اۋىستىرىلعان.

ال گرۋزيانىڭ دەنساۋلىق ساقتاۋ ءمينيسترىنىڭ ورىنباسارى تامار گابۋنيا مەملەكەت كوروناۆيرۋستىڭ تاراۋ كورسەتكىشى بويىنشا جاسىل ايماقتان سارى ايماققا وتكەنىن مالىمدەدى.

Abai.kz