قازاقستان رەسپۋبليكاسى پرەزيدەنتىنىڭ ءوتىنىشى بويىنشا كونستيتۋتسيالىق كەڭەس رەسپۋبليكا كونستيتۋتسياسىنىڭ ءولىم جازاسىن قولدانۋ ماسەلەلەرىن رەگلامەنتتەيتىن ەرەجەلەرىنە رەسمي تۇسىندىرمە بەردى.

مەملەكەت باسشىسىنىڭ ءوتىنىشى قازاقستاننىڭ ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى (بۇدان ءارى - فاكۋلتاتيۆتىك حاتتاما) الداعى ۋاقىتتا راتيفيكاتسيالاۋىمەن بايلانىستى بولدى. وتىنىشتە رەسپۋبليكا كونستيتۋتسياسى ەرەجەلەرىنىڭ جانە فاكۋلتاتيۆتىك حاتتامانىڭ ەڭ اۋىر جازانى قولدانۋ ماسەلەلەرىن رەتتەيتىن نورمالارىنىڭ اراقاتىناسى تۋرالى ماسەلە قويىلدى.

كونستيتۋتسيالىق كەڭەس فاكۋلتاتيۆتىك حاتتامانى راتيفيكاتسيالاۋ ءۇشىن نەگىزگى زاڭعا تۇزەتۋلەر ەنگىزۋدىڭ قاجەتى جوق دەپ شەشتى.

بۇل رەتتە، كەڭەس كونستيتۋتسياعا جانە جالپىعا بىردەي تانىلعان حالىقارالىق اكتىلەرگە سايكەس ءومىر ءسۇرۋ قۇقىعى دەموكراتيالىق قوعامنىڭ نەگىزگى قۇندىلىعى بولىپ تابىلاتىنىن جانە مەملەكەت بارلىق ادامدار ءۇشىن وسى قۇقىقتى جۇزەگە اسىرۋعا كەپىلدىك بەرۋگە مىندەتتى ەكەنىن اتاپ ءوتتى.

الەمدىك قوعامداستىقتىڭ تەڭ قۇقىقتى مۇشەسى رەتىندە قازاقستان العاشقى كەزدەن باستاپ قىلمىستىق زاڭنامادا ءولىم جازاسىنىڭ كۇشىن جويۋ ءۇردىسىن ەسكەرىپ كەلەدى جانە وسى جىلدار ىشىندە ەلدە ەڭ اۋىر جازانى قولدانباۋدىڭ ورنىقتى قۇقىقتىق رەجيمى قالىپتاستى.

وسى باعىتتى دايەكتى ىسكە اسىرۋداعى كەزەكتى كەزەڭدى قازاقستان رەسپۋبليكاسىنىڭ 2020 جىلعى 23 قىركۇيەكتە اتالعان فاكۋلتاتيۆتىك حاتتاماعا قول قويۋى اشتى.

قازاقستان كونستيتۋتسياسىندا ادامداردىڭ قازا بولۋىمەن بايلانىستى تەرروريستىك قىلمىستار جاساعانى ءۇشىن، سونداي-اق سوعىس ۋاقىتىندا ەرەكشە اۋىر قىلمىستار جاساعانى ءۇشىن ءولىم جازاسىن بەلگىلەۋگە جول بەرىلەتىنىن نازارعا الا وتىرىپ، كەڭەس ءولىم جازاسىنىڭ كۇشىن جويۋ تۋرالى حالىقارالىق شارتتى راتيفيكاتسيالاۋ رەسپۋبليكا پارلامەنتىنىڭ قۇزىرەتىنە كىرەتىنىن اتاپ ءوتتى. بۇل رەتتە، نەگىزگى زاڭدا وسى قىلمىستار ءۇشىن قىلمىستىق زاڭدا ءولىم جازاسىن بەلگىلەۋ نەمەسە ودان باس تارتۋ، ولاردىڭ شەڭبەرىن قىسقارتۋ تۋرالى ماسەلەنى پارلامەنتتىڭ قاراۋىنا قالدىرىلادى. زاڭ شىعارۋشى ءولىم جازاسىنىڭ كۇشىن ۇلتتىق زاڭناماعا ءتيىستى تۇزەتۋلەر ەنگىزۋ ارقىلى عانا ەمەس، سونداي-اق جازانىڭ وسى ءتۇرى بەلگىلەنۋى مۇمكىن قىلمىستاردى جويۋدى نەمەسە ولاردىڭ سانىن شەكتەۋدى كوزدەيتىن حالىقارالىق شارتتى راتيفيكاتسيالاۋ ارقىلى دا جويا الادى.

كەڭەس ءوز شەشىمىندە كونستيتۋتسيا فاكۋلتاتيۆتىك حاتتامانى راتيفيكاتسيالاۋعا كەدەرگى بولمايتىنىن اتاپ ءوتتى. فاكۋلتاتيۆتىك حاتتاما راتيفيكاتسيالانعاننان كەيىن قازاقستان رەسپۋبليكاسىنىڭ قىلمىستىق كودەكسى ونىڭ تالاپتارىنا سايكەس كەلتىرىلۋى ءتيىس.

كونستيتۋتسيالىق كەڭەس قاۋلىسىنىڭ تولىق ءماتىنى باسپاسوزدە جانە كەڭەس سايتىندا جاريالانادى.

Abai.kz