قازاقستان رەسپۋبليكاسى پرەزيدەنتى قاسىم-جومارت توقاەۆ،

قر ىشكى ىستەر ءمينيسترى ەرلان تۇرعىمباەۆ مىرزالاردىڭ نازارىنا!

زامانىمىزدىڭ عۇلاما جازۋشىسى ءابىش كەكىلبايۇلى «تəۋەلسىزدىگىمىزدى سىرتتىڭ الاكوزدىگىنەن، ءىشتىڭ الاۋىزدىعىنان امان ساقتاپ قالۋ - ءبىزدىڭ تاريح الدىنداعى ەڭ باستى پارىزىمىز» دەگەن بولاتىن.

ازىرگە، سىرتقى ەلدەرمەن ساياساتىمىز جامان ەمەس، قازاقستانعا الاكوزدەنىپ، وشىگىپ، وتىرعان ەل جوق.

بىراق، ىشكى الاۋىزدىعىمىزدىڭ بارىن جاسىرا المايمىز. ادىلەتسىزدىك بولعان جەردە، نارازىلىق تۋادى، نارازىلىق شەشىلمەسە، الاۋىزدىققا اپارادى، الاۋىزدىق تەكەتىرەسكە، تەكەتىرەستى توقتاتپاساق ءتۇبى تولقۋعا، تولقۋ تاۋەلسىزدىككە قاتەر توندىرەدى.

سوندىقتان دا، بيلىك باسىنداعى باسشىلاردىڭ ءاربىر شەشىمى ادىلەتتى، زاڭدى بولۋى كەرەك. ال كادر ساياساتىندا وتە جاۋاپتى، جان-جاقتى بولعان ابزال. حالىق ءبارىن ءبىلىپ، كورىپ وتىر. ەندىگى جەردە جەرگىلىكتى ءبىلىمدى دە بىلىكتى ماماندار بولا تۇرىپ، سىرتتان كادر اكەلىپ، وعان مەملەكەتتەن قارجى ءبولىپ كوشىرىپ، ءۇي جالداپ، جاعداي جاساپ ءجۇرۋدىڭ قانداي قاجەتى بار؟ باسقانى بىلمەيمىن، ماڭعىستاۋ وبلىسىندا سوڭعى جارتى عاسىردا پوليتسيا باسشىسى بولىپ بىردە-ءبىر جەرگىلىكتى ازامات باسقارىپ كورگەن ەمەس. سوندا بۇل ادىلدىك پە؟! الدە، جەرگىلىكتى ءبىلىمدى دە، بىلىكتى ازاماتتارعا دەگەن سەنبەستىك پە؟! سەبەبىن بىلە المادىم، ءسوزىم ناقتى فاكتى بولۋ ءۇشىن دالەل كەلتىرەيىن.

بۇل 47 جىل بويى ماڭعىستاۋ وبلىسىنىڭ ىشكى ىستەر باسقارماسىن باسقارعان ازاماتتاردىڭ ءتىزىمى.

1. 1973-1986 گەنەرال-مايور براگين يۆان نيكيتوۆيچ;

2. 1986-1988 گەنەرال-مايور رۋبيانسكي ۆلاديمير گەورگيەۆيچ;

3. 1990-1994 گەنرەرال-مايور امانجولوۆ مايدان مولداباشۇلى (سەمەي 1942 ج);

4. 1994-1995, 1997-1999 گەنەرال-مايور دوسقاليەۆ حيبراتۋللا ەرمەكوۆيچ (استراحانسكي وبلاست 1955);

5. 1995-1997 پولكوۆنيك ماماتوۆ حاميت ابدۋلۇلى (شىعىس قازاقستان وبلىسى);

6. 1999-2001 پولكوۆنيك پريحودكا نيكولاي يۆانوۆيچ (الماتى قالاسى);

7. 2001-2002 گەنەرال-مايور بايجاساروۆ بولات زەينەتۋللاۇلى (قاراعاندى وبلىسى 1955 جىل);

8. 2002-2003 گەنەرال-مايور مۋرزاباەۆ قايىرعالي جۋمابايۇلى (اتىراۋ وبلىسى، ماحانبەت اۋدانى 1950);

9. 2003-2006 پولكوۆنيك شاحمانوۆ سەرىك گابدۋللاۇلى (پاۆلودار وبلىسى);

10. 2006-2007 پولكوۆنيك سابۋروۆ دالەلحون كامالبەكۇلى (قىرعىز رەسپۋبليكاسى، وش وبلىسى);

11. 2007-2009 پولكوۆنيك ابلازيموۆ ماحسوتحان نۋگمانۇلى (وڭتۇستىك قازاقستان وبلىسى);

12. 2009-2012 كابىلوۆ امانجول جايگاليەۆيچ (اتىراۋ وبلىسى);

13. 2012-2013 گەنەرال-مايور جامانبيەۆ مەيرحان ساعىنبەكۇلى (جامبىل وبلىسى);

14. 2013-2017 گەنەرال-مايور دالبەكوۆ كايرات سۇلتانبايۇلى (وڭتۇستىك قازاقستان وبلىسى);

15. 2017 تايمەردەنوۆ قانات دانيارۇلى (الماتى وبلىسى، 1974 ج).

بۇل ازاماتتاردىڭ جۇمىستارىنا ەشقانداي كۇمان، كەلتىرە المايمىن، بىراق جارتى عاسىردىڭ ىشىندە نەگە ماڭعىستاۋدىڭ جەرگىلىكتى ءبىر ازاماتى پوليتسياعا باسشىسى بولعان جوق؟ نەگە ماڭعىستاۋ پوليتسياسىنان بىردە-ءبىر گەنەرال شىققان جوق؟ ءبىلىمى تايىز با، باسقارۋشىلىق قابىلەتى جوق پا، الدە ماڭعىستاۋلىق بولعانى ءۇشىن بە؟!

جاۋاپ جوق، مۇمكىن جاۋابىن ءسىز ايتاتىن بولارسىز گەنەرال مىرزا؟!

ال جاقىندا الەۋمەتتىك جەلىدە ماڭعىستاۋ وبلىسىنىڭ پوليتسيا باسشىسى تايمەردەنوۆ قانات دانيارۇلى جۇمىسى اۋىسىپ كەتەدى ەكەن دەگەن حابار شىقتى. بۇل راس پا؟ ماڭعىستاۋعا تاعى دا باسقا وبلىستان باسشى تاعايىندايسىز با؟

الدە، جەرگىلىكتى كادر قوياسىزدار ما؟!.

جانىبەك قوجىقتىڭ جازباسى

Abai.kz