تۇرىك جاستارى رەسەي دەپۋتاتتارىنىڭ داۋلى مالىمدەمەسىنە قارسى بەينەۇندەۋ جاسادى. ونى بەلگىلى قوعام بەلسەندىسى وعىز دوعان Youtube ارناسىندا جاريالاعان. 

جاستار ءوز نارازىلىقتارىن «قازاقستان جالعىز ەمەس، رەسەي، قازاقستاننان قولىڭدى تارت»، «كىم قازاقستانعا قارسى بولسا، تۇركياعا دا قارسى!» دەگەن ۇراندار ارقىلى بىلدىرگەن.

ايتا كەتەيىك، بۇعان دەيىن پۋتين باسقاراتىن «ەدينايا روسسيا» پارتياسىنىڭ مۇشەسى، دۋمانىڭ «ءبىلىم-عىلىم كوميتەتىنىڭ» توراعاسى ۆياچەسلاۆ نيكونوۆ رەسەيدىڭ مەملەكەتتىك تەلەارناسىنان «قازاقستان تەرريتورياسى رەسەي مەن سوۆەت وداعىنىڭ بەرگەن ۇلكەن سىيلىعى» دەپ سويلەدى.

ارتىنشا «ەدينايا روسسيا» پارتياسىنىڭ تاعى ءبىر وكىلى، دەپۋتات ەۆگەني فەدوروۆ: «رەسەي قازاقستاننان تەرريتوريانى قايتارۋىن تالاپ ەتۋ كەرەك» دەدى.

وسىعان بايلانىستى قر سىرتقى ىستەر مينيسترلىگى رەسەي فەدەراتسياسىنىڭ ۋاقىتشا سەنىمدى وكىلى الەكساندر كوماروۆقا قارسىلىق نوتاسى تابىستالعان بولاتىن.

Abai.kz