سەنبى, 8 مامىر 2021
ماسقارا! 5366 28 پىكىر 25 جەلتوقسان, 2020 ساعات 15:54

فەدوروۆتىڭ ۇيىمى كىمدى، نەدەن ازات ەتپەكشى؟

قر ۇقك توراعاسى كارىم ءماسىموۆتىڭ،

قر ءىىم ءمينيسترى ەرلان تۇرعىمباەۆتىڭ،

قر باپ پروكۋرورى عيزات نۇرداۋلەتوۆتىڭ نارازىنا!

الگىندە عانا رەسەي پارلامەنتاريى قازاقستاننىڭ تەرريتوريالىق تۇتاستىعىنا كوز الارتىپ، جەرىمىزگە، تاۋەلسىزدىگىمىزگە سۇقتاندى. مىڭداعان، ميلليونداعان قازاقتىڭ قانىمەن كەلگەن جەرىمىز بەن مەملەكەتتىگىمىزدى جوققا شىعاردى. «قازاقتىڭ جەرى رەسەي مەن كسرو-نىڭ سىيلىعى»، «قازاقستان تەرريتوريانى قايتارۋى ءتيىس» دەگەن ماعىنادا ءتۇرلى پىكىرلەر ايتتى.

رەسەي دۋماسىنىڭ ۆ.نيكونوۆ، ە.فەدوروۆ، ۆ.جيرينوۆسكي سەكىلدى دەپۋتاتتارىنىڭ «سوعىس» تىلەگەن بۇل سوزدەرىنە قر سىرتقى ىستەر مينيسترلىگى مەن ءبىرلى-جارىم ساياسي پارتيا ءۇن قاتىپ، «ولاردىكى – قىسىر سيىردىڭ قىڭىرلىعى» دەپ سويلەگەنىمەن، ورىس دۋماسىنىڭ دەپۋتاتتارى دەگەندەرىنەن قايتقان جوق. رف جانە رف اۋماعىنان تىس ورنالاسقان ءورىستىلدى بۇقارالىق اقپارات قۇرالدار ارقىلى دۇركىن-دۇركىن سويلەپ جاتىر. ءالى دە...

ەۆگەني فەدوروۆ | راديو «كومسومولسكايا پراۆدا»

اسىرەسە، ەۆگەني فەدوروۆ دەيتىن ادام. ول دا ۆلاديمير پۋتين باسقاراتىن «ەدينايا روسسيا» پارتياسىنىڭ وكىلى. رەسەيدىڭ فەدەرالدى دۋماسىنىڭ بەس مارتە دەپۋتاتى بولعان، قازىر مەملەكەتتىك دۋمادا دەپۋتات. بيۋدجەت جانە سالىق كوميتەتىنىڭ، «ەدينايا روسسيا» پارتياسى ساياسي كەڭەسىنىڭ مۇشەسى. رف مەملەكەتتىك كەڭەسشىسى. اۋعان سوعىسىنىڭ ارداگەرى جانە «ۇلتتىق ازات ەتۋ قوزعالىسى» ساياسي بىرلەستىگىنىڭ ليدەرى ەكەن.

دەپۋتاتتىق مانداتتى الماس بۇرىن، رەسەي پرەزيدەنتى اكىمشىلىگىندە، قورعانىس كەڭەسىندە قىزمەت ىستەگەن. اتوم ەنەرگياسى جونىندەگى ۆيتسە-مينيستر بولعان. وتستاۆكاداعى پولكوۆنيك دەگەن شەنى تاعى بار.

قازاقستاننىڭ تەرريتورياسى مەن تاۋەلسىزدىگىن مويىندامايتىن دۋمانىڭ فەدوروۆ دەيتىن دەپۋتاتى – رەسەيدەگى «ۇلتتىق ازات ەتۋ قوزعالىسىنىڭ» ليدەرى دەدىك قوي. ءدال وسى «ۇلتتىق ازات ەتۋ قوزعالىسى» (نارودنو وسۆوبوديتەلنوە دۆيجەنيە، قىسقاشا - نود) 2012 جىلى رەسەيدە قۇرىلعان. ونىڭ نەگىزىن قالاۋشى - ەۆگەني الەكسەەۆيچ فەدوروۆ.  شتاب-پاتەرى – ماسكەۋدە ورنالاسقان.

ەڭ سوراقىسى سول – فەدوروۆتىڭ «ۇلتتىق ازات ەتۋ قوزعالىسىنىڭ» ءبىر فيليالى قازاقستاندا دا جۇمىس ىستەپ جاتىر ەكەن. «نود استانا» دەپ اتالاتىن سايتتارى اشىق تۇر. ءجاي تۇرعان جوق، «ءبىزدىڭ قاتارىمىزعا قوسىل» دەپ، شاقىرىپ تۇر.

باسقى بەتىنىڭ وزىندە-اق: «1991 جىلى قازاقستان 40 جىلدىق قىرعي-قاباق سوعىستان اقش-قا جەڭىلدى!» دەپ، جازىلعان.

ونان سوڭ: «قازاقستان 1991 جىلدان بەرى اقش-تىڭ كولونياسى بولىپ كەلەدى. اقش-تىڭ قۇلى بولما! قۇلدىققا – «جوق» دە! استاناداعى ۇلتتىق ازات ەتۋ قوزعالىسىنا قوسىل!» دەيدى.

ءارى قاراي ءتىپتى سوراقى: «تەڭگە دوللاردىڭ تۋىندىسى. قازاقستاننىڭ ەەگەمەندىگى جوق. ءبىزدىڭ قۇقىقتىق كەڭىستىكتە كونستيتۋتسيا باسىمدىعى جولىنداعى ءپۋتيننىڭ باعىتىن قولدا» دەيدى.

رەسەي كونستيتۋتسياسىن وزگەرتۋگە قاتىستى بىرنەشە مالىمدەمە جاساعان. ودان كەيىن: «ءبىز استانا ۇاق (نود استانا) كسرو مەن قازاقستاندا تۋعان كەز كەلگەن ازامات ءوز جەرىندە لايىقتى، ءوز ەلىندە بەيبىت، ماقتانىشپەن ءومىر سۇرگىسى كەلەدى دەپ ەسەپتەيمىز» دەپ، كەلىپ، ەكونوميكانىڭ قۇلدىراۋى، تۇرمىستىڭ تومەندىگى تۋرالى ءسوز ەتەدى.

ءسويتىپ: «پرو-باتىستىق پروپوگاندا بىزگە «ساياسات لاس ءىس» دەگەن ويدى تىقپالاپ كەلدى. نە ءۇشىن؟ ازاماتتار ەشتەڭەنىڭ بايبىنا بارماۋى، ساياساتقا جولاماۋى ءۇشىن. بيلىكتى اقش پەن ونىڭ جاقتاستارىنا، سونىڭ ىشىندە ۇلىبريتانياعا بەرىپ قويىپ وتىرۋ ءۇشىن.  

ويانىڭدار! دۇرىس ءىس-ارەككەت ەتۋدى باستاڭدار! زاڭدى تۇردە! استانا ۇاق-نا قوسىل!

بلانكىنى تولتىرىپ، قولىڭدى قوي دا، كسرو ليكۆيداتسياسى تۋرالى زاڭسىز شەشىمنىڭ كۇشىن جويۋدى تالاپ ەت!» دەيدى.

وزدەرىنىڭ ايتۋىنشا، «نود» جاقتاستارىنىڭ سانى بۇگىنگدە 194 543 ادامدى قۇرايدى ەكەن. وسى ۋاقىتقا دەيىن قازاقستاندا 28 049 اكتسيا وتكىزىپتى.

جوعارىدا اتالعان ۇيىمنىڭ ليدەرى – دۋما دەپۋتاتى ەۆگەني فەدوروۆ ەكەنىن ايتتىق. ال مىناۋ استاناداعى (نۇر-سۇلتان) توپتىڭ ۇيلەستىرۋشىلەرى ەكەن.

لۋچين يۋري الەكساندروۆيچ

نود-تىڭ ينتەرنەتتەگى جۇمىسى بويىنشا ۇيلەستىرۋشى

جەنەكوۆا يرينا دميتريەۆنا

پاراقشانىڭ اۆتورى جانە رەداكتورى

قازاقستاننىڭ ۇلتتىق قاۋىپسىزدىك كوميتەتىنىڭ، ىشكى ىستەر مينيسترلىگى مەن باس پروكۋراتۋراسىنىڭ باسشىلارىنىڭ نازارىنا!

ەل ىشىندە ىرىتكى سالىپ، قازاقستاننىڭ تاۋەلسىزدىگىن مەن تەرريتوريالىق تۇتاستىعىن مويىنداماۋعا، قازاقستاندى رەسەيدىڭ قۇرامىنا قوسۋعا ۇگىتتەپ وتىرعان فەدوروۆتىڭ ۇيىمى باسقا-باسقا ەمەس، ەلىمىزدىڭ ءدال استاناسىنىندا اشىقتان-اشىق جۇمىس ىستەپ وتىرعانىن قالاي تۇسىنۋگە بولادى؟

«نود استانا» دەگەن سايت تا اشىق ءجۇمىس ىستەپ تۇر. بۇعاتتالماعان!

http://astana.rabstvu.net/

ونداعى كورسەتىلگەن اقپاراتقا كوز جۇگىرتسەك، مەكەن-جايى: استانا ق. سىعاناق كوشەسى 19 دەپ، كورسەتىلىپتى.

ايتپاعىمىز -  ەلىمىز بەن جەرىمىزگە كوز الارتقان ارانداتۋشىلاردىڭ اشىق ۇگىت جاساۋى – تاۋەلسىزدىگىمىزگە ۇلكەن قاتەر ەكەنى انىق! بۇل باسسىزدىقتىڭ جولى قاشان كەسىلەدى؟

رەسەيدىڭ «ۇلتتىق ازات ەتۋ قوزعالىسى» (نود) قازاقستاندا نە ءۇشىن جۇمىس ىستەپ تۇر. ولار قازاقستان حالقىن كىمنەن ازات ەتكەلى ءجۇر. قازاقستان ونسىز دا ازات، ەگەمەن ەل ەمەس پە؟! نەگە قازاقستان حالقىن رەسەي پرەزيدەنتى ءپۋتيندى قولداۋعا شاقىرىپ وتىر؟ الدە ولاردىڭ تۇپكى ماقساتى قازاقستاندى رەسەيگە قوسىپ الۋ ما؟

قازاقستاننىڭ قاۋىپسىزدىك قىزمەتى نەگە وزگە ەلدىڭ تاۋەلسىزدىگىمىزگە قاۋىپ توندىرەتىن ۇگىت-ءناسيحاتىنا شەكتەۋ قويماي وتىر. جاۋاپتى ورگاندار وسى باسسىزدىقتى نارازعا الۋى كەرەك دەپ ەسەپتەيمىز.

Abai.kz

28 پىكىر