بەيسەنبى, 19 قاراشا 2026
جاڭالىقتار 239 0 پىكىر 19 قاراشا, 2026 ساعات 16:35

ارمان قىرىقباەۆ اقش ەلشىسى دجۋلي ستاففتپەن كەزدەستى

سۋرەت: gov.kz سايتىنان الىندى.

قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ اقش-تىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى دجۋلي ستاففتپەن كەزدەستى.

تاراپتار قازاقستان مەن اقش-تىڭ مادەنيەت، ماسس-مەديا جانە مۋزەي ءىسى سالالارىنداعى ىنتىماقتاستىعىن كەڭەيتۋ مۇمكىندىكتەرىن تالقىلادى.

كەزدەسۋ بارىسىندا ارمان قىرىقباەۆ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن اقش پرەزيدەنتى دونالد ترامپ اراسىنداعى قارىم-قاتىناستىڭ جوعارى دەڭگەيدە ەكەنىن ەرەكشە اتاپ ءوتتى. مينيستر ەكى ەل باسشىلارىنىڭ كەڭەيتىلگەن ستراتەگيالىق ارىپتەستىكتى نىعايتۋدا جانە ەكىجاقتى ىنتىماقتاستىقتى دامىتۋدا شەشۋشى ءرول اتقاراتىنىن ايتتى.

ءوز كەزەگىندە دجۋلي ستاففت قازاقستان پرەزيدەنتىنىڭ الداعى G20 سامميتىنە قاتىسۋىنا دايىندىق جۇمىستارى قارقىندى ءجۇرىپ جاتقانىن وڭ باعالادى. مەملەكەت باسشىسى 14-15 جەلتوقساندا ماياميدە وتەتىن سامميتكە اقش پرەزيدەنتى دونالد ترامپتىڭ شاقىرۋىمەن قاتىسادى. ەلشى الداعى ءسامميتتىڭ قازاقستان مەن اقش اراسىنداعى قارىم-قاتىناستى ودان ءارى تەرەڭدەتىپ، ءتۇرلى باعىتتاعى ىنتىماقتاستىقتى كەڭەيتۋ ءۇشىن ماڭىزدى ەكەنىن اتاپ ءوتتى.

ەلشىنىڭ ءوتىنىشى بويىنشا مينيستر قۇرىلتايدا قارالىپ جاتقان ونلاين-پلاتفورمالار مەن ماسس-مەديا سالاسىنداعى زاڭنامالىق تۇزەتۋلەر تۋرالى اقپارات بەردى. ۇسىنىلعان وزگەرىستەر ازاماتتاردىڭ قۇقىقتارىن قورعاۋعا، بالالاردىڭ ينتەرنەتتەگى قاۋىپسىزدىگىن قامتاماسىز ەتۋگە، قۇقىققا قايشى كونتەنتتىڭ تارالۋىنا توسقاۋىل قويۋعا جانە ونلاين-پلاتفورمالاردىڭ جاۋاپكەرشىلىگىن ارتتىرۋعا باعىتتالعان. وسى ورايدا قازاقستاننىڭ تسيفرلىق ورتانى رەتتەۋ جونىندەگى حالىقارالىق تاجىريبەنى، سونىڭ ىشىندە اقش تاجىريبەسىن زەردەلەۋگە مۇددەلى ەكەنى ايتىلدى.

تاراپتار مۋزەي سالاسىنداعى ىنتىماقتاستىقتى دامىتۋعا دا ەرەكشە نازار اۋداردى. ەلشى دجۋلي ستاففت ەكى ەل مۋزەيلەرى اراسىنداعى كاسىبي بايلانىستى نىعايتۋدىڭ ماڭىزىن اتاپ ءوتتى. سونداي-اق بىرلەسكەن باستامالاردى جۇزەگە اسىرۋعا، سونىڭ ىشىندە قازاقستان مۋزەيلەرىنىڭ جادىگەرلەرىن اقش-تا كورمەگە قويۋعا قولداۋ كورسەتۋگە دايىن ەكەنىن ءبىلدىردى.

ارمان قىرىقباەۆ امەريكالىق مۋزەيلەردىڭ تاجىريبەسىن زەردەلەۋگە، مۋزەي ىسىندەگى زاماناۋي تاسىلدەرمەن تانىسۋعا جانە جاڭا كاسىبي بايلانىستار ورناتۋعا مۇمكىندىك بەرەتىن باستاماسى ءۇشىن ەلشىگە العىس ايتتى.

كەزدەسۋ قورىتىندىسىندا تاراپتار مادەني-گۋمانيتارلىق بايلانىستاردى ودان ءارى نىعايتۋعا جانە بىرلەسكەن جوبالاردى جۇزەگە اسىرۋعا مۇددەلى ەكەنىن راستادى.

Abai.kz

0 پىكىر