ەمومالي راحمون قولىن كونستيتۋتسياعا قويىپ، تاجىكستان حالقىنا انت بەردى.

تاعى جەتى جىلعا سايلانعان پرەزيدەنت تاجىكستاندى ەنەرگەتيكالىق تاۋەلسىزدىككە جەتكىزىپ، كوممۋنيكاتسيالىق تىعىرىقتان شىعارۋعا ۋادە بەردى. بۇعان قوسا ول ەلدىڭ ازىق-تۇلىك قاۋىپسىزدىگىن قامتاماسىز ەتۋدى كوزدەپ وتىر.

تاجىكستان باسشىسى سوڭعى جىلدارى ەلدىڭ جالپى ىشكى ءونىمى وسكەنىن، كەدەيشىلىك الدەقايدا ازايعانىن مالىمدەدى. الايدا بيلىك باسەكەلەستەرى تاجىكستان ەكونوميكاسىنىڭ جاعدايى مۇشكىل دەپ وتىر.

ەمومالي راحمون كوشى-قون ماسەلەسىنە دە توقتالدى. ونىڭ ايتۋىنشا، شەتەلدە جۇرگەن ەڭبەك ميگرانتتارى 1, 1 ميلليوننان 460 مىڭعا ازايدى. دەگەنمەن، رەسەي بيلىگىنىڭ مالىمەتىنشە، بۇل ەلدە 1 ميلليوننان استام تاجىك ميگرانتى بار.

يناۋگۋراتسيا سالتاناتى 30 قازاندا تاڭەرتەڭ باستالدى. ورتالىق سايلاۋ كوميسسياسىنىڭ باسشىسى باحتيور حۋجدويورزودا ەمومولي راحمونعا تاجىكستان پرەزيدەنتى كۋالىگىن تاپسىردى. ودان سوڭ كونستيتۋتسيالىق سوت توراعاسى وعان پرەزيدەنت بيلىگىنىڭ بەلگىسىن تابىس ەتتى.

ەسكە سالايىق، تاجىكستاندا پرەزيدەنت سايلاۋى 11 قازاندا ءوتتى. وعان بەس كانديدات قاتىستى. وسك مالىمەتى بويىنشا، ەمومالي راحمون سايلاۋشىلاردىڭ 90 پايىزدان استام داۋىسىنا يە بولعان.

حالىقارالىق باقىلاۋشىلاردىڭ پىكىرىنشە، تاجىكستاندا ءبىر دە ءبىر سايلاۋ حالىقارالىق ستاندارتتارعا ساي، ءادىل وتكەن ەمەس.

Abai.kz