پرەزيدەنت قاسىم-جومارت توقاەۆ مەملەكەتتىك ناگرادالار مەن سىيلىقتار تاپسىرۋعا ارنالعان سالتاناتتى راسىمگە قاتىستى. ول ءوز سوزىندە جيىنعا قاتىسۋشىلاردى تاۋەلسىزدىك كۇنىمەن قۇتتىقتاپ، تاۋەلسىزدىك – مەملەكەتتىگىمىزدىڭ التىن دىڭگەگى، دەربەستىگىمىزدىڭ بەرىك نەگىزى ەكەنىن اتاپ ءوتتى.    

- تاريحى باي، تامىرى تەرەڭ قازاق ەلى ءۇشىن بۇدان اسقان قاستەرلى قۇندىلىق جوق. ونى ەڭ قىمبات قازىناعا، ەڭ اسىل اماناتقا بالايمىز. سوندىقتان، بابالار اڭساعان تاۋەلسىزدىكتىڭ قادىرىن جان-جۇرەگىمىزبەن سەزىنەمىز. ەگەمەندىك – ءار حالىققا بۇيىرا بەرمەيتىن باعا جەتپەس باقىت. تاۋەلسىزدىك شەجىرەسى تۇڭعىش پرەزيدەنتىمىز – ەلباسىنىڭ تاريحي تۇلعاسىمەن تىعىز بايلانىستى، - دەدى پرەزيدەنت.

قاسىم-جومارت توقاەۆ پاندەميا سالدارىنان ەلىمىزدىڭ باستى ۇلتتىق مەرەكەسىن كەڭ كولەمدە اتاپ ءوتۋ مۇمكىن بولماعانىن ايتتى.

ازاماتتارىمىزدىڭ دەنساۋلىعى، ءومىرى جانە ءال-اۋقاتى بارىنەن جوعارى تۇرادى. سوندىقتان بارلىق ءىس-شارا شەكتەۋلى فورماتتا جانە ونلاين رەجيمدە وتەدى. بىراق بۇل جاعداي تاۋەلسىزدىك كۇنىنىڭ قۇنى مەن ماڭىزىن ەش تومەندەتپەيدى. پرەزيدەنت ۇلىق مەرەكەنىڭ سالتاناتتى رۋحى ءار شاڭىراقتى شاتتىققا بولەپ، ءار قازاقستاندىقتىڭ جۇرەگىن قۋانىشقا تولتىراتىنىنا سەنىم ءبىلدىردى.

- پرەزيدەنت لاۋازىمىنداعى مەنىڭ باستى مىندەتىم – الەۋمەتتىك ادىلدىك جانە حالىقتىڭ ءال-اۋقاتىن ارتتىرۋ. سوندىقتان مەملەكەتتىڭ كۇندەلىكتى ءىس-ارەكەتى ازاماتتارىمىزدىڭ تۇرمىس ساپاسىن جاقسارتۋعا باعىتتالادى. بيىل 4 ميلليونعا جۋىق ازاماتتىڭ زەينەتاقىسى مەن الەۋمەتتىك تولەماقىلارىنىڭ كولەمىن وسىردىك. الەۋمەتتىك ساقتاندىرۋ تولەماقىسىن 5 پايىزعا كوبەيتتىك. از قامتىلعان وتباسىلاردىڭ 500 مىڭنان استام بالالارى ءۇشىن كەپىلدەندىرىلگەن الەۋمەتتىك توپتاما ەنگىزدىك. پاندەميا كەزىندە قيىن جاعدايعا تاپ بولعان ادامدارعا قولداۋ كورسەتۋ ءۇشىن وڭىرىمىزدە بۇرىن-سوڭدى بولماعان قادامعا باردىق. ازاماتتارعا 42500 تەڭگە كولەمىندە تىكەلەي تولەماقى بەرىلدى. مەملەكەتتەن 4,5 ميلليوننان استام ادام قارجىلاي كومەك الدى. نەسيەلەردىڭ شەگەرىلۋى 1 ميلليون 900 مىڭعا جۋىق قازاقستاندىقتىڭ دەفولتقا تۇسۋىنە جول بەرمەدى، – دەدى قاسىم-جومارت توقاەۆ.

پرەزيدەنت گەوستراتەگيالىق بەلگىسىزدىك جاعدايىندا مەملەكەتتەردىڭ حالىقارالىق ارەناداعى ساياسي وزىمشىلدىگى مەن ەكونوميكالىق ۇلتشىلدىعى كۇشەيەتىنىنە نازار اۋداردى. بۇگىندە حالىقتاردىڭ جاھاندىق مارتەبەسى كوبىنەسە تەحنولوگيالىق كوشباسشىلىق ءۇشىن بولاتىن قاتاڭ باسەكەدە انىقتالادى.

- ەل دامۋىنىڭ سىرتقى جانە ىشكى مىندەتتەرىنىڭ ءوزارا ۇيلەسىمدى ۇشتاسۋىنىڭ ماڭىزى ارتىپ كەلەدى. ءبىز قازاقستاننىڭ شىنايى باسەكەگە قابىلەتتىلىگىن ارتتىرۋ ءۇشىن بارلىق كۇش-جىگەرىمىزدى جانە رەسۋرستارىمىزدى جۇمىلدىرۋىمىز قاجەت. بۇگىندە ۇلتتىڭ شوعىرلانۋى جانە ءاربىر ازاماتتىڭ تاۋەلسىزدىك قۇندىلىقتارىنا شەكسىز قىزمەت ەتۋى وتە ماڭىزدى. ءبىز كوپجاقتى قۇرىلىمدار مەن بۇۇ ءرولىن كۇشەيتۋگە ىقپال ەتە وتىرىپ، حالىقارالىق قاۋىپسىزدىك جۇيەسىن نىعايتۋ جولىنداعى سىرتقى باعدارىمىزدى جالعاستىرا بەرەمىز. ۇلتتىق مۇددەلەرىمىزدى قاتاڭ ۇستانىپ، زاماناۋي كوپجاقتى الەمدە تيىمدىلىگىن دالەلدەگەن ۇيلەسىمدى ءارى سىندارلى سىرتقى ساياساتىمىزدى دايەكتى جۇرگىزەمىز، – دەدى مەملەكەت باسشىسى.

قاسىم-جومارت توقاەۆ  تاۋەلسىزدىگىمىزدىڭ 29-شى جىلى كۇردەلى، قيىن ءارى ەرەكشە بولعانىن اتاپ ءوتتى. مۇنداي تاعدىرشەشتى سىناقتار ءار ۇرپاقتىڭ باسىنا تۇسە بەرمەيدى. جاھاندىق داعدىرىستى ەڭسەرگەن مەملەكەتىمىز بۇدان دا زور ماقساتتار مەن مىندەتتەردى كوزدەيدى.

- الداعى جىل – مەجەلى كەزەڭ. بۇل جىل ەل تاۋەلسىزدىگىنىڭ 30 جىلدىعى اياسىندا وتەدى. بۇل وتكەنگە كوز جۇگىرتىپ، قورىتىندى جاسايتىن ۋاقىت. حالقىمىز ءۇشىن وسى ماڭىزدى داتانى ناقتى ىستەرمەن جانە جاڭا جوبالارمەن قارسى الامىز. داڭعازا اقتسيالار مەن داۋرىقپا شارالاردان باس تارتىپ، بۇكىل ءىس ناقتىلىققا قۇرىلاتىن بولادى. ەكونوميكا، الەۋمەتتىك سالا، ەكولوگياداعى جۇيەلى شارالاردىڭ كولەمدى كەشەنىن ىسكە اسىرۋدى جالعاستىرامىز. تۇرعىنداردىڭ بارلىق توپتارىنىڭ، اسىرەسە جاستار، ايەلدەر، مۇمكىندىگى شەكتەۋلى جانداردىڭ قاجەتتىلىكتەرىنە باسا ءمان بەرەمىز. ءبىز ەلىمىزدەگى ساياسي جاڭعىرتۋ ۇدەرىسىن جالعاستىرا بەرەمىز، – دەدى پرەزيدەنت.

مەملەكەت باسشىسى كەلەسى جىلدىڭ باسىندا جاريالاناتىن جاڭا رەفورمالار توپتاماسى تۋرالى ايتتى. بۇل «حالىق ۇنىنە قۇلاق اساتىن مەملەكەت» قۇرۋعا، ادىلەت جانە تەڭ مۇمكىندىكتەر قاعيداتتارىن بەكىتۋگە باعىتتالعان قازاقستانداعى دەموكراتيالىق تۇرلەنۋگە تىڭ سەرپىن بەرەدى. ءماجىلىس جانە بارلىق دەڭگەيدەگى ماسليحاتتارعا سايلاۋ وتكىزۋ كەلەسى جىلدىڭ تاعى ءبىر ماڭىزدى وقيعاسى بولماق. قاسىم-جومارت توقاەۆ الداعى سايلاۋ جوعارى ازاماتتىق بەلسەندىلىك تانىتىپ، قوعامنىڭ ساياسي ساۋاتتى ەكەنىن كورسەتەتىنىنە سەنىم ءبىلدىردى. سايلاۋ ناۋقانى قازاق مەملەكەتتىگىنىڭ ينستيتۋتسيونالدىق تۇراقتىلىعىن دالەلدەيدى.

پرەزيدەنت ءوز سوزىندە مەملەكەت باسشىسىنىڭ قولىنان ماراپات العان قازاقستاندىقتاردىڭ سىڭىرگەن ەڭبەگىنە جوعارى باعا بەردى، جاڭا رەفورمالار پاكەتىن جاريالادى.

«قازىر رەفورمالاردىڭ جاڭا پاكەتى دايىندالۋدا، ونى كەلەسى جىلدىڭ باسىندا جاريالايمىز. بۇل ءبىزدىڭ ەلىمىزدەگى «تىڭداۋشى مەملەكەت» قۇرۋعا، ادىلەتتىلىك پەن تەڭ مۇمكىندىكتەر قاعيداتتارىن ىلگەرىلەتۋگە جانە نىعايتۋعا باعىتتالعان دەموكراتيالىق قايتا قۇرۋلارعا جاڭا سەرپىن بەرەدى»، - دەدى مەملەكەت باسشىسى.

Abai.kz