2020 جىلدىڭ 10 ايىندا 10,7 ملن م² تۇرعىن ءۇي پايدالانۋعا بەرىلگەن. ياعني، بيىلعى جىلدىڭ قاڭتار-قازان ايلارىندا پايدالانۋعا بەرىلگەن باسپانا كولەمى وتكەن جىلمەن سالىستىرعاندا 9,7%-كە ارتقان. ال، «نۇرلى جەر» باعدارلاماسى بويىنشا جىلدىق جوسپار بۇگىنگى تاڭدا 75,8%-كە ورىندالعان. 

جالپى، رەسپۋبليكا بويىنشا بارلىعى 94 737 تۇرعىن ءۇي پايدالانۋعا بەرىلگەن. ونىڭ 34 535-ءى جەكە ءۇي. تۇرعىن ءۇي سالاسى بويىنشا 15 وڭىردەن ءوسىم بايقالادى. ولار: شىعىس قازاقستان - 116,7%، سولتۇستىك قازاقستان وبلىسى - 112,5%، قاراعاندى - 110,3%، پاۆلودار - 109,6%، قوستاناي - 109,5%، الماتى قالاسى 108,5 پايىز، تۇركىستان وبلىسى - 107,9 پايىز، جامبىل وبلىسى - 107 پايىز، باتىس قازاقستان وبلىسى - 102,7 پايىز، اقمولا وبلىسى - 101,6 پايىز، ماڭعىستاۋ - 100,9 پايىز، اقتوبە - 100,5 پايىز بولسا، نۇر-سۇلتان قالاسى 154,6 پايىز، الماتى قالاسى - 103,6 پايىز جانە شىمكەنت قالاسى 103,1 پايىز بولعان. سايكەسىنشە، باسپانانى پايدالانۋعا بەرۋ كورسەتكىشى ەكى وڭىردە باسەڭدەگەن. ولار قىزىلوردا - 91 پايىز جانە اتىراۋ وبلىسى - 88,4 پايىز.

ال، قر يندۋستريا جانە يننوۆاتسيالىق دامۋ مينيسترلىگىنىڭ قۇرىلىس جانە تۇرعىن ءۇي كوممۋنالدىق شارۋاشىلىق ىستەر كوميتەتىنىڭ توراعاسى مارحابات جايىمبەتوۆتىڭ ايتۋىنشا، 2020 جىلى 150 مىڭنان استام جانۇيا باسپانا جاعدايىن جاقسارتادى.

«2020 جىلى 15 ميلليون شارشى مەتر تۇرعىن ءۇي سالۋ تۋرالى مىندەتتەمە قابىلدانعان. 150 مىڭنان استام وتباسى تۇرعىن ءۇي جاعدايلارىن جاقسارتادى. بۇل مەملەكەتتىك ينۆەستيتسيالار ەسەبىنەن جاسالماق. ولاردىڭ ىشىندە 39 مىڭعا جۋىق وتباسى باسپانامەن قامتاماسىز ەتىلەدى»،- دەدى كوميتەت توراعاسى.

ونىڭ ايتۋىنشا، مەملەكەتتىك قولداۋ كولەمى وتكەن جىلمەن سالىستىرعاندا 1,5 ەسەگە وسكەن.

مەملەكەت باسشىسى قاسىم-جومارت توقاەۆتىڭ تاپسىرماسى نەگىزىندە بيىل «5-10-20» دەپ اتالاتىن پيلوتتىق جوبا ىسكە قوسىلعان. بۇل تۇرعىن ءۇي كەزەگىندە تۇرعان ازاماتتاردىڭ ماسەلەسىن شەشىپ بەرۋگە باعىتتالعان. ول ءۇشىن ۇلتتىق بانك 390 ميلليارد تەڭگە بولگەن. ونىڭ 180 ميلليارد تەڭگەسى كرەديتتىك تۇرعىن ءۇي سالۋ ءۇشىن وڭىرلەرگە اۋدارىلعان. جالپى، 15,2 مىڭ پاتەر سالۋ جوسپارلانىپتى.

سونىمەن قاتار، مارحابات جايىمبەتوۆ بيىل 5 مىڭعا جۋىق كوپبالالى وتباسى تۇرعىن ۇيمەن قامتاماسىز ەتىلەتىنىن ايتتى.

«وتكەن جىلى جىلدىق 2 پايىزبەن جەڭىلدەتىلگەن نەسيە بەرەتىن «باقىتتى وتباسى» باعدارلاماسى ىسكە قوسىلدى.تولىق ەمەس جانە كوپبالالى وتباسىلاردىڭ، سونداي-اق مۇگەدەك بالالارى بار وتباسىلاردىڭ اتالعان باعدارلاما بويىنشا قايتالاما جانە باستاپقى نارىقتاردان تۇرعىن ءۇي ساتىپ الۋعا مۇمكىندىگى بار.

2019 جىلى 5 مىڭعا جۋىق وتباسى تۇرعىن ءۇي جاعدايلارىن جاقسارتتى. ال، 2020 جىلى بۇل ماقساتقا 49,1 ميلليارد تەڭگە ءبولىنىپ، 4900 جانۇيا قولداۋمەن قامتاماسىز ەتىلەدى. بۇگىنگى تاڭدا «تۇرعىن ءۇي قۇرىلىس جيناق بانكىنە» ازاماتتاردان 4769 ءوتىنىش تۇسكەن. ولاردىڭ 4074-ىنە نەسيە بەرىلدى»،- دەدى جايىمبەتوۆ.

كوميتەت توراعاسىنىڭ ايتۋىنشا، تابىسى ەڭ تومەنگى كۇنكورىس دەڭگەيىنەن اساتىن، الەۋمەتتىك جاعىنان از قامتىلعان توپتار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ۇيلەر سالىنادى.

سونىمەن قاتار، جالعا بەرىلەتىن 3 700 پاتەردى ساتىپ الۋ مەن سالۋعا 32,8 ملرد.تەڭگە ءبولۋ قاراستىرىلعان. ال، 2020 جىلى الەۋمەتتىك جاعىنان از قامتىلعان 4 222 وتباسى باسپانامەن قامتاماسىز ەتىلمەك.

جالپى، بۇگىنگى تاڭدا قازاقستاندا 530 مىڭنان استام ازامات باسپانا كەزەگىندە تۇر. ال، 2020 جىلى 4 835 كوپبالالى وتباسىن تۇرعىن ۇيمەن قامتاماسىز ەتۋ جوسپارلانعان.

Abai.kz