قانداي ۇسىنىس بولسىن ونىڭ ورىندى نە ورىنسىز ەكەنىن كورسەتەتىن ءبىر عانا سيپاتتاما بار. ول ۇسىنىستان نە وزگەرەدى؟ (قاراپايىم تىلمەن ايتقاندا ول ۇسىنىستان حالىققا، ەلگە، ازاماتقا، وزىڭە نە پايدا؟).

ەندى سوڭعى كۇندەرى مەنى تەگتەپ كوپ ازامات تولقۇجاتىمدا ۇلتتى وزگەرتسەم، قارسى ەمەس ەكەنىن، ءتىپتى "سەن وزگەرتسەڭ رۇقسات" دەپ جازىپ جاتىر. وعان قارسى ويلار دا ايتىلىپ ءجۇر، ورىندى دەپ ويلايمىن. بارلىقتارىڭىزعا راحمەت، بىرىڭىزگە سەنىم ءۇشىن، باسقالارعا اشىق ويلار ءۇشىن.

وسى ساتتە بارلىعىمىز ءبىر سۇراققا جاۋاپ ىزدەيىكشى: ۇلتتى تولقۇجاتتا وزگەرتسەك، نە وزگەرەدى؟ ناقتى ءتىزىپ بەرسەڭىزدەر. ەلدە، حالىقتا،قازاق دالاسىن مەكەندەگەن ءاربىر ازاماتتا نە وزگەرىس بولادى؟ ەگەر مەن شاتاسسام ايتىڭىزدار.

ال مەنىڭشە وزگەرىس بولمايدى. قازاق ءتىلىن بىلمەيتىندەر قازاقشا سويلەپ كەتپەيدى، جەمقورلار جويىلىپ كەتپەيدى، ەكونوميكا قارقىندى دامىپ كەتپەيدى، تەڭگە باعامى دوللارمەن تەڭ بولىپ كەتپەيدى. سولاي ما؟ ال ولاي بولسا، ءپوپۋليزمدى ىسىرىپ تاستاپ، ەلگە پايدالى ۇسىنىس جاسايىق.

راحمەت، ورىس بولىپ ءجۇرىپ تۋعان جەرىمدى قۇرمەتتەپ جۇرە بەرسەم رۇقسات شىعار؟ كوبىمىز جاراتۋشىنىڭ بەرگەن ۇلتىمەن، ءپاتريوتيزمدى شاتاستىرعان سەكىلدىمىز. موينىمىزعا جاراتۋشىنىڭ ءىسىن ەمەس، ادامنىڭ قولىنان كەلەتىن، ەلگە پايدالى دۇنيەمەن اينالىسايىق.

ماكسيم ءروجيننىڭ جازباسى

Abai.kz