ارمەنيا پرەمەر-ءمينيسترى نيكول پاشينيان ءازىربايجان جانە رەسەي پرەزيدەنتتەرىمەن بىرگە قاراباقتاعى سوعىستى توقتاتۋ تۋرالى مالىمدەمەگە قول قويعانىن ايتتى. ونىڭ ايتۋىنشا، بۇل ول ءۇشىن وتە قيىن شەشىم بولدى.

«قۇرمەتتى وتانداستار. مەن ءوزىم ءۇشىن جانە ءبارىمىز ءۇشىن وتە قيىن شەشىم قابىلدادىم. رەسەي مەن ءازىربايجان پرەزيدەنتتەرىمەن قاراباق سوعىسىن توقتاتۋ تۋرالى مالىمدەمەگە قول قويدىم. قازىردىڭ وزىندە جاريالانعان مالىمدەمەنىڭ ءماتىنى مەن ءۇشىن جانە ءبىزدىڭ حالقىمىز ءۇشىن وتە اۋىر»، - دەپ جازدى پاشينيان ءوزىنىڭ Facebook پاراعىندا.

ول بۇل شەشىمدى اسكەري جاعدايدى «تەرەڭ تالداۋ» ناتيجەسىندە جانە ونى ەڭ جاقسى بىلەتىن ادامدارعا باعالاۋ ناتيجەسىندە قابىلداعانىن باسا ايتتى.

«بۇل جەڭىس ەمەس، بىراق ءسىز جەڭىلگەنىڭىزدى مويىندامايىنشا جەڭىلىس بولمايدى. ءبىز ەشقاشان جەڭىلگەنىمىزدى مويىندامايمىز جانە بۇل ءبىزدىڭ ۇلتتىق بىرلىك پەن جاڭعىرۋ ءداۋىرىمىزدىڭ باستاۋى بولۋى كەرەك. ءبىز ءوزىمىزدىڭ بولاشاعىمىزدى جوسپارلاۋ جانە وتكەندەگى قاتەلىكتەردى قايتالاماۋ ءۇشىن تاۋەلسىزدىك جىلدارىمىزدى تالداۋىمىز كەرەك»، - دەپ قوستى ارمەنيا پرەمەر-ءمينيسترى.

ول قول قويىلعان مالىمدەمەنىڭ ەگجەي-تەگجەيىن جاريا ەتپەدى. ءازىربايجان مەن رەسەي پرەزيدەنتتەرىنىڭ سايتىندا دا اقپارات جوق.

1991 جىلى تاۋلى قاراباق ارمەنيانىڭ قولداۋىمەن ازەربايجاننان تاۋەلسىزدىگىن جاريالادى. بۇل 1994 جىلعا دەيىن سوزىلعان سوعىس قيمىلدارىنا اكەلدى. قارۋلى قاقتىعىس بىتىمگەرشىلىك پەن اتىستى توقتاتۋ تۋرالى بىشكەك حاتتاماسىنا قول قويۋمەن اياقتالدى، بىراق ارا-تۇرا تاراپتار اراسىندا قارۋلى قاقتىعىستار باستالادى.

جانجال كەزىندە وبلىستا 30 مىڭنان استام ادام قازا تاپتى. ءازىربايجان تاۋلى قاراباقتى ارمەنيا باسىپ العان تەرريتوريا دەپ سانايدى. 2020 جىلدىڭ 27 قىركۇيەگىندە تاۋلى قاراباقتا سوڭعى جىلدارداعى ەڭ ۇلكەن جانجال باستالدى.

ءازىربايجاننىڭ قورعانىس مينيسترلىگى ارمەنيانى «اۋقىمدى ارانداتۋشىلىق جاسادى»، ءازىربايجان ارمياسىنىڭ پوزيتسيالارىن وق جاۋدىردى دەپ ايىپتاپ، «جەدەل قارسى شابۋىل» باستالعانىن جاريالادى. ارمەنيا بيلىگى ءوز كەزەگىندە ءازىربايجان اسكەرى تاۋلى قاراباققا شابۋىل جاساۋدى باستاعانىن مالىمدەدى.

قاقتىعىس كەزىندە تاراپتار تانكىلەردى، اۋىر ارتيللەريانى جانە اۆياتسيانى پايدالانادى. ولتىرىلگەن جانە جارالانعان ساربازدار مەن بەيبىت تۇرعىندار تۋرالى حابارلار بولدى. اسكەري جاعداي ارمەنيادا دا، ءازىربايجاننىڭ كەيبىر ايماقتارىندا دا ەنگىزىلدى. قاقتىعىسقا قاتىسقان ەكى ەل دە جۇمىلدىرۋ تۋرالى جاريالادى.

تاۋلى قاراباحتاعى بىتىمگەرشىلىك تۋرالى كەلىسىمدەر بىرنەشە رەت جاسالدى، بىراق ءار ۋاقىتتا ولار بۇزىلدى. 9 قازاندا ماسكەۋدە كەلىسسوزدەر كەزىندە ءازىربايجان مەن ارمەنيا وكىلدەرى تاۋلى قاراباحتا 10 قازان 12:00-دەن باستاپ اتىستى توقتاتۋ تۋرالى كەلىسىمگە كەلدى. الايدا، ءبىتىم باستالعاننان كەيىن ەكى تاراپ ءبىر-ءبىرىن ونى بۇزدى دەپ ايىپتادى.

9 قاراشادا تاۋلى قاراباح «بيلىگىنىڭ» وكىلى ۆاحرام پوگوسيان مويىندالماعان تاۋلى قاراباح رەسپۋبليكاسىنىڭ ارمياسى شۋشا قالاسىن باقىلامايتىنىن، ال ءازىربايجان اسكەرلەرى قاراباح استاناسى ستەپاناكەرتتىڭ شەتىندە ەكەنىن ايتتى. ءازىربايجان قورعانىس مينيسترلىگى ءوزىنىڭ يۋتۋب كانالىندا ءازىربايجان اسكەرى باسىپ العان قالانىڭ كادرلارىن جاريالادى.

كەرىمسال جۇباتقانوۆ،

قازاق-ورىس حالىقارالىق ۋنيۆەرسيتەتىنىڭ دوتسەنتى، تاريح عىلىمدارىنىڭ كانديداتى

Abai.kz