"ۇلكەن جيىرمالىق" (G20) ەلدەرىنىڭ ليدەرلەرى سامميت قورىتىندىسى بويىنشا ارنايى دەكلاراتسيا قابىلداۋعا كەلىستى.
وندا نەگىزگى ماسەلە – Covid پاندەمياسىمەن جانە سونىڭ سالدارىنان پايدا بولعان عالامدىق رەتسەسسيامەن كۇرەس. ەل باسشىلارى كوروناۆيرۋستىڭ تاراۋى باقىلاۋعا الىنعاننان كەيىنگى ەكونوميكالىق ءوسىمدى ىنتالاندىرۋ شارالارى تالقىلاندى.
ءسامميتتى اشقان ساۋد ارابيا كورولى سالمان بەن ابدەل ءازيز Covid-پەن كۇرەس قۇرالدارىنا ءبارىنىڭ بىردەي قولى جەتۋى ءتيىس ەكەنىن ايتتى دەيدى "امەريكا داۋىسى" راديوسى. ءازيز اتاپ وتكەن قۇرالدارعا ۆاكتسينا دا جاتادى.
ەۋرووداق "ۇلكەن جيىرمالىققا" مۇشە ەلدەرگە پاندەميا جاعدايىنداعى ورتاق ارەكەت تۋرالى حالىقارالىق كەلىسىمگە قول قويۋدى ۇسىنباق.
الەمدىك ەكونوميكانىڭ قالىپقا كەلۋى بىرىڭعاي ءجۇرىپ جاتقان جوق، ال پاندەميا كوپتەگەن ەلگە اۋىر زارداپ تيگىزۋى مۇمكىن، دەيدى حالىقارالىق ۆاليۋتا قورى. ال بۇۇ باس حاتشىسى انتونيۋ گۋتەرريشتىڭ سوزىنشە، قارىزى كوپ كەدەي ەلدەر "قارجىلاي قۇلدىراۋدىڭ، جوقشىلىقتىڭ، اشارشىلىقىڭ جانە سوزبەن سيپاتتاۋعا كەلمەيتىن قاسىرەتتىڭ الدىندا تۇر".
بۇل ماسەلەنى شەشۋ ءۇشىن G20 ەلدەرى دامۋشى ەلدەردىڭ نەسيە تولەۋىن 2021 جىلدىڭ ورتاسىنا دەيىن توقتاتا تۇرۋ تۋرالى ءموراتوريدى ماقۇلدايدى دەپ كۇتىلىپ وتىر. موراتوري ودان ءارى ۇزارتىلۋ قۇقىعىمەن قابىلدانباق، دەلىنگەن G20 كومميۋنيكەcى جوباسىندا.
گەرمانيا كانتسلەرى انگەلا مەركەل "ۇلكەن جيىرمالىق" ءسامميتىنىڭ قاتىسۋشىلارىن مۇقتاج ادامداردىڭ بارىنە كوروناۆيرۋس ۆاكتسيناسىن بەرۋ ءۇشىن تيىمدىرەك ارىپتەستىككە شاقىردى. ول قولدا بار قارجىنىڭ بۇل مىندەتتى ورىنداۋعا جەتپەيتىنىن ايتتى. مەركەلدىڭ سوزىنشە، قازىر ءجۇرىپ جاتقان حالىقارالىق ناۋقان 2021 جىلدىڭ سوڭىنا دەيىن 2 ميلليارد ۆاكتسينانى قولجەتىمدى ەتۋى كەرەك. ول ءۇشىن قازىردىڭ وزىندە 5 ميلليارد دوللارعا جۋىق قاراجات جينالعان. گەرمانيا ۇلەسى 500 ميلليون دوللاردان اسادى. بۇل تۋرالى "نەمىس تولقىنى" حابارلادى.
تاسس اگەنتتىگى رەسەي پرەزيدەنتى ۆلاديمير ءپۋتيننىڭ سامميتتە سويلەگەن ءسوزىنىڭ تەزيستەرىن جاريالادى. ول رەسەيدىڭ مۇقتاج ەلدەردى ۆاكتسينامەن قامتاماسىز ەتۋگە دايىن ەكەنىن، سامميت قاتىسۋشىلارىنىڭ ءتيىمدى ءارى قاۋىپسىز ۆاكتسينالاردى بارىنە قولجەتىمدى ەتۋ قاجەتى جونىندەگى مالىمدەمەسىن قولدايتىنىن ايتتى. رەسەي باسشىسى سونداي-اق كوروناۆيرۋسپەن كۇرەسكە قانشا قاراجات جۇمسالعانىن دا اتاپ ءوتتى.
"رەسەي پاندەميا سالدارىن ازايتۋ ءۇشىن جالپىۇلتتىق ىشكى ءونىمىنىڭ 4,5 پايىزىن جۇمسادى" دەدى ول.
Abai.kz
