جەكسەنبى, 17 قاڭتار 2021
1502 17 پىكىر 27 قاراشا, 2020 ساعات 13:06

قىرعىزدار ورىس تىلىنەن باس تارتا ما؟

كۇنى كەشە قىرعىزستان كونستيتۋتسيالىق كەڭەسىندە قوعام قايراتكەرى ساديردين توراليەۆ ورىس ءتىلىن رەسمي مارتەبەسىنەن الىپ تاستاۋ تۋرالى ۇسىنىس ايتتى. بۇل جونىندە 24.kg مالىمدەدى.

ونىڭ ايتۋىنشا، قازىر قىرعىز جاستارى ءوز انا ءتىلىن ۇمىتىپ بارا جاتىر.

«بۇل راديكالدى بولىپ كورىنۋى مۇمكىن. بىراق مەن - مەملەكەتتىك ءتىل رەتىندە تەك قىرعىز ءتىلىن قالدىرۋدى ۇسىنامىن. ءبىز باسقا تىلدەردى باسقا زاڭدارمەن دامىتاتىن بولامىز. قازىر ورىس ءتىلى رەسمي مارتەبەگە يە. ءبىز وعان ۇيرەنىپ، بايلانعان يتتەي بولىپ وتىرمىز. بۇلاي بولماۋى كەرەك»، - دەدى ول.

سونىمەن قاتار توراليەۆ بولاشاقتا قىرعىز ءتىلى جويىلىپ كەتپەۋى ءۇشىن ونى دامىتۋعا جاعداي جاساۋ كەرەكتىگىن ايتتى.

«جاستار نەگە قىرعىز ءتىلىن ۇيرەنبەيدى؟ سەبەبى وعان قاجەتتىلىك جوق. ءسىز سول قاجەتتىلىكتى جاساۋىڭىز كەرەك. سوندا عانا بارلىعى قىرعىز ءتىلىن ۇيرەنىپ، سويلەيتىن بولادى»، - دەدى قوعام قايراتكەرى.

توراليەۆتىڭ بۇل ءسوزى كونستيتۋتسيالىق جينالىستا ءبىراز تالقىعا ءتۇسىپتى. الايدا، بۇگىن كونستيتۋتسيالىق جينالىستىڭ «ادام جانە ازامات قۇقىقتارى مەن بوستاندىقتارى» ءبولىمىنىڭ جەتەكشىسى نۇرلان شەريپوۆ ونلاين بريفينگ وتكىزىپ، ورىس ءتىلى قىرعىزستاننىڭ رەسمي ءتىلى بولىپ قالا بەرەتىنىن مالىمدەدى.

ونىڭ ايتۋىنشا، ءارتۇرلى ۇسىنىستار بولعان، بىراق كونستيتۋتسيالىق جينالىس مۇشەلەرى نەگىزگى زاڭدا قىرعىز ءتىلىن مەملەكەتتىك ءتىل، ورىس ءتىلىن ەلدىڭ رەسمي ءتىلى رەتىندە قالدىرۋ تۋرالى شەشىم قابىلداعان.

«ورىس ءتىلى رەسمي ءتىل بولىپ قالا بەرەدى. كونستيتۋتسيالىق ءماجىلىس قىرعىز ءتىلىن مەملەكەتتىك ءتىل، ال ورىس ءتىلىن رەسمي ءتىل رەتىندە بەكىتتى. اعىلشىن ءتىلىن ەنگىزۋ تۋرالى ۇسىنىستار بولدى، بىراق ءبىز كونستيتۋتسيانىڭ وسى بولىگىندەگى تۇجىرىمداماسى قالادى دەپ شەشتىك»، - دەدى ول.

ايتا كەتەيىك، قازىر قىرعىزستاندا جاڭا كونستيتۋتسيا جوباسى قوعامدىق تالقىلاۋعا ۇسىنىلدى. ونىڭ ءماتىنى پارلامەنتتىڭ رەسمي سايتىندا جاريالانعان.

Abai.kz

17 پىكىر