20 قاڭتار كۇنى اقش تىڭ جاڭادان سايلانعان پرەزيدەنتى دجو بايدەننىڭ ۇلىقتاۋ ءراسىمى ءوتتى.  

«مەن، دجو بايدەن، قۇراما شتاتتاردىڭ پرەزيدەنتى مىندەتىن ادال اتقارۋعا جانە قۇراما شتاتتاردىڭ كونستيتۋتسياسىن قولىمنان كەلگەنشە قولداۋعا، كۇزەتۋگە جانە قورعاۋعا سالتاناتتى تۇردە انت ەتەمىن»،- دەدى ول.

سونداي-اق ول الداعى ۋاقىتتا امەريكا حالقىن بىرىكتىرۋ ماقساتىندا جۇمىس ىستەيتىنىن ايتتى.

«بارلىق ماسەسەلەنى شەشۋ ءۇشىن، كوڭىلىمىزدى جايلى ەتىپ، امەريكا بولاشاعىن قامتاماسىز ەتۋ ءۇشىن قۇر سوزدەن الدەقايدا كوپ نارسە كەرەك ... - بىرلىك ... بۇگىندە كوڭىلىم امەريكانى نىعايتۋ، حالقىمىزدى بىرىكتىرۋ، ۇلتىمىزدى بىرىكتىرۋدى قالايدى. مەن ءاربىر امەريكالىقتى وسى ماقساتتا ماعان قوسىلۋدى سۇرايمىن»، - دەدى بايدەن.

بايدەننىڭ ايتۋىنشا، بۇل سايلاۋ ارقىلى دەموكراتيا جەڭىسكە جەتتى.

«بۇل - امەريكا كۇنى، بۇل - دەموكراتيا كۇنى. تاريح پەن جاڭارۋعا ءۇمىت كۇنى. ءبىز بۇگىن كانديداتتىڭ ەمەس، ماقساتتىڭ جەڭگەنىن اتاپ وتەمىز. ماقسات - دەموكراتيا. حالىقتىڭ قالاۋى تىڭدالدى. ءبىز تاعى دا دەموكراتيانىڭ باعالى ەكەنىن ۇقتىق. ... مىنە، دوستار، قازىر دەموكراتيا جەڭدى»

ايتا كەتەيىك، دەموكراتيالىق پارتيا اتىنان سايلاۋعا تۇسكەن 78 جاستاعى دجو بايدەن اقش-تىڭ قىرىق التىنشى پرەزيدەنتى بولدى. ول قاراشادا وتكەن پرەزيدەنت سايلاۋىندا دونالد ترامپتى جەڭدى. ترامپ بايدەننىڭ ۇلىقتاۋ راسىمىنە قاتىسۋدان باس تارتتى.

Abai.kz