1 ناۋرىز كۇنى ەلىمىزدە جالپىحالىقتىق مەرەكە - العىس ايتۋ كۇنى اتالىپ وتەدى. «باربانگ» كۇردتەر قاۋىمداستىعىنىڭ توراعاسى كنياز ميرزوەۆ بۇل كۇنىنىڭ ماڭىزدىلىعى تۋرالى ايتتى. 

كنياز ميرزوەۆ قازاقستاندا تۇراتىن 70 مىڭعا جۋىق كۇردتەر ەل تۇرعىندارىنا قوناقجايلىلىعى مەن قولداۋى ءۇشىن ريزاشىلىقتارىن بىلدىرەتىنىڭ اتاپ ءوتتى.

«بىزگە بارلىق جاعداي جاسالدى. ءبىزدىڭ قۇقىعىمىز كونستيتۋتسيامەن قورعالعان. كۇردتەر 1937-1944 جىلدارى قازاقستانعا جەر اۋداردى. قازاق حالقى ءبىزدى جىلى قابىلدادى، باسپانا بەردى، مورالدىق ماتەريالدىق كومەك كورسەتتى»، - دەيدى سپيكەر.

سپيكەر كوكتەمنىڭ العاشقى كۇنى «راقمەت» سوزىمەن باستالاتىنىڭ جانە ولار ءۇشىن ەرەكشە مەرەكە ەكەنىن جەتكىزدى.

«1 ناۋرىز - قازاقستان حالقى اسسامبلەياسىنىڭ قۇرىلعان كۇنى، العىس ايتۋ كۇنى، بۇعان قوسا، كوكتەمنىڭ ءبىرىنشى كۇنى اتاپ وتىلەدى. بۇل كۇنى ۇيدە داستارحان جايىپ، قوناق شاقىرىپ مەرەكەنى تويلايمىز»، - دەدى ول.

سونىمەن قاتار، ول ۇلى دالاعا قونىس اۋدارعان وزگە ەتنوس وكىلدەرى قازاق حالقىنا ريزا ەكەنىن تىلگە تيەك ەتتى.

«ءبىزدىڭ بالالارىمىز قازاقستاندا ءبىلىم الىپ جاتىر. ەتنوس وكىلدەرى رەسپۋبليكانىڭ ءار سالاسىندا جۇمىس ىستەيد: دارىگەرلەر، زاڭگەرلەر، كاسىپكەرلەر جانە تاعى دا باسقا»، - دەدى ول.

ونىڭ ايتۋىنشا، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆ قۇرعان قازاقستان حالقى اسسامبلەياسى - بارلىق ەتنوستار وكىلدەرىن ءبىر شاڭىراق استىندا بىرىكتىرەتىن بىرەگەي ينستيتۋت.

«مەن كۇرد ەتنومادەني ورتالىعىنىڭ جەتەكشىسى، پروفەسسور، اكادەميك رەتىندە ءوز حالقىمنىڭ جانە وتباسىمنىڭ اتىنان ەلباسىعا جانە قازاقستان حالقىنا العىس بىلدىرگىم كەلەدى»، - دەدى ول.

سونداي-اق،ول قازاق ءتىلى كۇردتەر ءۇشىن وتە ماڭىزدى ءتىل ەكەنىن باسا ايتتى.

«كۇردتەردىڭ شامامەن 75% -ى قازاق ءتىلىن جاقسى مەڭگەرگەن. بيىل ءبىز كۇرد بالالارىنا لاتىن الىپبيىنە كوشۋ ءۇشىن لاتىن ءالىپبيىن شىعاردىق. ءبىزدىڭ بالالار قازاق ءتىلىن بالاباقشادان باستاپ وقيدى. قازاق ءتىلىن ءبىلۋ - بۇل ەڭ الدىمەن ءوزىن جانە قازاقستان حالقىن قۇرمەتتەۋ. ءبىز ءوزىمىز تۇراتىن مەملەكەتتىڭ تاريحىن، مادەنيەتىن جانە ءتىلىن ءبىلۋىمىز كەرەك. قازاق ءتىلىن ءبىلۋ وتە ماڭىزدى»، - دەپ تۇيىندەدى ول.

ايتا كەتەيىك، 2015 جىلدىڭ ءساۋىر ايىندا قحا 22-ءشى سەسسياسى مەن قحا 20 جىلدىعىن مەرەكەلەۋ كەزىندە قر تۇڭعىش پرەزيدەنتى – ەلباسى قازاقستاندا العىس كۇنىن اتاپ ءوتۋدى ۇسىندى. بۇل كۇن - بارلىق قازاقستاندىقتاردىڭ ءبىر-بىرىنە دەگەن ماحابباتى مەن دوستىعىنىڭ جارقىن بەلگىسى.

Abai.kz