كونگرەستىڭ كۋالاندىرۋى – اقش-تىڭ جاڭا سايلانعان پرەزيدەنتى دجو بايدەننىڭ يناۋگۋراتسياسى الدىنداعى ەڭ سوڭعى فورمالدى ءراسىم. بۇل ءراسىم ادەتتە تىنىش وتەتىن. بىراق بيىل اقش پرەزيدەنتى سايلاۋدىڭ ءادىل وتپەگەنىن ايتىپ، ونىڭ ناتيجەسىن مويىنداماۋعا شاقىردى. كونگرەستەگى 14 رەسپۋبليكاشىل سەناتور مەن وكىلدەر پالاتاسىنىڭ 100-دەن استام رەسپۋبليكاشىل مۇشەسى كەي شتاتتاردىڭ ناتيجەسىن كۋالاندىرۋعا قارسى شىعاتىنىن مالىمدەدى.
كۋالاندىرۋ كونگرەستەگى قوس پالاتانىڭ ورتاق وتىرىسىندا ءجۇرۋى ءتيىس بولعان. وتىرىس باستالعاندا ترامپ جاقتاستارى كاپيتولي عيماراتىنا باسىپ كىرىپ، وتىرىس ۋاقىتشا توقتاپ قالدى. ترامپشىل نارازىلار پوليتسيامەن قاقتىعىسىپ قالدى. ۆاشينگتون پوليتسياسىنىڭ حابارلاۋىنشا، تارتىپسىزدىك كەزىندە ءبىر ايەل وققا ۇشقان.
سايلاۋ ناتيجەسىن مويىنداماۋ باستاماسى كونگرەستەگى رەسپۋبليكاشىلداردى ەكىگە ءبولدى. سەناتتاعى رەسپۋبليكاشىلداردىڭ ليدەرى ميتچ ماككوننەل كۋالاندىرۋ الدىنداعى پىكىرسايىستى باستاي وتىرىپ، سايلاۋ ناتيجەسىن تەرىسكە شىعارعالى وتىرعان پارتيالاستارىنا سىنادى.
"سايلاۋشىلار، سوتتار، شتاتتار – بۇلاردىڭ ءبارى ايتارىن ايتتى. ەگەر ءبىز ولاردىڭ ايتقانىن تەرىسكە شىعارساق، رەسپۋبليكامىزعا ءومىر بويىنا نۇقسان كەلتىرەمىز" دەدى ماككوننەل.
ميسسۋري شتاتىنان سايلانعان سەناتور دجوش حوۋلي مەن تەحاس شتاتىنان سايلانعان سەناتور تەد كرۋز باستاعان ونداعان رەسپۋبليكاشىل سەناتور مەن وكىلدەر پالاتاسىنىڭ جۇزدەگەن مۇشەسى اريزونا، دجوردجيا، نەۆادا، ميچيگان، پەننسيلۆانيا جانە ۆيسكونسين شتاتتارىنداعى سايلاۋ ناتيجەسىن مويىنداماۋ نيەتىنەن ءالى دە باس تارتپاي وتىر.
رەسپۋبليكاشىلداردىڭ تالپىنىسى بايدەننىڭ پرەزيدەنت اتانۋىن توقتاتۋى ەكىتالاي. ويتكەنى وكىلدەر پالاتاسى دەموكراتتار باقىلاۋىندا جانە رەسپۋبليكاشىلدار اراسىندا پارتيالاستارىنىڭ باستاماسىنا قارسىلار دا بار.
3 قاراشادا وتكەن پرەزيدەنت سايلاۋىندا رەسمي ناتيجە بويىنشا 306-232 (ەلەكتورلار داۋىسى) ەسەبىمەن دجو بايدەن جەڭىسكە جەتكەن. بىراق ترامپ سايلاۋ ناتيجەسىن مويىنداۋدان باس تارتىپ، «سوڭىنا دەيىن بەرىلمەيتىنىن» ايتتى.
كونگرەستەگى وتىرىس باستالار الدىندا ترامپ جاقتاستارى ۆاشينگتون ورتالىعىندا ۇلكەن ميتينگ وتكىزىپ، وندا ترامپتىڭ ءوزى ءسوز سويلەدى.
ء"بىز ەشقاشان بەرىلمەيمىز. ءبىز ەشقاشان مويىندامايمىز" دەدى ترامپ جينالعان قاۋىمعا.
ترامپشىل نارازىلار كەيىنىرەك كاپيتولي الدىنداعى قورشاۋدى بۇزىپ، عيماراتقا باسىپ كىردى.
Abai.kz
