كەزىندە پارلامەنت ءماجىلىسىنىڭ جانىنداعى «Nur Otan» پارتياسى فراكتسياسىنىڭ بەلگىلى مەملەكەت جانە قوعام قايراتكەرى قۋانىش سۇلتانوۆ باستاعان ءبىر توپ دەپۋتاتى الماتىداعى شاكەن ايمانوۆ اتىنداعى «قازاقفيلم» كينوستۋدياسىن جەكەشەلەندىرۋگە قارسى شىعىپ، ۇكىمەتكە دەپۋتاتتىق ساۋال جولداعان بولاتىن. ءسويتىپ بۇل قاۋىپ بۇلتى ءسال دە بولسا سەيىلگەندەي ەدى.

بۇگىن پارلامەنت ءماجىلىسى قابىلداعان «مادەنيەت تۋرالى» زاڭعا وزگەرىستەر ەنگىزۋ جايلى زاڭ جوباسىندا وسى ماسەلە تۇپكىلىكتى شەشىمىن تاۋىپ وتىر. اتاپ ايتقاندا، مەملەكەتتىك مادەنيەت ۇيىمدارى جانە مەملەكەت ءجۇز پايىز قاتىساتىن مادەنيەت ۇيىمدارى يەلىكتەن شىعارىلۋعا جاتپايتىندىعى تايعا تاڭبا باسقانداي انىق ەتىپ جازىلدى.

وتكەن عاسىردىڭ اياق شەنىندە اۋىلدارداعى كلۋبتار مەن مادەنيەت ۇيلەرى جاپپاي جەكەشەلەندىرىلىپ كەتكەن بولاتىن. قازىر ولاردىڭ كوپشىلىگىنىڭ جۇرتى عانا وپىرايىپ جاتىر. سونىڭ ىشىندە مەنىڭ ارقاما ءالى كۇنگە ايازداي باتاتىنى – سولتۇستىك قازاقستان وبلىسى ايىرتاۋ اۋدانىنىڭ سىرىمبەت اۋىلىنداعى، ءدال الدىندا شوقان ءۋاليحانوۆتىڭ ەسكەرتكىش ءمۇسىنى ورناتىلعان ءزاۋلىم مادەنيەت ءۇيىن ءبىر كاسىپكەر ارزانعا ساتىپ الىپ، كەيىن تاس-تالقان ەتىپ بۇزىپ، قۇرىلىس ماتەريالى رەتىندە پايدالانعاندىعى. ونىڭ جۇرتىندا جالعىزسىراپ قالعان ەسكەرتكىش ءمۇسىندى كەيىن باسقا ورىنعا اپارىپ، قايتا ورناتۋعا تۋرا كەلگەن...

ەندى مەملەكەت مەنشىگىندەگى كينوستۋديامىز بەن تەاترلارىمىز تالاي اۋىلداعى وتى ءبىرجولا وشكەن كلۋبتار مەن مادەنيەت ۇيلەرىنىڭ جولىن قۇشپاۋعا ءتيىستى.

كارىباي مۇسىرمان

Abai.kz