«مەن كوردىم، دۇنيە دەگەن ءيتتىڭ ك...ن»
اباي
«اتا جاۋىم سەن ەدىڭ، قاس دۇشپانىڭ مەن ەدىم»
ماحامبەت
«استىمدا القوڭىرىم جەلمەدىڭ عوي،
قۇدايىم سۇراعاندى بەرمەدىڭ عوي»
سۇلۋباي باتىر
«كۇرەسۋگە دارمەن جوق ەمەس، كوزدى تارس جۇمىپ كولگە سەكىرەتىن ەرلىك جوق»
ورالحان بوكەي

«مەن كوردىم، دۇنيە دەگەن ءيتتىڭ ك...ن»
اباي
«اتا جاۋىم سەن ەدىڭ، قاس دۇشپانىڭ مەن ەدىم»
ماحامبەت
«استىمدا القوڭىرىم جەلمەدىڭ عوي،
قۇدايىم سۇراعاندى بەرمەدىڭ عوي»
سۇلۋباي باتىر
«كۇرەسۋگە دارمەن جوق ەمەس، كوزدى تارس جۇمىپ كولگە سەكىرەتىن ەرلىك جوق»
ورالحان بوكەي

ءتورت قۇبىلاسى ساي، ءتورت تۇلىگى تۇگەل قۇنانباي سۇلتاننىڭ بالاسى يبراھيم مىرزا دۇنيەنىڭ ارتىن كورسە، كورگەن شىعار. ال، ءبىز قۇدايدىڭ قۇتتى كۇنى كورىپ كورىپ ءجۇرمىز. كەشە تاعى كوردىك. داۋسى جەر تۇبىنەن شىققانداي قۇمىققان قالىڭ قازاقتىڭ داۋىسى يت-قۇس تيگەن قويداي قىرىلىپ، سايلاۋ ۋچاسكەلەرىندەگى ۋرنالارىنا توعىتىلىپ جاتقاندا، ءاي، دەگەن ادام كورمەي دۇنيە تاعى دا ارتىن الدىمىزعا توستى.
يا ىزدەۋشىسى يا سۇراۋشىسى جوق كوپ داۋىستىڭ 7,19-ىن، بيۋللەتەندى توركىنەن كەلگەن قۇندى قاعازداي قۇنىعا ساناعاندار كوممۋنيستتەرگە ءبولىپ بەرىپتى.
كوممۋنيستەر كىم ەدى؟ ساناسى سۋالعان وڭشەڭ شۋىلداق.
1916 جىلعى كوتەرىلىستە قازاقتىڭ قانىنىڭ ۇستىنە ورناپ، 1921-22-ءنشى جىلدارى 1 ملن.-عا جۋىق قازاقتى اشتان قىرعان - كوممۋنيستەر!
1927-1930-نشى جىلدارى «اسىرا سىلتەۋ بولماسىن، اشا تۇياق قالماسىن» دەپ ۇرانداتىپ قازاقتىڭ تىشقاق لاعىنا دەيىن تارتىپ الىپ، تابانىن ءتىلىپ، توزدىرىپ، اركىمنىڭ بوساعاسىنان سىعالاتىپ، جەر اۋدارىپ، ايداپ، اسىپ اتامەكەنىنەن اسىرا قۋعان - كوممۋنيستەر!
1931-1933-ءنشى جىلدارى 4 ملن. قازاقتى قاسقانا اشارشىلىققا ۇشىراتىپ، اتا-باباڭنىڭ سۇيەگىن كومۋسىز، ايدالادا اقسوڭكە عىپ تاستاعان  - كوممۋنيستەر!
1937-1938-ءنشى جىلدارى قازاقتىڭ باسىن كەسىپ، قايماعىن سىلىپ الىپ، تۇلعاسىز تۇل قالدىرعان - كوممۋنيستەر!
ەكىنشى دۇنيەجۇزىلىك سوعىستا ورىس يمپەرياسى ءۇشىن سوعىستا شەيىت بولعان قىرشىن قازاقتىڭ ورىندالماعان ارمانى، جىلاعان جەتىمنىڭ كوز جاسى، قارا جامىلعان جەسىرلەردىڭ زارى مەن ءومىرىن ويران ەتكەن وكسىگى - كوممۋنيستتەردىڭ موينىندا.
1949 جىلى اتوم بومباسىن جارىپ، ءبۇتىن ەلدى ماڭگىلىك مۇگەدەك ەتكەن - كوممۋنيستتەر!
1954 جىلى تىڭ يگەرەمىز دەپ تىراشتانىپ، ماڭ دالاڭنىڭ استىن ۇستىنە شىعارىپ، باباڭ جاتقان مولانى كۇرەپ تاستاعان، ورىستىڭ ويدان قىردان قاشقان قىلمىسكەرى مەن القاشىن اكەلىپ ەلدى توزدىرعان - كوممۋنيستتەر!
1986 جىلى الماتىنىڭ الاڭىندا قىزىڭدى شاشىن سۇيرەپ، «قازاق تاپپايسىڭ»، دەپ كوك مۇزدىڭ ۇستىنە وتىرعىزىپ، ۇلىڭدى قاراقۇسىنان ۇرىپ قانسىراتىپ قىرعان - كوممۋنيستتەر!
ءاليحاندى، احمەتتى، مىرجاقىپتى، سماعۇلدى، جۇسىپبەكتى، بەيىمبەتتى ناقاق اتقان  - كوممۋنيستەر!
شاكارىمدى اتىپ، قۇرقۇدىقتىڭ تۇبىندە وتىز جىل سۇيەگىنە تەلمىرتىپكىزىپ، العىزىپ ارۋلاپ جەرلەتكىزبەگەن، ەلۋ جىل شىعارماسىن ەلىنە وقىتپاعان - كوممۋنيستتەر!
سول كوممۋنيستەر تاۋەلسىز ەلىڭنىڭ ەڭ بيىك تورىنەن ءومىرىڭدى ولشەپ پىشەتىن زاڭ شىعارماق. ماجىلىسمەن اتانىپ، بيلىكتىڭ ۇشار باسىنا جايعاسىپ جاتىر.
مىنە، قازاقتىڭ قارعىسى مەن قانىن ارقالاعان كوممۋنيستەر ەندى تاعى دا توبەڭدە اڭگىر تاياق ويناتپاق. سامايىن اق قىراۋ شالعان قارت كوممۋنيستتەر مەن قانمەن اۋىزدانعان بولتىرىك كومسومولدار تاعدىرىڭدى تالكەك، تۋعان ەلىڭنىڭ تۋ-تالاقايىن شىعارىپ جاتىر.
ءتىرى پەندە قاندى كەگىم بار دەپ قارسى شىقتى ما؟! جوق. «كۇرەسۋگە دارمەن جوق ەمەس، كوزدى تارس جۇمىپ كولگە سەكىرەتىن ەرلىك جوق». قاۋقارسىز قالىڭ شۋىلداق.
ال، كۇنى ءۇشىن جۇرگەن قۋلار مەن شۇلعاۋدان شىققان شۋاشتار، تورىڭدەگى تاباعىڭدى  تەۋىپ كەتكەن تەكسىزدەر ۇلان-اسىر توي جاساپ، استانانى اراق ساسىتىپ، كوممۋنيستتەردىڭ ولمەگەنىن كورىپ، جۇرەكتەرى جارىلىپ قۋانىپ جاتىر. ەندى، ءدال باياعىداي بۇقاباي بيشىگىن ءۇيىرىپ، جىندىباەۆ جانىڭدى شىرقىراتادى.
اتاڭ نالەت، كوممۋنيست - اتا جاۋىم سەنسىڭ! قاس دۇشپانىڭ - مەنمىن! ەكى دۇنيەدە قولىم سەنىڭ جاعاڭدا كەتەدى. قۇدايىم سۇراعاندى بەرگەن كۇنى كوزىڭە كوك شىبىن ۇيمەلەتىپ، ءادىل سوتتىڭ الدىندا سازايىڭدى بەرەرمىن! قاندى كەگىمدى قايتارارمىن! وسى ءسوزىم - ءسوز.
مەن ايتتىم، قالعان قازاق قانى بار بولسا، قاسقايىپ تۇرار!
«اباي-اقپارات»