اعىمداعى جىلدىڭ  جەلتوقسان ايىندا «جاستار» عىلىمي-زەرتتەۋ ورتالىعىندا «قازاقستان جاستارى – 2020» ۇلتتىق بايانداماسىنىڭ ساراپتامالىق تالقىلاۋى ءوتتى.

«جاستار» عىلىمي-زەرتتەۋ ورتالىعى قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ قولداۋىمەن «قازاقستان جاستارى» ۇلتتىق بايانداماسىنىڭ سەگىزىنشى باسىلىمىن دايىندادى.

بايانداما سوڭعى عىلىمي زەرتتەۋلەر مەن مەملەكەتتىك ورگانداردىڭ ءتيىستى رەسمي ستاتيستيكاسىن تالداۋعا سۇيەنە جاسالعان. بايانداما جالپى 6000 رەسپوندەنتتى قامتىعان 3 بۇقارالىق الەۋمەتتانۋلىق زەرتتەۋدىڭ ناتيجەلەرىنە نەگىزدەلگەن.

قازاقستان جاستارى تۋرالى ۇلتتىق باياندامادا 8 ءبولىم بار جانە ساراپشىلار قاۋىمداستىعىنىڭ ۇسىنىستارىن ەسكەرە وتىرىپ، تالقىلاۋ ناتيجەلەرى بويىنشا پىسىقتالىپ، كوپشىلىككە ۇسىنىلماق. بيىل COVID-19 كوروناۆيرۋستىق ينفەكتسيا الەمدىك پاندەمياسىنىڭ قازاقستاندىق جاستاردىڭ جاعدايى مەن تىرشىلىگىنە اسەرى زەرتتەلگەنىن اتاپ وتكەن ءجون.

ۇلتتىق بايانداما ۋاكىلەتتى مەملەكەتتىك ورگاندارعا ءتيىستى پراكتيكالىق ۇسىنىمدار مەن ۇسىنىستار دايىنداعان. ساراپشىلار قاۋىمداستىعى، فوكۋس-توپتىق زەرتتەۋلەر نەگىزىندە ناقتى شارالار ازىرلەنگەن.

ۇلتتىق باياندامانىڭ ساراپتامالىق تالقىلاۋىنا قازاقستاندىق ساراپشىلارمەن قاتار شەتەلدىك ساراپشىلار – پيتتسەر-كوللەدجىنىڭ ۇيىمداستىرۋشىلىق زەرتتەۋلەر كافەدراسىنىڭ اديۋنكت-پروفەسسورى باربارا دجۋنيسباي (كاليفورنيا، اقش), نازارباەۆ ۋنيۆەرسيتەتىنىڭ دوتسەنتى كاسا ريتا (ريگا، لاتۆيا) جانە ت.ب. قاتىستى.

الي اۆدجۋ سەيت، يىلدىرىم بەيازىت ۋنيۆەرسيتەتىنىڭ پروفەسسورى، PhD (انكارا، تۇركيا): «قازاقستاننىڭ ءبىلىم بەرۋ جۇيەسىندە بىرنەشە ماسەلە بار. مۇعالىمدەردىڭ جالاقىسى تومەن. وقۋشىلار مۇعالىم ماماندىعىن كوبىرەك تاڭداۋى ءۇشىن مۇعالىم مەن پەداگوگ ماماندىعى تارتىمدى بولۋى كەرەك. مەن ۇكىمەتتىڭ بۇل پروبلەمالاردى بىلەتىنىنە جانە ولاردى شەشۋ ءۇشىن شارالار قابىلداپ جاتقانىنا قۋانىشتىمىن».

باربارا دجۋنيسباي، پيتتسەر-كوللەدجىنىڭ ۇيىمداستىرۋشىلىق زەرتتەۋلەر كافەدراسىنىڭ اديۋنكت-پروفەسسورى (كاليفورنيا، اقش): «جاستاردى اتقارىلعان ءىستىڭ «سوڭعى پايدالانۋشىسى» نەمەسە «پايدا كورۋشىلەرى» دەپ قاراستىرعاننان گورى، ولاردى نەگە باسىنان باستاپ شەشىم ىزدەۋ ۇدەرىسىنە قاتىستىرماسقا؟ بۇل ەكى وڭ ناتيجەگە اكەلۋى مۇمكىن: 1) باعدارلاما ناتيجەلەرىنىڭ ودان ءارى جاقسارۋىنا; 2) جاستارعا ساياساتتى قۇرۋعا ساياسي، ازاماتتىق جانە جەكە قاتىسۋعا قاجەتتى مۇمكىندىكتەر بەرىپ، سول ارقىلى وسى پروتسەستىڭ ءار كەزەڭىندە ەلدىڭ دامۋىنا ۇلەس قوسۋى مۇمكىن.»

كاسا ريتا، نازارباەۆ ۋنيۆەرسيتەتىنىڭ دوتسەنتى (ريگا، لاتۆيا): «ۇلتتىق ءبىلىم بەرۋ – بۇل قوعام ءومىرىنىڭ باسقا سالالارىمەن تىعىز بايلانىستى ەكوجۇيە. جۇيە بويىنشا ءبىلىم بەرۋ ساپاسىن ارتتىرۋ ءبىلىم بەرۋدىڭ بارلىق دەڭگەيلەرىندە وقىتۋ مەن كوشباسشىلىق ۇدەرىستەرىن جاقسارتۋ جانە وقىتۋدىڭ فورمالدى جانە فورمالدى ەمەس تاسىلدەرىن ەنگىزۋ بويىنشا ءبىر مەزگىلدە جانە ۇيلەسىمدى ارەكەتتى تالاپ ەتەدى، بۇل «قازاقستان جاستارى – 2020» بايانداماسىندا ۇسىنىلعان».

ۇلتتىق بايانداما – بۇل ساراپشىلار مەن بارلىق دەڭگەيدەگى ءارتۇرلى سالانىڭ وكىلدەرى اراسىنداعى كەشەندى جۇمىس پەن ءوزارا ارەكەتتىڭ ناتيجەسى. «قازاقستان جاستارى – 2020» ۇلتتىق بايانداماسىنىڭ جاڭالىعى مەن وزەكتىلىگى مىنادا: بۇل قۇجاتتا ساراپشىلار مەملەكەت پەن ازاماتتىق قوعام جاھاندىق كوروناۆيرۋس پاندەمياسى اياسىندا جاستارعا قالاي جانە قانداي كومەكتەسە الادى دەگەن سۇراقتارعا جاۋاپ تابۋعا تالپىنادى.

Abai.kz