جۇما, 29 ناۋرىز 2024
وزگەلەر 5142 24 پىكىر 11 قىركۇيەك, 2020 ساعات 13:36

ليتۆا تيحانوۆسكايانى بەلارۋس پرەزيدەنتى دەپ تانىدى

ءبارىمىز بىلەتىندەي بەلارۋس ەلىندە 9 تامىزدا پرەزيدەنت سايلاۋى ءوتىپ، سوڭى نارازىلىققا ۇلاسقان ەدى. بەلارۋس وسك ۇسىنعان قورىتىندىسى بويىنشا، الەكساندر لۋكاشەنكو 80,1 پايىز، ونىڭ باستى قارسىلاسى سۆەتلانا تيحانوۆسكايا 10,1 پايىز داۋىس العان. بىراق حالىق بۇل ناتيجەگە ءمۇلد سەنگەن جوق. 

تۇتاس ەل كولەمىندە نارازىلىق اكتسيالارى ءوتتى. وعان العاشقىدا جۇزدەگەن، كەيىن مىڭداعان ءتىپتى ءجۇز مىڭداعان ازاماتتار قاتىستى.

بىراق لۋكاشەنكو باستاعان بەلارۋس بيلىگى بۇعان بولا سايلاۋ ناتيجەسىن جوققا شىعارعان جوق. قايتا كۇشتىك قۇرىلىمداردى جۇمىلدىرىپ، بەيبىت اكتسياعا قاتىسۋشىلارعا قىسىم كورسەتتى، كۇش قولداندى. جۇزدەگەن ادام ءتۇرلى دەڭگەيدە جاراقات الىپ، 1 ادام قايتىس بولعان. مىڭعا جۋىق ادام تۇتقىندالىپ، حالىقارالىق قاۋىمداستىقتاردىڭ ارالاسۋىنان كەيىن بوساتىلعان.

سايلاۋدا لۋكاشەنكونىڭ باستى وپپونەنتى بولعان سۆەتلانا تيحانوۆسكايا دا العان بەتىنەن قايتقان جوق. ول حالىققا ۇندەۋ جاساپ، «ۇلتتىق ليدەر» بولۋعا دايىن ەكەنىن مالىمدەدى. ءتىپتى كوپتەگەن ەل لۋكاشەنكونىڭ جەڭىسىن ءالى تولىق مويىنداعان جوق.

ءبىز بۇعان دەيىن «لۋكاشەنكونىڭ «جەڭىسىن» كىمدەر مويىندادى، كىمدەر جوق؟» اتتى ماقالا جازعان ەدىك. وندا بەلارۋستەگى سايلاۋ ناتيجەسىنە الىس-جۋىق شەتەل باسشىلارىنىڭ كوزقاراسى تولىق كورسەتىلدى. سول تىزىمدە لۋكاشەنكونىڭ «جەڭىسىن» مويىنداماعان ليتۆا بولاتىن.

ليتۆا پرەزيدەنتى گيتاناس ناۋسەدا «مەن لۋكاشەنكونى ءالى دە لەگيتيمدى پرەزيدەنت دەپ ەسەپتەمەيمىن. ويتكەنى، بەلارۋستە دەموكراتيالىق سايلاۋ جوق»، - دەپ مالىمدەگەن ەدى.

سويتكەن ليتۆا ەلىنىڭ سەيمى (پارلامەنت) 10 قىركۇيەكتە سۆەتلانا تيحانوۆسكايانى بەلارۋس پرەزيدەنتى دەپ تانيتىن قاراردى شىعاردى.

«كورشىلەس بەلارۋس ەلىندەگى جاعدايعا بايلانىستى سەيم حالىقارالىق قوعامداستىقتى سۆەتلانا تيحانوۆسكايانى جانە ونىڭ باستاماسىمەن قۇرىلعان ۇيلەستىرۋ كەڭەسىنىڭ تالابىن جاڭا اشىق جانە دەموكراتيالىق پارلامەنتتىك سايلاۋ تۋرالى بەلارۋس حالقىنىڭ جالعىز زاڭدى وكىلدەرى رەتىندە قولداۋعا شاقىردى», - دەلىنگەن قۇجاتتا.

ليتۆانىڭ زاڭ شىعارۋشى ورگانى حالىقارالىق قاۋىمداستىقتان رەسەيدىڭ بەلارۋستىڭ ىسىنە ارالاسپاۋىن سۇرادى.

سونداي-اق، قاراردا حالىقارالىق قاۋىمداستىققا بەلارۋس حالقى مەن ونىڭ زاڭدى وكىلدەرىنە ءارتۇرلى ساياسي، ەكونوميكالىق، قارجىلىق جانە ۆيزالىق جەڭىلدىك پەن باسقا دا كومەك كورسەتۋ شارالارى تۋرالى ۇسىنىس جازىلعان.

قاراردىڭ قابىلدانۋىنا سەيمنىڭ 91 مۇشەسى داۋىس بەرگەن. ونىڭ ىشىندە، سپيكەر ۆيكتوراس پرانتسكەتيس، سىرتقى ىستەر ءمينيسترى ليناس لينكياۆيچيۋس جانە بارلىق پارلامەنتتىك فراكتسيا وكىلدەرى بار.

الەكساندر لۋكاشەنكونىڭ سايلاۋدا ادىلەتسىزدىك جاساعانىن، نارازىلىققا شىققان ازاماتتارعا قىسىم كورسەتكەنىن ايىپتاپ جاتقان حالىقارالىق ۇيىمدار از ەمەس. ال اقش جۇرتى بەلارۋستە ادام قۇقىعىن بۇزۋ جانە قۋدالاۋ فاكتىلەرىنە قاتىسى بار رەسمي تۇلعالارعا سانكتسيا سالۋدى جوسپارلاپ جاتىر. بۇل تۋرالى اقش مەملەكەتتىك حاتشىسى مايك پومپەو مالىمدەدى.

Abai.kz

24 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3601