"اتا مەكەن" پارتياسىنىڭ ليدەرى 10 قازاندا وسك-عا مانداتىن قايتارۋدى سۇراپ، ءوتىنىش تۇسىرگەن.
2019 جىلدىڭ 21 تامىزىندا جوعارعى سوت قايتا اشىلعان جاعدايعا بايلانىستى ومىربەك تەكەباەۆ پەن دۋيشەنكۋل چوتونوۆتىڭ ءىسىن قايتا قاراۋعا بىشكەكتەگى ءبىرىنشى ماي اۋداندىق سوتىنا جىبەرگەن.
2017 جىلى رەسەيلىك كاسىپكەر لەونيد ماەۆسكيدىڭ ساياساتكەرگە 1 ملن دوللار پارا بەردىم دەگەن شاعىمى بويىنشا، ومىربەك تەكەباەۆ 8 جىلعا باس بوستاندىعىنان ايىرىلعان. ساياساتكەردىڭ ءوزى سول كەزدەگى پرەزيدەنت المازبەك اتامباەۆ تاراپىنان قۋعىندالدىم دەگەن.
كەيىن ءبىرىنشى ماي اۋداندىق سوتى ساياساتكەردى ۇيقاماققا اۋىستىرىپ، ءىسىن قايتا قاراۋعا كىرىسكەن.
ومىربەك تەكەباەۆ سوورونباي جەەنبەكوۆتىڭ وتستاۆكاسىنا بايلانىستى جاڭا پارلامەنت سايلاۋىن وتكىزگەننەن كەيىن بارىپ بيلىكتەن كەتۋى كەرەك ەدى دەپ ەسەپتەيدى.
"سايلاۋ كەزىندە ءبارى مويىندايتىن زاڭدى ورگان قاجەت. وكىنىشكە قاراي، پرەزيدەنت وتستاۆكاعا كەتەتىنىن ايتتى. ەندى قايتادان پرەزيدەنت سايلاۋىن وتكىزۋىمىز كەرەك. بۇعان بيۋدجەتتەن قارجى جەتپەيدى. سايلاۋ جاڭا جىلعا دەيىن ءوتۋى ءتيىس. قازىر ەندى ۋاقىتشا ۇكىمەت بارلىق جاۋاپكەرشىلىكتى وزىنە الۋى ءتيىس",- دەدى تەكەباەۆ.
