مىسىردا اباي قۇنانبايۇلىنىڭ 175 جىلدىعىنا ارنالعان شىعارماشىلىق كەش ءوتتى. بۇل تۋرالى قر مىسىر اراب رەسپۋبليكاسىنداعى ەلشىلىگى مالىمدەدى. 

15 قاراشا كۇنى ۇلى اقىن، جاڭا قازاق ادەبيەتىنىڭ نەگىزىن قالاۋشى حاكىم اباي قۇنانبايۇلىنىڭ شىعارمالارىن مىسىر وقىرماندارى مەن كوپشىلىك اراسىندا كەڭىنەن ناسيحاتتاۋ ماقساتىندا كايردە قازاقستان رەسپۋبليكاسىنىڭ ەلشىلىگى مەن قازاقستاننىڭ ۇلتتىق اكادەميالىق كىتاپحاناسى بىرلەسە وتىرىپ، اقپاراتتىق-تانىمدىق ءىس-شارا ۇيىمداستىردى.

دەلەگاتسياسى قۇرامىنا قازاق زيالى قاۋىم وكىلدەرى نۇر-سۇلتان قالاسىنداعى قر ۇلتتىق اكادەميالىق كىتاپحاناسىنىڭ ديرەكتورى ءۇمىتحان مۇڭالباەۆا، م.اۋەزوۆ اتىنداعى مادەنيەت جانە ونەر ينستيتۋتىنىڭ ديرەكتورى كەنجەحان ماتىجانوۆ، قازاقستان جازۋشىلار وداعى توراعاسىنىڭ ورىنباسارى باۋىرجان جاقىپ، الماتى قالاسى ورتالىقتاندىرىلعان كىتاپحانالار جۇيەسىنىڭ ديرەكتورى روزا كابيەۆا، ۇلتتىق اكادەميالىق كىتاپحاناسىنىڭ قورلاردى قالىپتاستىرۋ قىزمەتى باسشىسىنىڭ ورىنباسارى زاۋرە مايشينا مەن باسىلىمدار ءبولىمىنىڭ مەڭگەرۋشىسى ساۋلە ءجۇسىپوۆا ەندى.

مىسىر پارلامەنتى سەناتىنىڭ توراعاسى ابدەل ۋاحاب ابدەل رازىق، جوعارعى كونستيتۋتسيالىق سوتىنىڭ توراعاسى سايد مارەي، مىسىر اقپارات ءمينيسترى ۋساما حەيكال مەن ادىلەت ءمينيسترى ومار مارۋان، مينيسترلەر كەڭەسى باس حاتشىسىنىڭ ۇكىمەتپەن بايلانىس جونىندەگى ورىنباسارى تاريق كاميل بادر، سىرتقى ىستەر ءمينيسترىنىڭ ورىنباسارلارى حاتيم ءتاج ءاد-دين مەن شەريف يسا، سونداي-اق مىسىرداعى اككرەديتتەلگەن شەتەلدىك ەلشىلەر اراب تىلىنە اۋدارىلعان «اباي» كىتابىنىڭ العاشقى وقىرماندارى بولدى.

سالتاناتتى كەشتە العاشقى ءسوز سويلەگەن ەلشى قايرات لاما شاريف قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ «اباي اماناتى» مەن مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالالارى تۋرالى باياندادى.

شارا بارىسىندا ابايدىڭ تۋعانىنا 175 جىل تولۋىنا ارنالعان قر ۇلتتىق اكادەميالىق كىتاپحاناسىنىڭ قورىنان جەتكىزىلگەن كىتاپ كورمەسى ۇيىمداستىرىلىپ، ارنايى اقپاراتتىق ستەند ورناتىلدى. Cونىمەن بىرگە، اباي شىعارماشىلىعى تۋرالى 200-دەن استام جاڭا كىتاپتار ۇسىنىلدى. كەش سوڭىندا كونتسەرتتىك باعدارلاما ۇسىنىلىپ، وندا قازاقستاندىق جانە مىسىرلىق ستۋدەنتتەر قازاق جانە اراب تىلدەرىندە ۇلى ابايدىڭ ولەڭدەرىن مانەرلەپ وقىپ، اندەرىن شىرقادى.

اتالعان ءىس-شارا قاتىسۋشىلاردىڭ ۇلكەن قىزىعۋشىلىعىن تۋدىردى. مىسىردىڭ زيالى قاۋىم مەن بۇقارالىق اقپارات قۇرالدارىنىڭ وكىلدەرى ەلشىلىكتىڭ وسى باستاماسىن جوعارى باعالاپ، ۇلى اقىن ءارى ويشىل اباي قۇنانبايۇلىنىڭ تۋىندىلارى ارقىلى قازاق ادەبيەتىنىڭ قۇندىلىقتارىمەن جاقىن تانىسۋعا مۇمكىندىك العاندارىن جەتكىزدى.

قازاقستاندىق دەلەگاتسيا مىسىردىڭ استاناسىنداعى «ەركىندىك پەن دوستىق» ساياباعىندا ورنالاسقان اباي ەسكەرتكىشىنە گۇل شوعىن قويدى.

Abai.kz