سەيسەنبى, 18 قاڭتار 2022
جاڭالىقتار 2668 0 پىكىر 2 اقپان, 2012 ساعات 12:49

ينتەرنەت-كونفەرەنتسيا: مۋزارت (باسى)

قازاق ءان ونەرىندە حالىقتىڭ ىقىلاسىنا بولەنىپ، مىنە، 11 جىلعا اينالسا دا ونەر بيىگىنەن تۇسپەي كەلە جاتقان «مۋزارت» توبى وقىرماندار تاراپىنان كەلىپ تۇسكەن ساۋالداردى توپتاي كەلىپ: «ۋاقىتتىڭ تاپشىلىعىنا بايلانىستى بىرتەكتى سۇراقتاردىڭ باسىن بىرىكتىرىپ، ءبىر-اق جاۋاپ بەرۋگە تىرىستىق. كەيبىر ۇسىنىس، ساۋالدارىڭىزعا جاۋاپ بەرە الماساق كەشىرىم وتىنەمىز. بولاشاقتا دا بايلانىستا بولامىز دەگەن ۇمىتتەمىز»-دەپ جاۋاپ قاتىپ وتىر.
«اباي-اقپارات»

قازاق ءان ونەرىندە حالىقتىڭ ىقىلاسىنا بولەنىپ، مىنە، 11 جىلعا اينالسا دا ونەر بيىگىنەن تۇسپەي كەلە جاتقان «مۋزارت» توبى وقىرماندار تاراپىنان كەلىپ تۇسكەن ساۋالداردى توپتاي كەلىپ: «ۋاقىتتىڭ تاپشىلىعىنا بايلانىستى بىرتەكتى سۇراقتاردىڭ باسىن بىرىكتىرىپ، ءبىر-اق جاۋاپ بەرۋگە تىرىستىق. كەيبىر ۇسىنىس، ساۋالدارىڭىزعا جاۋاپ بەرە الماساق كەشىرىم وتىنەمىز. بولاشاقتا دا بايلانىستا بولامىز دەگەن ۇمىتتەمىز»-دەپ جاۋاپ قاتىپ وتىر.
«اباي-اقپارات»

- جىگىتتەر، حوش كەلدىڭدەر! سەندەرگە سۇراق كوپ بولاتىنىنا كۇمانىم جوق. العاشقى سۇراق: سىنعا توزىمدىسىڭدەر مە؟ ءبىر-بىرلەرىڭدى سىن تەزىنە الىپ وتىراسىڭدار ما؟
- سىن شىن بولسا، قۇبا-قۇپ.
- اسسالاۋماعالەيكۋم! «مۋزارت» توبى!
سىزدەر قازاق ءان ونەرىنىڭ ەڭ جارىق جۇلدىزىسىزدار! وعان ەشكىمنىڭ تالاسى جوق. سوندىقتان الاشتىڭ اسپانىندا جارقىراعان ەڭ جارىق جۇلدىز رەتىندە قازاق ەلىنىڭ قازىرگى جاعدايىنا قالاي قارايسىزدار؟ سىزدەردى مۇشكىل تارتىپ بارا جاتقان ۇلتتىق ءتىلىمىز، ءدىنىمىز، ءدىلىمىز قانشالىكتى ويلاندىرادى؟ ال سول قۇندىلىقتارىمىزدى قالپىنا كەلتىرۋگە سىزدەر تەك ءان ونەرىمەن عانا ۇلەس قوساسىزدار ما؟ ازاماتتىق ۇندەرىڭىزدى قاشان تىڭدايمىز؟ نەگە «جاڭا وزەنگە» بايلانىستى ءبىر اۋىز ءسوز ايتپايسىزدار؟ نەگە تەپەرىش كورىپ، كوزگە تۇرتكى بولىپ جاتقان (قۇلىباەۆ، ەرتىسباەۆتىڭ سوزدەرى) ورالمان باۋىرلارىڭىز تۋرالى ءبىر جىلى پىكىر ءبىلدىرىپ، سۇحبات بەرمەيسىزدەر؟ ەلدىڭ تىزگىنىن ۇستاپ جۇرگەندەرگە تەك قازاقتىڭ ءانىن عانا ايتپاي، زارىن دا ايتساڭىزدار ەتتى...

- الاش اسپانىن بۇلت شالماسىن! ونەر ادامدارىنىڭ باستى مىندەتى - ۇلت اراسىنا ىرىتكى سالۋ ەمەس، اۋىزبىرشىلىككە، بەرەكەگە شاقىرۋ.
جەكە ازامات رەتىندە قوعامدا بولىپ جاتقان كەيبىر كەلەڭسىز جاعدايلارعا  بەي-جاي قاراپ، بۇقپالاپ قالعان كەزىمىز بولعان جوق. ول تۋرالى از-كەم پىكىرلەرىمىز باق-نا بەرگەن سۇحباتتارىمىزدا جاريالانىپ تا ءجۇر.
- سىزدەر قايىرىمدىلىق شاراسىنا قانشالىقتى اتسالىساسىزدار؟
- قايىرىمسىزداردىڭ قاتارىنان ەمەسپىز.
- مەيرامبەك، ءسىز جالپى تىڭدارماننىڭ بەتىن قازاق ەستراداسىنا بۇرعان قازاق ونەرىندەگى دارا قۇبىلىسسىز. ءاربىر اقپارات قۇرالدارىندا ءسىز جايلى جازعان ماقالالار مەن سۇحباتتار ءسىزدىڭ قاراپايىم ادام، ونەر ادامى رەتىندەگى قىرىڭىزدى تۇگەل اشىپ بەرە المايتىن سەكىلدى. قازىر «جيزن زامەچاتەلنىي ليۋدەي» دەگەن سياقتى تانىمال ادامدار جونىندە كىتاپتار شىعىپ جاتىر عوي. مەنىڭ ءسىز جايلى ەڭبەك جازعىم كەلەدى. بۇعان قارسى بولمايدى دەپ ويلايمىن. ەگەر قۇپ كورسەڭىز، سىزگە قالاي حابارلاسۋعا بولاتىنىن ايتۋىڭىزدى وتىنەمىن.
- ءسوز جوق، مەيرامبەك - قازاق ونەرىندەگى شوقتىعى بيىك دارىن يەسى!
كەيدە ەكەۋمىز: «وسى ءبىز ءبىر-ءبىرىمىزدى جانۇيامىزدان دا ءجيى كورەمىز» دەپ قالجىنداسىپ جاتامىز. مەيرامبەك، اللا ءومىر بەرسە، جەتپىسكە كەلگەندە سەن تۋرالى كىتاپ جازام دەگەنىم بار ەدى. سول ويىم سىزدىكىمەن ءبىر ارنادا توعىسىپ وتىر ەكەن. بولاشاقتا بىرگە جازىپ قالارمىز مۇمكىن:)
- قۇرمەتتى «مۋزارت» توبى!
جاقىندا تەلەديداردان توپتىڭ جەكە كونتسەرتىن تاماشالادىق. «مۋزارتپەن» بىرگە وسى توپتىڭ بۇرىنعى مۇشەسى، «مۋزارتتىڭ» ىرگەسىن قالاعان ونەر ساڭلاقتارىنىڭ ءبىرى ماقسات بازارباەۆپەن بىرگە ءان ايتقاندارىڭىزدى كوردىك. مەنىڭشە، ماقساتتىڭ ورنى بولەك. ەگەر ماقسات دوستارىڭىز توپقا قايتا ورالۋ تۋرالى ۇسىنىس ايتسا، قابىلدار ما ەدىڭىزدەر؟ ءبىز ءاۋ باستا مەيرامبەك، ماقسات، ساكەن ۇشەۋىنەن قۇرالعان «مۋزارتتى» جۇرەگىمىزبەن قابىلداپ قالدىق، كەنجەبەك رەنجي قويماس، دەگەنمەن قازىرگى قۇرام العاشقىداي ەمەس سەكىلدى. وسى سۇرعىمىزعا جاۋاپ بەرسەڭىزدەر ەكەن.

- ارينە، ماقساتتىڭ «مۋزارت» تاريحىندا ويىپ الار ورنى بارى داۋسىز. اللاعا شۇكىر، كەنجەبەك كەلگەننەن كەيىن دە كورەرمەن كەمىگەن جوق.
- كونفەرەنتسياعا «مۋزارتتى» شاقىرىپ وتىرعاندارىڭىزعا قاتتى قۋانىپ وتىرمىن. راحمەت، ابايلىقتار! قازاقتىڭ ماڭدايىنا بىتكەن توبىمىزدىڭ عۇمىرى ۇزاق بولعاي!
راحمەت، ايتقانىڭىز كەلسىن!
- ساكەن، ماعان ءسىزدىڭ كيىم كيۋ ءستيلىڭىز قاتتى ۇنايدى، ءيميدجدى قالىپتى جانە ۇنامدى ەتىپ ۇستاۋ ءۇشىن دە قابىلەتتى ماماندارمەن جۇمىس ىستەيتىن شىعارسىز؟ ءستيليستىڭىز كىم جانە قايدان كيىنەسىز؟ اينۇر
راحمەت، اينۇر سۇراعىڭىزعا! كيىم تانداۋدا كوبىنە ءوز تالعامىما جۇگىنەمىن.
- ءبىز نەگە اعىلشىن، فرانتسۋز، نەمىس، اراب، تۇرىك، جاپون، قىتاي ت.ب. ەلدەردىڭ ەسترادالىق اندەرىن ءسۇيىپ تىڭدايمىز؟ جانە ولاردى بۇكىل الەم حالقى نەلىكتەن قابىلداي الادى دەپ ويلايسىزدار؟
نەگە قازاق ەسترادا اندەرىن باسقا ەلدىڭ ادامدارى ەسى كەتىپ تىڭدامايدى؟

- «ءوزىندى ءوزىڭ سىيلاساڭ جات جانىنان تۇڭىلەر» - دەگەندەي، باسقالاردى     باعىندىرعانعا دەيىنگى باسپالداقتار بار ەمەس پە؟ ءبىرىنشى كەزەكتە ءدۇبارالارىمىزدىڭ بەتىن بەرى قاراتىپ الۋ.  «مۋزارت» توبى و باستان قازاق اندەرىن ناسيحاتتاۋعا باعىتتالعان توپ. سوندىقتان تىڭدارماندارىمىزدىڭ تەك قازاق ءتىلدى بولۋى دا زاندىلىق. بىرەۋدىڭ قانسىعىن وزىمىزگە تاڭسىق قىلماي-اق قويايىق. ءوز اسىلدارىمىزدى باعالايىق.
- ساكەن، |مەيرامبەك، كەنجەبەك، ورىندايتىن اندەرىڭىزدىڭ ءبارى تاماشا. جۇرەكپەن ايتاسىزدار  - جۇرەككە جەتەدى. سىزدەر وسى اندەردى قالاي تاڭدايسىزدار؟ تريو بولعاندىقتان ءاندى كىمنەن كەيىن كىمنىڭ ايتاتىنى دا دۇرىس تاڭداۋدى قاجەت ەتەتىن سياقتى. سىزدەردەگى ۇيلەسىمگە قاتتى ريزامىز. قۇپيا بولماسا، ءبىر ءاندى قالاي الىپ شىققاندارىڭىزدى اڭگىمەلەپ بەرەسەڭىزدەر ەكەن دەيمىز.
قۇسني مەن ەرجان

- ۇلكەن راحمەت، كەلىسىپ پىشكەن تون كەلتە بولمايدى.
«ءاننىڭ دە ەسەرى بار ەستىسى بار». انشىلەر دە سولاي. ءان ايتقاننىڭ ءجونى وسى ەكەن دەپ ساحنا مادەنيەتىن تارك ەتىپ، كورىنگەنگە ەلىكتەپ جۇرگەندەر تۋرالى نە ايتاسىڭدار؟
شىراقشى

- ءبىزدىڭ تاراپىمىزدان كوركەمدىك كەڭەس قۇرىلۋ كەرەكتىگى تۋرالى پىكىر از ايتىلىپ جۇرگەن جوق.
- جازۋشى، كومپوزيتور ءىليا جاقانوۆ ءبىر سۇحباتىندا: «قازىرگى قازاق اندەرى ازىپ بارادى. مەنىڭ تراگەديام وسى اندەردىڭ تاراپ بارا جاتقانىن قۇلاعىممەن ەستىپ، كوزىممەن كورۋ، وسىناۋ ازعىندىققا كۋا بولۋ» دەگەن ەدى. اعامىز قاتتى كەتىپ قالعان جوق پا، الدە دۇرىس ايتا ما؟
- جالپى بۇل پىكىرگە بىرجاقتى قاراۋعا بولمايدى. اعامىزعا قوسىلاتىن تۇستارىمىز دا جوق ەمەس. ەسسىز اندەردىڭ كوبەيىپ كەتكەنى راس. دەسەك تە، س. سەيتمان، ق. سارين، ق. ومار ت.ب.اقىندارىمىزدىڭ، ولاردىڭ ويلى ولەڭدەرىنە اۋەزدى اندەر جازىپ جۇرگەن  ج. داۋلەت ، ۇ.جولداسوۆ،  ا. بەكسۇلتان جانە ت.س.س سازگەرلەردىڭ ەڭبەگىن دە جوققا شىعارۋعا بولمايتىن شىعار.
- ەلباسىمىز نۇرسۇلتان ابىشۇلىمەن كەزدەسىپ كوردىڭدەر مە؟ ول كىسىگە سەندەردىڭ اندەرىڭ جەتىپ جاتىر ما ەكەن؟ كەزدەسكەن بولساڭدار، اڭگىمەلەسە الدىڭدار ما؟
- توبىمىزدىڭ ون جىلدىق مەرەيتويىندا ەلباسىنان كۇتتىقتاۋ حات الدىق. مەملەكەتتىك ماڭىزى بار مەرەكەلەردە ەلباسى الدىندا بىرنەشە رەت ءان شىرقادىق، بىراق اڭگىمەلەسۋدىڭ ءساتى تۇسپەدى.
- كوپتەن بەرى قويسام دەپ جۇرگەن تىلەك ءارى سۇراق بار ەدى. مەيرامبەك مىرزانىڭ شىعارماشىلىعىندا بەكبولات تىلەۋحان سياقتى اسىرە ءدىنشىل «رەۆيزيا» ءجۇرىپ وتكەندەي. مىسال ءۇشىن تانىمال ءبىر ءان بار ەدى «مۇڭايما بالا» دەگەن. جاڭىلماسام ابۇيىربەك تىناليەۆتىكى، ءسوزىن ءابدىراحمان اسىلبەك جازعان-اۋ... مەيرامبەك سول اندەگى:
«ارىما بالا، نالىما بالا،
كۇش-قۋات بەرسىن جانىڭا دالا » دەگەن جولداردى دالا قۋات بەرمەيدى دەپ شەشكەن بولۋى كەرەك:
«ارىما بالا، نالىما بالا،
كۇش-قۋات بەرسىن جانىڭا اللا» دەپ وزگەرتىپتى. جارايدى، اۆتورلىق وي-پىكىرگە قياناتى بولماسا، مۇنداي «رەۆيزيالاردى» كىم بايقايدى؟! بىراق، اتالعان ولەڭنىڭ كەلەسى جولدارى مەيرامبەكتىڭ بۇل رەۆيزياسىنان قورلىق كورىپ، قايتالاۋعا ۇشىراعان: «قۇلىنىم امان، بولسىن دەپ ءامان، جاراتقانعا مىڭ جالىنادى انا»... تۇسىنىكتى بولار. اللانىڭ جاراتىلىسىن كورگەندە ادام جانىنىڭ قۋاتتانىپ، كۇش-قۋات الاتىنى راس قوي. ونىڭ نەسى جامان، دالادان قۇداي جاساپ جاتقان كىم بار؟! كەيبىرەۋلەرگە ۇساق-تۇيەك بولىپ كورىنگەنىمەن، مۇنداي رەۆيزيالار ورتاعاسىرلىق ينكۆيزيتسياعا ۇقساپ بارادى. دارداي عالىمدارىمىزدىڭ (ايگۇل ىسماقوۆا) قىلىعى اناۋ. بۇكىل جىرلارىمىزعا قول سالىپ، «ون عاسىر جىرلايدى» دەگەن كىتاپتا قازاقى ورفوگرافياداعى تۇپنۇسقاعا تىم جاقىن «اللا» ءسوزىن «اللاھقا» وزگەرتىپ شىعىپتى.
بۇل سۇراقتى كويعانداعى ماقساتىم، مەيرامبەكتى بولماسا قازاق ەستراداسىندا شىن مانىندەگى رەۆوليۋتسيا جاساعان تالعامپاز شىعارماشىل ۇجىم «مۇزارتتىڭ» ءباسىن ءتۇسىرۋ ەمەس. ۇنەمى تىڭدايتىن اندەرىم سولاردىڭ ورىنداۋىندا. بىراق جوعارىداعىداي وزگەرىستەر ءار تىڭداعاندا قۇلاعىمدى قاريدى. وسىنداي «بالالىق اۋرۋلاردان» ارىلدى ما ەكەن مەيرامبەك، دەگەن سۇراق قوي. جاۋاپ بەرمەسە دە، ايتارسىزدار.
دۇيسەنالى الماتىدان.

- مەنىڭ ويىمشا بايبالام سالىپ، باس اۋىرتاتىن ماسەلە ەمەس. ەكى ءسوزدىڭ ورنى اۋىسقانىنان ولەڭنىڭ ماعىناسىنا دا، ۇيقاسىنا دا ەشقانداي زيان كەلمەگەن سياقتى. ونىڭ ۇستىنە مەيرامبەك بۇل ماسەلە جونىندە اۆتورلاردى قۇلاقتاندىردى.
- تاۋەلسىزدىگىمىزدىڭ 20 جىلدىعىنىڭ قاراساڭىندا اباي.كز اقپاراتتىق پورتالى تاعايىنداعان ءاليحان بوكەيحاننىڭ 145 جىلدىعىنا وراي ۇلت كوسەمىنىڭ بەينەسى تاڭبالانعان توسبەلگىمەن ماراپاتتالعان ەكەنسىزدەر. قۇتتى بولسىن! ءاليحان بوكەيحان تۋرالى، ول كىسىنىڭ كۇرەسكەرلىك عۇمىرى تۋرالى قانداي ويداسىزدار؟
نۇرقانات

- ۇلت ازاتتىعى ءۇشىن باسىن بايگەگە تىككەن بابالارىمىزدىڭ بىرەگەيى، كورنەكتى قوعام، مەملەكەت قايراتكەرى، الاش قوزعالىسىنىڭ جەتەكشىسى، الاش وردا اۆتونوميالى ۇكىمەتىنىڭ توراعاسى ءاليحان نۇرمۇحامەتۇلى بوكەيحان اتامىزدىڭ اتىنداعى توسبەلگىنى تاعىنۋ ۇلكەن جاۋپكەرشىلىك ەكەنىن سەزىنەمىز.
شەتەلدىڭ قازىرگى ءتىرى كلاسسيكتەرىنىڭ قانداي شىعارمالارىن جانە كىمدەردى قىزىعىپ وقيسىزدار؟
- قانشا ات ۇستىندە جۇرسەك تە، باق جاڭالىقتارى مەن ادەبي-تاريح شىعارمالاردى شاما كەلگەنشە نازاردان تىس قالدىرماۋعا تىرىسامىز. كىتاپ دۇكەندەرىن اتتاپ ءوتىپ كەتكەن كەزىمىز بولعان ەمەس.
- ءانشى قاۋىم ىشىندە تەرەڭ ءبىلىمدى، وقىعان-توقىعانى كوپ، اقىلى اسقان ادام دەپ كىمدى اتار ەدىڭىزدەر؟
جاۋاپ كۇتەم. سالەممەن، جاۋھار.

- قايسى ءبىرىن ايتايىن، ماقتان تۇتاتىن مايتالماندارىمىز جەتەرلىك.
- وسى انشىلەرگە، باسقا دا ونەردە جۇرگەندەرگە ساياسات جونىندە سۇراق بەرسەڭ  ىرشىپ تۇسەدى، «ساياساتپەن اينالىسپايمىز» دەيدى. جالپى ادامدا ازاماتتىق پوزيتسيا بولۋ كەرەك قوي، ساياساتپەن اينالىسپاي-اق قوي، بىراق قوعامداعى وزگەرىستەر، كەلەڭسىزدىكتەردى سەندەر ايتپاعاندا، كىم ايتادى ەندى؟! سەندەردى كوتەرىپ جۇرگەن سول حالىق ەمەس پە؟! وسى جاڭاوزەن وقيعاسىندا قازا تاپقان وتباسىلارىنا ارناپ، قايىرىمدىلىق كونتسەرت نەگە وتكىزبەيسىڭدەر؟ سەندەردىڭ كونتسەرتتەرىڭە ادام كوپ جينالادى عوي، سوندىقتان اقشا دا كوپ تۇسەدى. ەڭ بولماسا، وسىلاي كومەك بەرىڭدەرشى.
- بارلىق ونەر ادامدارىنا توپىراق شاشۋ تاربيەسىزدىك دەپ تۇسىنەمىن. ەردى ەر ەتىپ جۇرگەن ەل ەكەنىن ءبىر ءسات تە ەسىمىزدەن شىعارعان ەمەسپىز. جاڭاوزەندەگى جاعداي ءبىزدىڭ دە جانىمىزدى جەگىدەي جەپ ءجۇر.
ساكەن، سەنىڭ جەكە ورىنداعان اندەرىڭە دە ريزامىن. ونىڭ ۇستىنە سەن بىرنەشە مۋزىكالىق اسپاپتاردا دا وتە شەبەر وينايدى ەكەنسىڭ. «ۆيا-مۋزارت» توبىندا قولىڭا جەكە مۋزىكالىق اسپاپ الىپ شىعۋ ويىڭدا جوق پا؟
- ۇلكەن راحمەت. ءبىزدى سۇيەمەلدەيتىن شىنايى اسپاپتاردا وينايتىن ماماندار توبىمىزدا جەتەرلىك بولعاندىقتان ونشا قاجەتتىلىك تۋىنداپ جاتقان جوق.
- «مۋزارت» توبىنا راحمەتتەن باسقا ايتارىم جوق،باسقا ارتيستەرىمىز كىشكەنە شەن بىتسە، ورىسشاعا اۋىسىپ اداسىپ جاتادى، مەن ءوزى ۆيدەو مونتاج نەمەسە وڭدەۋمەن اينالىسام. كوبىنەسە ۇيلەنۋ تويلارىنا «مۋزارتىڭ» ولەڭدەرىن قوسپاساڭ قىزىعى كەتەدى، سوعان كەيىنگى شىققان زاڭ كەرى اسەرىن تيگىزەتىنىن بىلەمىن، شاعىن اقشا بولسا تولەۋگە دايىنبىز، ال كوپ تولەۋگە حالىقتىڭ قالتاسى كوتەرمەيدى. «مۋزارت» توبىنا شاعىن بولسا دا اقشا تۇسە بەرگەنى جاقسى ما، الدە زاڭدى قولدايسىزدار ما؟
- ۇلكەن راحمەت! ءبىزدىڭ ۇستانىمىمىز - قازاق ءۇشىن جازىلعان ءان ءار قازاقتىڭ يگىلىگىنە جاراپ جاتسا، ءبىز ءۇشىن سول قۋانىش.
- «مۋزارت» توبى سىزدەردىڭ داۋىستارىڭىز التىن قورعا ساقتالا ما؟ ارينە، بۇنى مۋزىكاتانۋشىلاردان سۇراعان دۇرىس بولار ەدى. دەسەدە، سىزدەر قالاي ويلايسىزدار؟
مارجان قىزىلاعاش اۋىلىنان

- ءبىزدىڭ بىرنەشە اندەرىمىز 90 جىلدىق تاريحى بار قاراشاڭىراعىمىز «قازاق راديوسىنىڭ» التىن قورىندا ساقتالعان. الداعى ۋاكىتتا دا سىزدەر ءۇشىن ەڭبەكتەنە بەرەمىز.
- باسقا توپتارعا قاراعاندا، قازىر سىزدەردىڭ توپ الدەقايدا بيىكتە تۇر. حالىق سول بيىكتەن تۇسپەسە ەكەن، سول دەڭگەيدە قالسا ەكەن دەپ تىلەيدى. اللانىڭ بەرگەن ونەرىن باعالاپ، «اعالاردىڭ» ەمەس، حالىقتىڭ كوڭىلىنەن شىعاتىن اندەردى ايتا بەرىڭىزدەر. تەك اسىرە دىنشىلدىككە سالىنىپ، «ءان ايتۋ - كۇنا» دەپ ونەردەن قولدى ءبىر سىلتەپ، دەپۋتات بولىپ، اكىم بولىپ شەن قۋىپ كەتىپ جۇرمەڭىزدەرشى. ونەر ادامى سول ونەرىن جاندىرسا  -  حالقى ءۇشىن ەتكەن ۇلى ەڭبەگى سول. ال اكىمدەر مەن شەنەۋنىك بولۋعا قۇمارلار بىزدە جەتىپ ارتىلادى. وسىلاي تاماشا اندەرىڭىزبەن جابىرقاعان ساتتە كوڭىلىمىزگە قۋانىش سىيلاپ، ويلاندىرىپ، ۇمىتتەندىرىپ، ءتاتتى قيالعا باتىرىپ جۇرە بەرىڭىزدەر.
- راحمەت، اللا رازى بولسىن!
-  قازىرگى قازاق ەستراداسىندا شالدىر-بالدىر ءانى كوپ بولعانىمەن بىردە ءبىرى حيتكە اينالمايتىن انشىلەر نەگە كوبەيىپ كەتتى؟ بىزدەگى شوۋ-بيزنەستە ۇلتتىق سيپات بار ما؟ الدە ول (ۇلتتىق ناقىش) كەرەك ەمەس پە؟
ول تەك قازاق ەسترداسىندا عانا ەمەس، ءار ەلدىڭ ەستراداسىندا بار پروبلەما.
- مەيرامبەك ءسىزدىڭ ءدىني اندەرىڭىز جاقسى-اق ، تالاي ءدىني اندەر ايتاتىنىڭىزعا سەنەم. بىزگە ءسىزدىڭ قوڭىر داۋسىڭىزبەن ورىندالعان ءدىني اندەر قاتتى اسەر بەرەدى. «مۋزارت» ىستەرىڭىز وڭ بولسىن!
- اللا رازى بولسىن!
- سىزدەردى جاقسى كورەتىن قىزدار كوپ. وتباسىلارىڭىزدى قالاي ساقتاپ قالىپ جۇرسىزدەر؟
ايجان

- ونەر سۇيەر قاۋىم  ءوزىمىزدى ەمەس، ونەرىمىزدى باعالايدى دەپ تۇسىنەمىز.
- ساكەن، قانداي ءيىسسۋ سەبىنەسىز؟ جاسىرماي ايتا سالىڭىزشى؟
- قيىلىپ سۇراپ قالگان ەكەنسىز: Davidoff  Adventure
- ساكەن، مەيرامبەك، سىزدەر ۇلتشىلسىزدار ما؟ مىسالى، ۆاحتانگ كيكابيدزە ءوزىن «گرۋزين ۇلتشىلىمىن» دەپتى.
- ءبىزدىڭ ۇلتشىل ەكەنىمىزدى ءسىز عانا ەستىمەي قالعان ەكەنسىز عوي.
- «اباي.كز» پورتالىن وقىپ تۇراتىن سياقتىسىزدار عوي. داۋرەن قۋاتتىڭ كىم ەكەنىن بىلەسىزدەر مە؟
«اباي.كز»-تە وتىرىپ د. قۋاتتىڭ كىم ەكەنىن بىزدەن سۇراعانىڭىز قىزىق بولدى.
- اقكوڭىل، ادال جىگىتتەر، شىن تالانتتار ىشىمدىككە ءۇيىر بولادى دەگەن ءپالساپا بار. وسىعان قاراپ وتىرىپ، قايسىڭىز قانداي ەكەندەرىڭىزگە جاۋاپ بەرىپ كورىڭىزدەرشى؟
نۇرسۇلۋ

- قادىرسىز قاعيدا عوي.
- «مۋزارتتىڭ» جىگىتتەرى جارايسىڭدار! سەندەر، اندەرىڭ دە ساندەرىڭ دە جاراسقان جىگىتسىڭدەر. ءسۇيىپ تىڭدايمىز. سەندەردىڭ وسىنداي مارتەبەگە جەتۋلەرىڭ، بىرىنشىدەن، ورىنداۋشىلىق شەبەرلىكتەرىڭ، ەكىنشىدەن، سەندەردى سۇيەمەلدەيتىن مۋزىكانتتارىڭ دا مىقتى جىگىتتەر. ءانشى دە، ءان دە، مۋزىكانتتار دا كەلىسكەن، قازاق شوۋ بيزنەسىندەگى ءتورت اياعىن تەڭ باسقان توپ سەندەر عانا عوي دەيمىن. ونەرلەرىڭ ورلەي بەرسىن، قازاق ساحناسىندا ۇزاق عۇمىر جازسىن سەندەرگە! ءبىر تاڭ قالاتىنىم، ۇشەۋىڭ ساحنادا ورىندارىڭدى نەگە اۋىستىرمايسىڭدار؟ بۇرىن كيىمدەرىڭ، ستيلدەرىڭ ونشا ۇناماۋشى ەدى، كەيىنگى كەزدە جاقسى كيىنەتىن بولدىڭدار. باياعى كەڭەستىك سىقيعان، ءبىپ-بىردەي ساحنالىق كوستيۋم دەگەن ۇعىمنان ارىلىپ، زاماناۋي، ستيلنىي، مودنىي كيىنگەندەرىڭ دۇرىس.
- پىكىرىڭىزگە راحمەت!
- وتكەن جىلى مونگوليا ەلىنە بارىپ كونتسەرت قويدىڭىزدار. نەشە رەت قويساڭىزداردا جامان تەاترمىزدا يننە شانشار جەر قالماي، ءتىپتى ورىندىقتان تىسقارى تۇرەگەپ تۇرىپ كورگەندەردە رازى قوش بولىپ قايتتى. ال سىزدەردىڭ كوڭىل كۇيلەرىڭىز قالاي بولدى؟ قانداي وي ءتۇيىپ قايتتىڭىزدار؟
كوڭىل-كۇيىمىز كوتەرىڭكى، ادەمى اسەرمەن قايتتىق.
- سىزدەردىڭ ۇزاق جىل بەرەكە بىرلىكتە جۇمىس جاساۋلارىڭىزدىڭ قۇپياسى نەدە؟
- قۇپيا!
- ساكەن مىقتى ازامات! جارايسىڭ ساكەن! ال كەنجەبەك ساعان قىزعانىشپەن نەمەسە سىناپ ءار ءتۇرلى سۇراقتار قويىپ جاتادى سىندى قالاي قابىلدايسىز؟ «مۋزارتتىڭ» اسقارلى «مۋزارت» بولعانىنا ءسىزدىڭ دە ەڭبەگىڭىز ايىرىقشا ەكەنىن ەشكىم دە جوققا شىعارمايدى.
- ۇلكەن راحمەت!
- انسامبىلدەرىڭىزدىڭ قال اۋقالى قالاي؟ ولاردى قالاي قارجىلاندىراسىزدار؟
«مۋزارت»، قورجىندارىڭىزعا ءان تاڭداۋ شەشىمىن كىم شىعاردى؟

- بۇرىنعىداي ۇشەۋمىز عانا ەمەس، قازىر ون ادام تالقىلاپ، تاڭدايدى.

- «مۋزارتتىقتار»، سىزدەر شەتەلدەرگە ءجيى شىعىپ تۇراسىزدار. ۇلكەن ساپاردى بىلاي قويعاندا، مىنا ىرگەمىزدە تۇرعان قىتاي ەلىنە تويلارعا بارىپ جۇرەسىزدەر. ول جەردە قازاقتار تۇرادى. قازىر شەتەلدەن كەلەتىن قازاقتاردىڭ كوشى توقتادى. 5000000 قانداسىمىز جات جۇرتتا قالىپ، جويىلىپ كەتۋدىڭ الدىندا تۇرعانى ايداي اقيقات. ال، ءبىزدىڭ جەرىمىز ۇلان-بايتاق. حالقىمىز ءبىر-اق ۋىس! وسى ماسەلە ازامات رەتىندە سىزدەردى قانشالىق تولعاندىرادى؟ مەيرامبەك، ساكەن، كەنجەبەك، قاراقتارىم، ءبىزدى جات جۇرتقا وسىلاي تاستاپ قوياسىڭدار ما، اناۋ ەلباسىنىڭ الدىنا ءان ايتقالى بارعاندا ءبىزدىڭ تاعدىرىمىزدى ۇشەۋىڭ ايتىڭدارشى، جاندارىم،- دەسە، نە دەپ جاۋاپ بەرەر ەدىڭدەر؟ ەلباسىعا كەزدەسكەندە ايتا الاسىزدار ما سول قانداستارىڭنىڭ اماناتىن؟
الماتى قالاسىنان ا. مۇقاباي

- شەتەلدەن كەلەتىن قانداستارىمىزدىڭ كوشىنىڭ توقتاماعانىن قالايمىز. وسى ورايدا، «مۋزارت» توبىنىڭ قىتاي حالىق رەسپۋبليكاسىنان ەكى ازاماتتى وتباسىمەن كوشىرىپ اكەلۋى ۇلى كوشكە قوسقان تەڭىزگە تامعان تامشىداي عانا ۇلەسى دەپ بىلەمىز. ەلباسىمەن كەزدەسۋ باقىتى بۇيىرىپ جاتسا، ونداي  اماناتقا قيانات جاسامايمىز.
- جىگىتتەر سەندەرگە مىڭ العىس! كونتسەرتتەرىڭىز كەرەمەت! قازاقستاننان ەكى رەت قاتار كوردىك. سۇراعىم: ەلدوس ەمىل دەگەن ازاماتتى تانيسىز با؟ سوڭعى ۋاقىتتا وعان تاعىلعان ايىپتار تۋرالى (ماسەلەن بىرەر كۇن بۇرىن «كتك» دا كورسەتىلگەن «چەرنىي كۆادرات» حابارى) نە ايتار ەدىڭىز؟ الدە تەك قانا ونەردىڭ ءورىسى ءۇشىن تەر توگىپ ءجۇرىپ ەلدە بولىپ جاتقان شيەلەنىسكەن ماسەلەلەر تۋرالى ويلانۋعا ۋاقىتتارىڭىز جەتپەي مە؟ جالپى «ياسساۋي» توبى دەگەندى ەستىپ پە ەدىڭىز؟ ولاردىڭ اۋەندەرى تۋرالى نە ايتاسىزدار؟
- ياسساۋي توبىنىڭ مۇشەسى ەلدوس ەمىلدى تالانتتى ءداستۇرلى ونەر وكىلى رەتىندە جاقسى باعالايمىز. تاعىلعان ايىپتار مەن الىپ-قاشپا اڭگىمەلەردەن بەيحابارمىز.
- مەنىكى سۇراق ەمەس، تىلەك. «مۋزارت» جىگىتتەرى، سىزدەر ەلدىڭ الدىندا جۇرگەن ازاماتتارسىزدار، سوندىقتان جاستار كوبىنە سىزدەردەن ۇلگى الادى. قازىر نەبىر سۇمدىقتار ورىن الىپ جاتىر، سىزدەردەن وتىنەرىم; يسلام ءدىنىن بۇگىن كورگەندەي بولىپ، جالعاننان «يسلام» دەپ، «ءدىن» دەپ ءوز بولمىسىن ۇمىتىپ، تەرىس جولعا ازىپ جاتقاندار قانشاما... سىزدەر سول جاعىن ەسكەرە جۇرسەڭىزدەر ەكەن. ءبىزدىڭ قازاقتىڭ باعزى زاماننان قالىپتاسقان، اتا-بابامىز امانات ەتكەن ۇلتتىق ءۇردىسىمىز بارىنەن قىمبات قوي، سونى ۇگىتتەسەڭىزدەر ەكەن!
- بولاشاعىمىزعا بەي-جاي قارامايتىنىڭىز قۋانتىپ وتىر. اللا تاعالا ەلىمىزگە، تىنىشتىق پەن اۋىزبىرشىلىك بەرسىن!
- اسسالاۋماعالەيكۋم، «مۋزارت»! مەنىڭ سۇراعىم: شىنىمدى ايتسام، انسامبلدەگى باس گيتارادا وينايتىن (ەسىمى ەرلان بولۋ كەرەك كاتەلەسپەسەم) اعامىز قىزىقتىرادى. ساحنادا ءوزىن ۇستاۋى ەرەكشە كورىنەدى ماعان. تەلەديداردان قاراپ وتىرساڭ، جۇزىندە ۇلكەن جۇمباق جاتقانداي... تۇيىق ادام سەكىلدى جانە ءوز ءىسىنىڭ شەبەرى سياقتى. بىراق، وسى كۇنگە دەيىن سول ازامات تۋرالى، ءومىربايانى، شىعارماشىلىقتاعى ءىس-ارەكەتتەرى تۋرالى ەش ءبىلىپ كورگەن ەمەسپىن. بىرگە جۇمىس ىستەيسىزدەر، سول اعامىز تۋرالى جالپى مىنەزدەمە بەرىپ كەتىڭىزدەرشى...
باقىلاۋشى

- توپتىڭ ءار مۇشەسى ءوز ءىسىنىڭ شەبەرى. ەرلان قۇلاحمەت يماندى، ونەرلى، اقكوڭىل ازامات.
- مەيرامبەكتى كورگەندە ، قازاق ءتىلىن مەنسىنبەيتىن ورىس ءتىلدى قىز-كەلىنشەكتەر كوزدەرى جايناپ، قازاقشا سويلەپ كەتەدى. مەيرامبەك ءوزىنىڭ قازاقى انىمەن، قازاقى بولمىسىمەن، قازاق دەگەن حالىقتىڭ قۇدىرەتىن مويىنداتادى. مەيرامبەكتىڭ ارتىقشىلىعى ۇلتتىق اندەردى، ماقاتاەۆ ايتقانداي شەكپەن جاۋىپ حالىقتىڭ وزىنە قايتارۋىندا. «مۇزارت» شىنىمەن-اق شىڭ باسىندا، وسى باعىتىنان تايماي، شۇلدىرلەكتەردى مىسىمەن باسىپ، قازاق ونەرىن الەمگە مويىنداتسىن! ءتىل-كوزدەن امان بولسىن! ۇشەۋى جاقسى ۇيلەسكەن،ءبىرى شىرقاتىپ، ءبىرى قوڭىر داۋسىمەن ايالاسا، كەنجەبەكتىڭ دە وزىندىك ماقامى بار. «مۇزارتتى» ماقتان تۇتامىز. ولاردىڭ اندەرى رۋحتى كوتەرەدى.
نۇرعايني اپكەلەرىڭ، شىعىس قازاقستان.

- ۇلكەن راحمەت!
- قايرات نۇرتاس پەن بەيبىت قورعان دەگەن انشىلەرگە قالاي قارايسىڭدار؟
- قالىڭ كورەرمەننىڭ ىستىق ىقىلاسىنا بولەنگەن، جاقسى كورەتىن ىنىلەرىمىز.
- «مۋزارتقا» قوياتىن سۇراعىم جوق. جىگىتتەر ەل الدىندا جۇرگەن سوڭ، قاناتتارىڭ تالماسىن،  جاقسى اندەرمەن بىزدەردى قۋانتىپ جۇرە بەرىڭىزدەر دەگىم كەلەدى.
- مىڭ العىس!
- اينالايىندار، مەن ەڭ باستىسى  - سىزدەردىڭ ۇلتشىلدىق، ازاماتتىق پوزيتسيالارىڭىزعا ءتانتىمىن!
ۇلكەن قۇرمەتپەن رۋزا اپايلارىڭ، كەرەكۋدەن

- جالاۋىمىز جەلبىرەي بەرسىن!
- سالەمەتسىزدەر مە، قۇرمەتتى «مۋزارت» توبىنىڭ انشىلەرى! ايتىڭىزدارشى، قازىر فونوگراممامەن ايتاتىن انشىلەر تولىپ جاتىر. ولاردى ب.تولەگەنوۆا اپامىز ايتقان سياقتى جۇلدىزدار تاراپىنا قوسۋدىڭ ءوزى ۇيات. سىزدەردىڭ كونتسەرتتەرىڭىزدى ءسۇيىپ تىڭدايمىن، بىراق كەيدە كۇمان بار: سىزدەر ءتىرى داۋىسپەن ايتاسىز دار ما؟ الدە كەيدە فونوگرامما دا پايدالاناسىزدار ما؟ قازىر ر.باعلانوۆا، ر.رىمباەۆا، م.ەراليەۆا سياقتى جاس انشىلەر بار ما؟ تىپتەن، قۇرمەتتى التىناي جوراباەۆا سياقتى بەتكە ۇستار ءانشىنىڭ ءوزى روزا باعلانوۆا اپامىزدىڭ «اقسۇڭقارىم» اتتى انىنە داۋىسى جەتپەي قالعانىن تەلەديدار بەتتەرىنەن كوردىم. وسى تۇستا ەكىنشى سۇراق: سىزدەر «قۇسني قورلان»، «گاۋحار تاس» ت.ب. ۆوكالدى تالاپ ەتەتىن اندەردى ايتاسىزدار ما؟ ءسۇيىپ تىڭدار ەدىك.  
قۋات باۋىرلارىڭىز

- ارينە، حالىق اندەرىن جازۋ ويدا بار.
- ءوز تاپقان قاراجاتتارىڭىزدان قاراجاتقا ءزارۋ جەتىم-جەسىرلەرگە كومەكتەسىپ تۇراسىزدار ما؟ جوق، ويىن-توي قىمبات زاتتارعا شىعىندايسىزدار ما؟
ويىن-توي، قىمبات زاتتارعا شىعىندانامىز دەگەن جاۋاپ كۇتىپ  پە ەدىڭىز؟
- وسى جولعى سايلاۋدا قاي پارتياعا داۋىس بەرگەندەرىڭىزدى سۇراۋعا بولا ما ؟ جاڭا پارلامەنتتى ەل تىلەگىنەن شىعا الادى دەپ قارايسىزدار ما؟
- «نۇر وتان» پارتياسىنا داۋىس بەردىك. ەل سايلاعان پارلامەنت ەل سەنىمىن اقتايدى دەپ ۇمىتتەنەمىز.
- سىزدەر وتە تالعامدى انشىسىزدەر. بىراق «ارمان، ارمان، ارمان-اي» (قىرعىزدىڭ ءانى), «ماحاببات گۇلى سولمايدى» سياقتى سولعىن اندەر رەپەرتۋارلارىڭىزعا قالاي كىرىپ كەتىپ ءجۇر؟ مەنىمەن پىكىرلەس قىز-جىگىتتەر وتە كوپ. ولار دا  ««مۇنداي اندەر» «مۋزارتتىڭ» دەڭگەيىن تومەندەتەدى، ولارعا لايىق ەمەس» دەپ ەسەپتەيدى. جالپى ءان تاڭداۋدا ەڭ باستىسى - قانداي كريتەريگە سۇيەنەسىزدەر؟
جامال، تاراز

- تالعامدا تالاس جوق. «ارمان-اي» مەن «ماحاببات گۇلى سولمايدى» اندەرىنىڭ تىڭدارماندارىن تالعامسىز دەپ تاپقانىڭىز با؟
- مەيرامبەك، ساكەن، كەنجەبەك، قازاعىمنىڭ ماڭدايىنا بىتكەن التىن داۋىستى انشىلەرىسىڭدەر، امان بولىڭدار! مەن سەندەردىڭ زامانداستارىڭمىن، تالاي رەت بالا كەزىمىزدە «بوزتورعايمەن» قوسىلىپ جىلاعانبىز، اسىرەسە، مەيرامبەك التىن داۋىسىمەن قازاق دالاسىن ۇيقىدان وياتتى ەمەس پە، بىراق ەلگە كوشىپ كەلگەن سوڭ ءبىر تاڭ قالعانىم سەندەردىڭ حالىققا قايىرىمدىلىق كونتسەرتىن بەرىپ جاتقاندارىڭدى كورمەپپىن. ەڭ بولماسا ءبىر جىلدا ءبىر اسىرەسە، تۇرمىسى ناشار، كوپ بالالى وتباستارىنا، جەتىم بالالارعا دەگەندەي. بالا كۇنىمىزدە انامىز ايتۋشى ەدى:  «وسكەندە جەمىس اعاشىنداي بول، جەمىسىڭ كوبەيگەن سايىن تومەنگە ءيىل»، دەپ، ال قازىرگى انشىلەر جەمىسسىز اعاش سياقتى تەك قانا بيىككە ۇمتىلاتىن سەكىلدى. حالىقتى ۇمىتپاڭدار! قازاعىڭ سەندەردى سۇيەدى، ارداقتايدى، ماقتان ەتەدى.
- اللا رازى بولسىن!
- كوممەرتسيالىق راديولاردان باستاپ كادىمگى «قازاق» راديوسى مەن «شالقاردا» شالقيتىن اندەردى ەفيرگە جىبەرەر الدىندا كوركەمدىك كەڭەستىڭ رۇقساتى كەرەك سياقتى. ياعني، كوركەمدىك كەڭەستىڭ تالابىنان وتكەن، كەڭەس مۇشەلەرى قابىلداعان اندەر عانا راديودان بەرىلسە دەگەن ويدامىن. ساكەن، مەنىڭ وسى ۇسىنىسىما قالاي قارايسىڭدار؟ نەگە مۇنداي ۇسىنىس ايتىپ وتىرعانىمدى بىلەسىڭدەر عوي؟
جاميعات

- ول مادەنيەت مينيسترلىگى مەن راديو قىزمەتكەرلەرىنىڭ قۇزىرىنداعى دۇنيە. دەسەك تە، انشىلەر تاراپىنان دا تالاپ-تىلەكتەر بولىپ جاتىر.
- جوعارىدا ساۋال قويعان ازاماتتاردىڭ قايسىبىرى سەندەردى ساياساتقا ارالاستىرعىسى كەلىپتى. باتىس انشىلەرىنەن نەگە ۇلگى المايسىڭدار دەپتى. سەندەردىڭ دە ۇلتتىق ماسەلەدەن، اسىرەسە، تىلگە قاتىستى اشىق حاتتار مەن جيىنداردان تارتىنىپ قالمايتىندارىڭدى جاقسى بىلەمىن. ايتسەدە وسى ساياساتى قۇرعىردان اۋلاق جۇرىڭدەرشى. بەكەرگە كۇيىپ كەتەسەڭدەر. بىزدە كاسىبي ساياساتشى دا، دەنى دۇرىس ساياسات تا جوق. انمەن الديلەپ تە قازاقتىڭ جۇرەگىن وياتۋعا بولادى. انمەن دە ۇلتتىق ساياسات جۇرگىزۋگە بولادى. سولاي ەمەس پە؟ الدە مەن قاتەلەسەمىن بە؟
قاناعات كوكەلەرىڭ

- ۇلكەن راحمەت، ۇرپاقتارىڭىز ونەرلى بولسىن!
- ءشامشى اعامىز بولسىن، ءابىلاحات اعامىز بولسىن، ءىليا اعامىز بولسىن، ت.ب. سازگەرلەر كەرەمەت اندەر شىعاراسا دا ساحنادا ءان ايتپاعان عوي. قازىرگى كومپوزيتورلار ءبىر ءان شىعارسا ءبىتتى، ساحانا مەن تەلەارناعا قاراي ەمپەڭدەي جونەلەدى. مىسالى، گاۋحار الىمبەكوۆانى ءوز باسىم تالانتتى كومپوزيتور دەپ بىلەمىن. ءتاپ-ءتاۋىر ءانشى. ءوزى ءان شىعارىپ، ءوزى ورىنداپ جۇرەدى. بىراق «اق كەلىنگە» دەيىن كەڭىنەن تانىمال بولدى دەي المايمىن. ال، سەندەر گاۋحاردىڭ ءبىر ءانىن، جاڭىلىسپاسام «ءبىر تامشى كوزدىڭ جاسىنداي» ءانىن ايتىپ ەدىڭدەر، الگى ءان قۇلپىرىپ شىعا كەلدى. بارشا جۇرت سەندەرمەن بىرگە سول ءاندى ايتىپ كەتتى. سۇراعىم: كومپوزيتورلارمەن ءجيى ارالاساسىزدار، سولارعا «مىنا ءاندى بىزدەر، انشىلەر، ايتايىق، سەندەر قويا تۇرىڭدار» دەسەڭدەر بولماي ما؟ جالپى وسى «جۇلدىز» بولۋعا ۇمىتىلۋدىڭ قانشالىقتى قاجەتى بار؟
الدىڭعى تولقىن اعالاردىڭ اڭىزعا بەرگىسىز دوستىعى ءجيى ايتىلادى. سول كەزدەگى تۆورچەستۆو ادامدارىنىڭ اراسىندا دوستىق، سىيلاستىق كەرەمەت بولعانعا ۇقسايدى. ولار سول دوستىقتارىنىڭ ارقاسىندا قازاق رۋحانياتى ءۇشىن كەمەل دۇنيەلەر جاساپ كەتتى. سونداي دوستىق بۇگىنگى تولقىننىڭ اراسىندا بار ما؟ مەنىڭشە، كومپوزيتورلار ءوز بەتىمەن («تۇيەنىڭ تانيتىنى جاپىراق» دەمەكشى ولاردىڭ بىلەتىنى - ءشومىشباي ساريەۆ جانە ءشومىشباي ساريەۆ), اقىندار ءوز بەتىمەن، سۋرەتشىلەر ءبىر بولەك، تەاتر اكتەرلارى ءبىر بولەك جەكە-جەكە لاعىپ، اۋا جايىلىپ جۇرگەن سياقتى. جاس تولقىننىڭ ءۇنى ەلگە تولىق جەتپەي جاتۋىنىڭ ءبىر سەبەبى وسىندا ما دەپ ويلايمىن. سەندەر نە دەيسىڭدەر؟
زامانداستارىڭ زاتتىبەك.

- راحمەت، زاكە، ءۋاجىڭىز ورىندى.

- بۇرىن ورىس تىلىندە ءان ايتاتىن ەسترادالىق انشىلەردىڭ كەنەتتەن قازاقشاعا بەت بۇرۋىنىڭ سەبەبىن نەمەن تۇسىندىرە الاسىڭدار؟ ەسترادا دا جۇرگەن جىرتاقبايلاردى توقتاتۋ سەندەردىڭ مىندەتتەرىڭ ەمەس، بىراق، سولاردى باسەكەلەستىك ارقىلى، ەلدىڭ رۋحاني تالعامىن ءوسىرۋ ارقىلى ىعىستىرۋعا بولا ما؟ الدە بۇگىنگى كوپشىلىك مادەنيەتى وندايعا جول بەرمە مە؟
- تاۋەلسىزدىك العان جىلدارى قازاق ەستراداسىنىڭ بولاشاعى بۇلىڭعىر بولعانى جاسىرىن ەمەس. سول كەزدە تىڭنان تۇرەڭ سالىپ، قازاق ەستراداسىنىڭ كوشىن باستاعان «ابك» تريوسى ەدى. سول جىلدارمەن سالىستىرعاندا قازىر قازاق انشىلەرىنىڭ كوبەيۋىنە قۋانۋىمىز كەرەك. قازاق ەستراداسى دەگەندە «دۋەت ل»، پ. نازاروۆ، ك. لي، «ار-كلۋبتارعا» توسقاۋىل بولا بىلگەن «ابك» عانا بولاتىن.
- سالەم، «مۇزارت»، جىگىتتەر!
سىزدەر قازاقتىلدى ەستراداداعى قۇبىلىس بولۋ ارقىلى قازاق كورەرمەنىن ەسترادالىق الاڭعا «دوس-مۇقاساننان» كەيىن الىپ شىققان توپسىزدار. سول ارقىلى تىلىمىزگە دە وڭدى اسەر ەتۋدەسىزدەر. بولاشاقتا ءتىل شاراسىن وتكىزسەك، سىزدەردەن قولداۋ كۇتە الامىز با؟

- قازاق ءتىلىن قولداۋ اياسىندا ءوتىپ جاتقان ءىس-شارالاردان قالىپ تا جۇرگەن جوقپىز. قولىمىزدان كەلگەنشە اتسالىسىپ ءجۇرمىز. اتسالىسا بەرەمىز دە! مەملەكەتتىك ءتىلىمىزدىڭ مارتەبەسى جوعارى بولسىن!

ۋاقىتتىڭ تاپشىلىعىنا بايلانىستى بىرتەكتى سۇراقتاردىڭ باسىن بىرىكتىرىپ، ءبىر-اق جاۋاپ بەرۋگە تىرىستىق. كەيبىر ۇسىنىس، ساۋالدارىڭىزعا جاۋاپ بەرە الماساق كەشىرىم وتىنەمىز. بولاشاقتا دا بايلانىستا بولامىز دەگەن ۇمىتتەمىز. ۇلكەن راحمەت!
سىزدەر مەن بىزدەردى قاۋىشتىرىپ، التىن كوپىر بولا بىلگەن «اباي.كز» اقپاراتتىق پورتالىنىڭ ۇجىمىنا العىس بىلدىرەمىز!

سوڭى

«اباي-اقپارات»

0 پىكىر