بۇگىن سەناتورلار «2021-2023 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن قارادى.

ەكونوميكاداعى جاعداي، ۇكىمەتتىڭ بولجامىنا سايكەس، كەلەسى جىلدىڭ وزىندە - اق جاقسارا باستايدى: ءجىو-ءنىڭ ناقتى ءوسىمى 2021 جىلى 2,8%، 2022 جىلى 3,7% جانە 2023 جىلى 4,6% بولادى دەپ بولجانۋدا. ينفلياتسيا 4-6% ارالىعىندا بولادى دەپ كۇتىلۋدە.

مۇناي ءوندىرىسى 2021 جىلى 86 ميلليون توننا، 2022 جىلى 89,6 ميلليون توننا جانە 2023 جىلى 100,8 ميلليون توننا دەپ بولجانۋدا. سونىمەن بىرگە كونسەرۆاتيۆتى ءتاسىلدى ەسكەرە وتىرىپ، مۇناي باعاسى 2021-2023 جىلدارى باررەلىنە 35 دوللار دەڭگەيىندە بەلگىلەندى.

رەسپۋبليكالىق بيۋدجەتتىڭ كىرىستەرى (ترانسفەرتتەردى قوسپاعاندا) 2021 جىلى 6,9 ترلن تەڭگەنى، 2022 جىلى 8,5 ترلن تەڭگەنى، 2023 جىلى 9,2 ترلن تەڭگەنى قۇرايدى.

كەپىلدەندىرىلگەن ترانسفەرتتى 2021 جىلى 2,7 ترلن تەڭگە، 2022 جىلى - 2,4 ترلن تەڭگە جانە 2023 جىلى - 2,2 ترلن تەڭگە كولەمىندە ايقىنداۋ ۇسىنىلادى.

سونىمەن بىرگە، ۇلتتىق ەكونوميكا ءمينيسترى ەربولات دوساەۆ اتاپ وتكەندەي، «رەسپۋبليكالىق بيۋدجەتتەن ىنتىماقتاستىق زەينەتاقىلارىن، مەملەكەتتىك بازالىق زەينەتاقى تولەمدەرىن تولەۋگە ۇلتتىق قوردان كەپىلدەندىرىلگەن ترانسفەرت جىبەرۋ ۇسىنىلادى».

ال، كەلەسى 2021 جىلى ينفراقۇرىلىمدى دامىتۋ، گازداندىرۋ جانە اۋىز سۋمەن قامتۋ جۇمىستارىنا بيۋدجەتتەن 1,6 ترلن. تەڭگە ءبولۋ جوسپارلانىپ وتىر.

سونداي-اق، سەنات توراعاسى ماۋلەن اشىمباەۆتىڭ ايتۋىنشا، بولىنگەن قارجىنىڭ جارتىسىنان استامى الەۋمەتتىك سالاعا بولىنەدى.

«سىرتقى نارىقتاعى كۇردەلى جاعدايعا بايلانىستى داعدارىسقا قارسى كەشەندى ءىس-شارالاردى قارجىلاندىرۋ جالعاسا بەرەدى. بيۋدجەتتى قاراۋ بارىسىندا الداعى ءۇش جىلدا ازاماتتاردىڭ الەۋمەتتىك ماسەلەلەرىن شەشۋگە باسىمدىق بەرىلدى. سوعان سايكەس 2021 جىلى بيۋدجەت شىعىندارىنىڭ 50 پايىزدان استامى الەۋمەتتىك سالاعا جۇمسالادى»، – دەدى ماۋلەن اشىمباەۆ.

Abai.kz