(شالا ءبۇلىنۋدىڭ قاجەتى قانشا؟)

فەيسبۋك جەلىسىندەگى پاراعىمدا جاريالانعان «قازاق ءتىلىن ۇيرەتۋدىڭ بەس ءادىسى» دەگەن جازبام قوعامدىق سانادا سونشالىق جاڭعىرىق تۋعىزادى دەپ ويلاماپپىن. اسىرەسە، ءورىستىلدى وقىرمانداردىڭ جەكە پىكىرلەرىم ءۇشىن ماعان «فاشيست!»، «ناتسيست!»، «ەسۋاس!» دەگەن ات بايلاپ، ايدار تاعىپ، بارىنشا عايباتتاعانىنا تاڭمىن. ولار رف-نىڭ پۋتين، جيرينوۆسكي، فەدوروۆ سياقتى اسا كورنەكتى مەملەكەت قايراتكەرلەرى مەن ساياساتكەرلەرى بيىك مىنبەرلەردەن قازاقستاننىڭ مەملەكەتتىلىگى جونىندە تەرىس كوزقاراستارىن اشىق بىلدىرگەنىندە مۇنشالىق اشۋلانباعان شىعار...

شىندىعىندا، فەيسبۋكتاعى وقىرماندارىما وي تۋعىزۋ ماقساتىندا ۇسىنعان بەس ءادىستىڭ بىردە-ءبىرى بيلىك تاراپىنان قولعا الىنبايتىنىن ءاربىر سانالى ادامنىڭ پايىمدايتىنىنا ءشۇبام جوق. ايتالىق، قازاقشا قاقپايتىن مينيسترلەر مەن پارلامەنت دەپۋتاتتارىنا ەلباسىنىڭ: «قازاقستاننىڭ بولاشاعى – قازاق تىلىندە» دەگەن اتالى ءسوزىنىڭ ءمان-ماعىناسىن كىمدەر ءتۇسىندىرىپ، كىمدەر ۇگىت-ناسيحات جۇمىستارىن جۇرگىزە الادى؟.. كەرىسىنشە، سولاردىڭ وزدەرى مەملەكەتتىك ءتىل ساياساتىنىڭ ناتيجەلى جۇزەگە اسۋىنا مۇددەلى بولۋى كەرەك قوي. 

ءبىزدىڭ ەلدە قانشاما جىلدار بويى جەمقورلارعا، پاراقورلارعا، الاياقتارعا قارسى باس بوستاندىعىنان ايىرۋ جازاسى قولدانىلىپ جاتسا دا، شەنەۋنىكتەر مەن كاسىپكەرلەردىڭ بارلىعى بىردەي الگى قىلمىستاردان باس تارتتى ما! اشىلا سالا جابىلىپ قالعان قىلمىستىق ىستەر قانشاما... دەمەك، كەلەشەكتە مينيسترلەر مەن قالتالى الپاۋىتتارعا ايىپپۇل سالۋ ارقىلى قازاق ءتىلىن ۇيرەتۋ مۇمكىندىگىن قاراستىرۋدىڭ ءوزى ارتىق. 

مەملەكەتتىك تىلدە ءىس جۇرگىزبەيتىن، قىزمەت كورسەتپەيتىن ءجۇز مىڭداعان مەملەكەتتىك مەكەمەلەر مەن ساۋدا-ساتتىق ورىندارىن جابۋ جونىندە ماجىلىستە ماسەلە كوتەرىلۋى ءتىپتى مۇمكىن ەمەس. ەندەشە، پرەزيدەنت اكىمشىلىگى، ۇكىمەت، پارلامەنتتى تارقاتىپ، مەملەكەتتىك ءتىلدى مەڭگەرگەن كادرلارمەن قايتا جاساقتاۋ جونىندەگى پىكىر بىرەۋلەردىڭ كۇلكىسىن تۋدىرماسا، اشۋ-ىزاسىن تۋدىرماۋى كەرەك ەدى... 

الداعى ۋاقىتتا مەملەكەتتىك ءتىلدى ماجبۇرلەپ وقىتۋ لاگەرلەرى اشىلسا، قازاقستان ميلليونداعان ادامدار قامالاتىن مىڭداعان لاگەرلەر ەلىنە اينالىپ كەتەتىنى ءسوزسىز. ايتپاقشى، جوعارى سوت توراعاسى، باس پروكۋرور، ىشكى ىستەر ءمينيسترى مەملەكەتتىك ءتىلدى بىلمەسە، ولاردى ماجبۇرلەپ وقىتۋ لاگەرلەرىنە قاماۋ جونىندەگى ۇكىمدى كىمدەر دايىنداپ، كىمدەر ىسكە اسىرادى؟.. سۇراق كوپ، جاۋاپ جوق. 

ارينە، ەلباسى دا، پرەزيدەنت تە الگىندەي قادامعا بارمايدى. بۇل انىق جايت! ءۇي سىرتىندا اقش، باتىس ەلدەرى مەن سولتۇستىكتەگى اتا كورشىمىز تۇر...

سونى بىلە تۇرا، نەگە ولاي جازدىڭ؟ – دەپ سۇرارسىز. جاۋاپ بەرەيىن. مەملەكەتتىك ءتىلدىڭ مۇشكىل جاعدايىن وڭالتۋ جونىندەگى ماسەلە ايتىلا-ايتىلا ابدەن جاۋىر بولدى! بۇل تاقىرىپتىڭ جۇرتشىلىقتى ىعىر قىلعانى سونشالىق، ەشكىم تىڭدامايدى. بيلىككە قۇلاق تۇرگىزىپ، قوعامدىق سانانى سەلت ەتكىزۋ ءۇشىن راديكالدى ۇسىنىستار ايتۋىڭ كەرەك ەكەن. باسقا امال جوق. مەن سونى ءتۇسىندىم. ماقساتىما جەتكەندەيمىن. 

ەندەشە، ماسەلەنىڭ بايىبىنا بارماي، مەنىڭ جازبامنىڭ ورىس تىلىندەگى اۋدارماسىنا بارىنشا شۇيلىككەن ازاماتتاردىڭ الاڭداۋى نەگىزسىز. ارينە، اۆتوردى تابالاۋ وڭاي بولعانىمەن، ورىندى وي، پىكىر ايتۋ وڭاي ەمەس. ايتسە دە، وقىرمانداردان تىڭ ۇسىنىستار كۇتەمىن. 

ارمان قاني،

پالودار قالاسى

Abai.kz