قازاقستان QazCovid-in دەپ اتالاتىن ۆاكتسيناسىن ءۇش مىڭ ەرىكتىگە سالۋدى باستادى. بۇل تۋرالى قازاقستان ۇكىمەتىنىڭ سايتىندا حابارلاندى.

ۇكىمەت حابارلاماسىنا سايكەس، ءبىلىم جانە عىلىم مينيسترلىگىنە قاراستى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى (عزي) QazCovid-in ۆاكتسيناسىن كلينيكالىق سىناۋدىڭ 1-2 فازالارىن جۇرگىزگەن، سىناق ۆاكتسينا تيىمدىلىگى 96 پايىز دەپ كورسەتكەن.

"دەنساۋلىق ساقتاۋ مينيسترلىگى ءۇش مىڭ ەرىكتىگە كلينيكالىق زەرتتەۋلەردىڭ قورىتىندى III كەزەڭىنىڭ باستالۋىن ماقۇلدادى. بۇگىندە العاشقى ەرىكتىلەر الماتى جانە تاراز قالالارىنىڭ كلينيكالارىندا، عزي-دا وتاندىق ۆاكتسينامەن ەگىلدى. 2020 جىلعى جەلتوقسان ايىنىڭ سوڭىنا دەيىن ءۇش مىڭ ەرىكتىنى ۆاكتسيناتسيالاۋ اياقتالادى. III كەزەڭدى وتكىزۋ ءۇشىن 10 مىڭ دوزا كولەمىندە ۆاكتسينانىڭ قاجەتتى پارتياسى شىعارىلادى" دەلىنگەن ۇكىمەت حابارلاماسىندا.

وتاندىق ۆاكتسينانى جاپپاي سالۋ 2021 جىلدىڭ ناۋرىزىندا باستالاتىنىن، ەكپەنىڭ الدىمەن مەدقىزمەتكەرلەرگە، پەداگوگتەرگە جانە سوزىلمالى اۋرۋلارمەن اۋىراتىن ادامدارعا جاسالادى، دەپ كەلتىرەدى حابارلاما پرەمەر-مينيستر اسقار ءماميننىڭ ءسوزىن.

پرەمەر-ءمينيستردىڭ سوزىنە قاراعاندا، جامبىل وبلىسىندا سالىنىپ جاتقان ۆاكتسينا وندىرەتىن زاۋىت تا 2021 جىلعى ناۋرىزدا ىسكە قوسىلادى. زاۋىت جىلىنا 60 ميلليون دوزا وندىرەدى دەپ جوسپارلانىپ وتىر. وسىعان دەيىن بۇل جوباعا جەتى ميلليارد تەڭگە بولىنگەنى حابارلانعان.

مۇنىڭ الدىندا قازاقستان بيلىگى ەلدە رەسەيلىك "سپۋتنيك V" ۆاكتسيناسى وندىرىلەتىنىن مالىمدەگەن. وتكەن ايدىڭ ورتاسىندا قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير پۋتينمەن رەسەيلىك ۆاكتسينانى وندىرەتىن زاۋىتتى سالۋ جونىندە كەلىسىمگە كەلگەنىن مالىمدەگەن.

قازاقستان ۋاكىلەتتى مەكەمەلەرى كلينيكالىق سىناقتىڭ بارلىق فازاسىنا وتكەن، تىركەۋ تالاپتارىن ورىنداعان ۆاكتسينانى عانا ساتىپ الاتىنىن بىرنەشە رەت مالىمدەدى.

قاراشا ايىندا قازاقستاننىڭ باس سانيتارلىق دارىگەرى سەنىمدى ۆاكتسيناعا رەسەيلىك ەكپەنى، بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ازىرلەگەن ەكپەنى جانە وكسفورد ۋنيۆەرسيتەتىنىڭ AstraZeneka كومپانياسىمەن بىرگە ازىرلەگەن ەكپەسىن جاتقىزاتىنىن ايتتى.

رەسەيلىك "سپۋتنيك V1" ۆاكتسيناسى رەسمي تۇردە 11 تامىز كۇنى تىركەلىپ، كوروناۆيرۋسقا قارسى ۆاكتسينالاردىڭ ىشىندە تىركەۋدەن ءبىرىنشى بولىپ ءوتتى. بىراق ۆاكتسينا تىركەۋگە دەيىن كلينيكالىق سىناقتىڭ تەك ەكى فازاسىنان عانا ءوتتى. ياعني سىناق تەك ونداعان ادامعا عانا جۇرگىزىلگەن. كەيىنىرەك ءۇشىنشى فازا بارىسىندا ۆاكتسينانىڭ تيىمدىلىگى 95 پايىز دەپ جاريالاندى. سىناق ناتيجەسىنىڭ تاۋەلسىز ساراپتاماسى ءالى جوق. ۆاكتسينانى وندىرۋگە بايلانىستى بىرقاتار ماسەلەنىڭ بارى حابارلاندى.

باتىس ەلدەرىندە ۆاكتسينالار جەدەل ماقۇلدانىپ جاتىر. اقش بيلىگى الدىمەن Pfizer/BioNTech ۆاكتسيناسى، كەيىن Moderna ۆاكتسيناسىن ماقۇلدادى. ۇلىبريتانيا مەن كانادا Pfizer/BioNTech ۆاكتسيناسىن قولدانۋدى باستاپ كەتتى.

Abai.kz