سارسەنبى, 3 ناۋرىز 2021
1619 4 پىكىر 21 قاڭتار, 2021 ساعات 11:52

بايدەن ترامپ شىعارعان شەشىمدەردىڭ كۇشىن جويدى

دجو بايدەن پرەزيدەنت لاۋازىمىنا كىرىسكەن العاشقى كۇنى-اق وزىنە دەيىن مەملەكەت باسشىسى بولعان دونالد ترامپتىڭ بىرقاتار شەشىمىن جوياتىن جارلىقتار توپتاماسىنا قول قويدى.

اق ءۇيدىڭ جاڭا باسشىسى اقش-تىڭ كليمات جونىندەگى پاريج كەلىسىمىنە قوسىلۋى تۋرالى جارلىعىن شىعاردى. ەستە بولسا، دونالد ترامپ بيلىككە كەلگەن كەزدە ەل اتالعان كەلىسىمنەن شىعىپ كەتكەن بولاتىن. بۇعان قوسا، بايدەن ترامپتىڭ دۇنيەجۇزىلىك دەنساۋلىق ساقتاۋ ۇيىمىنان شىعۋ، اقش-قا اسىرەسە مۇسىلمان تۇرعىندارى باسىم ەلدەردەن كەلۋشىلەرگە تىيىم سالۋ سىندى شەشىمدەرىنىڭ كۇشىن جويدى.

اقش پرەزيدەنتى كومەكشىلەرىنىڭ مالىمەتىنشە، الداعى ۋاقىتتا دجو بايدەن اقش پەن مەكسيكا شەكاراسىنىڭ بويىن جاعالاي قابىرعا قۇرىلىسىن توقتاتادى. سونىمەن قاتار ءبىلىم الۋعا ءىرى كولەمدە سسۋدا العان ستۋدەنتتەرگە كومەك كورسەتىپ، الداعى 8 ايدىڭ ىشىندە پايىزسىز نەگىزگى سومانى تولەۋگە مۇمكىندىك بەرەدى. مۇنان بولەك، الداعى 10 كۇننىڭ ىشىندە بايدەن كونگرەستىڭ ماقۇلداعانىن كۇتپەستەن ترامپتىڭ تاعى دا ونداعان شەشىمىن جويۋ تۋرالى شەشىم قابىلداماق.

Human Rights First تاۋەلسىز قۇقىق قورعاۋ ۇيىمى جاڭا پرەزيدەنت بايدەننىڭ اسىرەسە مۇسىلمان تۇرعىندارى باسىم ەلدەردەن اقش-قا كەلۋشىلەرگە تىيىم سالۋ شەشىمىن الىپ تاستاعانىن قولداپ وتىر. ال كاليفورنيادان سايلانعان دەموكرات سەناتور دايان فاينستەين بايدەننىڭ ەلدىڭ كوشى-قون جۇيەسىن «اشىق جانە ءادىل» جاساۋ ءۇشىن وزگەرتۋگە ۇمتىلىسىن جاقتادى. الايدا وكىلدەر پالاتاسىنداعى رەسپۋبليكاشىلاردىڭ كوشباسشىسى كەۆين ماككارتي بايدەننىڭ يمميگراتسيالىق جوسپارى پاندەميا كەزىندە كۇردەلەنە تۇسكەن امەريكالىقتاردىڭ پروبلەمالارىن ەسكەرمەيدى، جىلدار بويى اقش-تىڭ زاڭناماسىن بۇزىپ كەلگەن زاڭسىز يمميگرانتتاردىڭ پروبلەماسىن شەشۋگە باعىتتالعان دەپ سانايتىندىعىن ءبىلدىردى.

Abai.kz

4 پىكىر