ەل ازاماتتارىنا زەينەتاقى قورىنداعى قاراجاتىنىڭ ءبىر بولىگىن شەشىپ الۋعا رۇقسات بەرىلدى.

زاڭ جوباسىنا سەنات ەنگىزگەن وزگەرىستەردى بۇگىن ءماجىلىس دەپۋتاتتارى ماقۇلداپ، زاڭ قابىلداندى.ەندى قۇجاتقا پرەزيدەنت قول قويعان سوڭ 700 مىڭ شاقتى ازاماتىمىز قورداعى اقشاسىنىڭ ءبىر بولىگىن الا الادى. ونىڭ 500 مىڭى جۇمىس ىستەيتىن تۇلعا بولسا، 180 مىڭدايى زەينەت جاسىنداعى ادامدار.

زاڭ بويىنشا، 2021 جىلدان باستاپ قازاقستاندىقتار زەينەتاقى جيناقتارىنىڭ ءبىر بولىگىن تۇرعىن ءۇي ساتىپ الۋ جانە ەمدەۋ ءۇشىن الا الادى.

زەينەتاقى جيناقتارىنىڭ ءبىر بولىگىن ءوز قاجەتتىلىگىنە مىنا ادامدار پايدالانا الادى:

- جاسىنا ساي "جەتكىلىكتىلىك شەگىنەن" اسىپ تۇرعان زەينەتاقى جيناعى بار جۇمىس ىستەيتىن ازاماتتار;

- بجزق-دا قالعان زەينەتاقى جيناقتارىنىڭ سوماسى شەگىندە ساقتاندىرۋ كومپانيالارىمەن ولارعا ءومىر بويى اننۋيتەتتىك تولەمدەردى قامتاماسىز ەتەتىن زەينەتاقى اننۋيتەتى شارتتارىن جاساسقان تۇلعالار;

- بجزق-داعى زەينەتاقى جيناقتارىنىڭ قالعان سوماسىنىڭ 50 پايىزىنان اسپايتىن شەكتە جۇمىس ىستەگەن زەينەتكەرلەر. ولاردىڭ زەينەتاقىسىنىڭ جيىنتىق مولشەرى (جاسى نەمەسە جۇمىس ىستەگەن جىلدارى بويىنشا زەينەتاقىنى، بازالىق زەينەتاقىنى قوسا العاندا) جوعالتىلعان تابىستى حالىقارالىق ستاندارتتارعا سايكەس كەلەتىن دەڭگەيدە (كەمىندە 40 پايىز) الماستىرۋدى قامتاماسىز ەتكەن جاعدايدا.

"جەتكىلىكتىلىك شەگى" رەتىندە بەلگىلى ءبىر جاستاعى سالىمشى ءۇشىن بجزق-عا بولاشاق تۇراقتى 10 پايىزدىق زەينەتاقى جارنالارىن ونىڭ تابىسىن (ەڭ تومەنگى جالاقىدان تومەن ەمەس) ەسكەرە وتىرىپ، ەڭ تومەنگى زەينەتاقى مولشەرىنەن تومەن ەمەس زەينەتاقى تولەمدەرىمەن قامتاماسىز ەتۋگە مۇمكىندىك بەرەتىن زەينەتاقى جيناقتارىنىڭ ەڭ تومەنگى قاجەت سوماسى قاراستىرىلادى.

"جەتكىلىكتىلىك شەگى" ايەلدەر مەن ەرلەر ءۇشىن بىردەي بەلگىلەنەدى جانە ءاربىر جاس ءۇشىن ەسەپتەلەدى. بۇل رەتتە ول قالىپتاسقان ەرەجەگە (كىرىستىلىك، ينفلياتسيا، ەڭ تومەنگى تولەم مولشەرى) سۇيەنە وتىرىپ، جاڭا الۋشىلار ءۇشىن قايتا ەسەپتەلەتىن بولادى.

سونداي-اق، زاڭدا جوعارىدا اتالعان ساناتتاعى ازاماتتار زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋ ماقساتىندا نەمەسە وزدەرى، جۇبايى نەمەسە جاقىن تۋىستارى (اتالارى/اجەلەرى، اتا-انالارى، بالالارى، نەمەرەلەرى، اعا-ىنىلەرى/اپا-سىڭلىلەرى) ءۇشىن ەمدەلۋگە پايدالانا الادى. ماقساتتى پايدالانۋ ءۇشىن وتباسى مۇشەلەرىنىڭ قاراجاتىن بىرىكتىرۋگە بولادى.

بەلگىلەنگەن تالاپتارعا سايكەس الىپ قويۋ سانى بويىنشا شەكتەۋلەر كوزدەلمەگەن، ياعني ازاماتتار زەينەتاقى جيناقتارىنىڭ ءبىر بولىگىن سول ءبىر نە باسقا ماقساتقا قايتادان پايدالانا الادى.

زەينەتاقى جيناقتارىن تولەۋ ەسەبىنەن تۇرعىن ءۇي جاعدايلارىن جاقسارتۋ ءتارتىبىن يندۋستريا جانە ينفراقۇرىلىمدىق دامۋ مينيسترلىگى بەكىتەدى.

ازاماتتاردى ەمدەۋگە جىبەرۋ ەرەجەلەرىن دەنساۋلىق ساقتاۋ مينيسترلىگى انىقتايدى، پايدالانۋ ەرەجەلەرى ازىرلەندى.

زەينەتاقى اكتيۆتەرىن سەنىمگەرلىك باسقارۋعا بەرۋ قاعيدالارىن قارجى نارىعىن رەتتەۋ جانە دامىتۋ اگەنتتىگى بەلگىلەيدى. زاڭ پرەزيدەنتكە قول قويۋعا جىبەرىلدى.

ەسكە سالايىق، 1 قىركۇيەكتە قازاقستان پرەزيدەنتى قاسىم-جومارت توقاەۆ 2021 جىلدان باستاپ قازاقستاندىقتار زەينەتاقى جيناعىنىڭ ءبىر بولىگىن الا الاتىنىن مالىمدەدى.

Abai.kz