بيىل ەلىمىزدىڭ تاۋەلسىزدىك العانىنا 30 جىل تولادى. دەمەك ەلدە سۇيەگى قۋراعان كسرو-نىڭ، قانقۇيلى كوممۋنيستىك جۇيەنىڭ سارقىنشاعى دا قالماۋى كەرەك ەدى.

بىراق بىزدە ءبارى باسقاشا بولىپ تۇر. جىل سايىن 9 مامىردا قىپ-قىزىل جالاۋمەن كوشە ارالايتىن توپتىڭ قاراسى ءالى كوپ. كسرو كەزىندەگى اسكەري فورمالاردى كيىپ، سول كەزدىڭ وردەن-مەدالىن تاعىپ جۇرەتىندەر قانشا ما؟ مۇنى از دەسەڭىز، 2018 جىلى ەلدە كومسومولدىڭ 100 جىلدىعى وتە جوعارى دەڭگەيدە اتالىپ ءوتتى. وعان بيلىكتىڭ بيىك مىنبەرىندە وتىرعان بۇرىنعى جانە قازىرگى ءىرى شەنەۋنىكتەر قاتىستى. وسى كورىنىستەردىڭ ءبارى قازاقستاندى كەڭەس وداعىنىڭ ەلەسى ءالى كەزىپ جۇرگەنىن كورسەتەدى. ءتىپتى ءبىزدىڭ ەلدە ءوزىن تاۋەلىسىز قازاقستاننىڭ ەمەس، كسرو-نىڭ ازاماتى سانايتىندار دا بار بولۋى مۇمكىن...

وسىنداي كوممۋنيستىك كوزقاراستاعى جەرلەستەرىمىز قاراعاندى وڭىرىنەن تاعى بويى كورسەتتى. اتاپ ايتقاندا قاراعاندى وبلىسى، اقباستاۋ اۋىلىنىڭ كوپتەگەن تۇرعىنى كوك تۋدان گورى قىپ-قىزىل وراق پەن بالعانىڭ بەينەسىن ارتىق كورەتىنىن اڭعارتتى.

«31 كانال» تەلەارناسىنىڭ حابارلاۋىنشا، اتالعان اۋىل شەتىندە سوۆەت وداعىنىڭ سيمۆولى وراق پەن بالعانىڭ ەسكەرتكىشى بولعان ەكەن. جاقىندا جەرگىلىكتى بەلسەندىلەر وراق-بالعا ەسكەرتكىشىن قۇلاتىپ تاستاپ، ورنىنا كوك تۋىمىزدى جەلبىرەتىپ ءىلىپ قويعان ەكەن.

بىراق كەيبىر تۇرعىندار اۋىل ماڭىندا كوك تۋدىڭ جەلبىرەگەنىن جاقتىرماي، ونى جۇلىپ تاستاپ، بۇرىنعى وراق-بالعا ەسكەرتكىشىن قايتا ورناتقان. وسىعان بايلانىستى، اۋىل تۇرعىندارى ءۇش كۇننەن بەرى ەكى تاراپقا ءبولىنىپ داۋلاسىپ جاتقان كورىنەدى. ءبىر جاعى كسرو سيمۆولىنىڭ كوزىن قۇرتامىز دەسە، ەكىنشى تاراپ كوك تۋدان گورى قىزىل وراق-بالعامىز قىمبات دەپ سانايدى.

ءتىپتى كەيبىر تۇرعىن "وراق-بالعا ەسكەرتكىشىن قۇلاتقانداردى قۇزىرلى ورگان قىزمەتكەرلەرى جازالاسا", دەگەن. ولاردىڭ ويىنشا، وراق-بالعا اۋىلدىڭ سيمۆولى ەكەن. بالا-شاعا سول ەسكەرتكىشتىڭ جانىنا سۋرەتكە تۇسەدى ەكەن. ءبىزدى تاڭقالدىرعانى، وسى پىكىردى ايتقان ازاماتتار تاۋەلسىز ەلدىڭ جەتكىنشەكتەرى ءۇشىن كسرو-نىڭ ەش قۇنى جوق ەكەنىن نەگە بىلمەيدى ەكەن؟

جەرگىلىكتى بەلسەندىلەر كوك تۋدى جۇلىپ تاستاپ، وراق-بالعانى ورناتقانداردىڭ ارەكەتىنە اشۋلانىپ، سوۆەت ۇكىمەتى سيمۆولىن قايتا تۇرعىزۋعا كەلمەيتىندەي ەتىپ، سىندىرىپ تاستاپتى.

ال جەرگىلىكتى بيلىك وراق-بالعا ەسكەرتكىشىنىڭ اكىمدىكتىڭ قاراماعىنا كىرمەيتىنىن ايتىپ وتىر. اتقامىنەرلەر جۇرتىشىلىقپەن كەلىسىپ، وراق پەن بالعانىڭ ورنىنا «اقباستاۋ مەنىڭ جۇرەگىمدە» مونۋمەنتىن قويۋدى جوسپارلاپ وتىر ەكەن.

تاۋەلسىز ەلدىڭ تۋىنان قىزىل يمپەريانىڭ سيمۆولىن ارتىق كورەتىن ازاماتتارىمىز بەن كومسومولدىڭ 100 جىلدىعىن قۋانا تويلايتىن شەنەۋنىكتەرىمىز تۇرعاندا كەڭەس وداعىن ەستەن شىعارا المايتىن سەكىلدىمىز. ەگەمەندىگىمىزگە 30 جىل تولسا دا، ۇلتتىق يدەولوگيا جاسالماي، مەملەكەتتىك ءتىلدىڭ تۇعىرىنا قونا الماي، ۇلتتىق مەملەكەت قۇرا الماي وتىرعانىمىزدىڭ باستى سەبەبى دە وسى شىعار. حالقىمىز بەن بيلىگىمىز كسرو-نىڭ ەلەسىنەن ارىلماي، تولىق تاۋەلسىزبىز دەپ ايتا المايمىز...

Abai.kz