سارسەنبى, 21 ءساۋىر 2021
الەۋمەت 6938 18 پىكىر 23 اقپان, 2021 ساعات 13:35

شىمكەنتتىك شەنەۋنىكتىڭ رەسەي ازاماتى ەكەنى دالەلدەندى

بۇعان دەيىن قوس ازاماتتىعى بار ازاماتتىڭ شىمكەنتتە شەنەۋنىك بولعانى حابارلانعان ەدى. شىمكەنت قالالىق دەنە شىنىقتىرۋ جانە سپورت باسقارماسىن باسقارعان ولەگ پوچيۆالوۆ قازاقستاننان بولەك رەسەي فەدەراتسياسىنىڭ دا ازاماتى بولعان. 

مۇنداي اقپارات الەۋمەتتىك جەلىدە وتكەن جىلدىڭ جەلتوقسان ايىندا پايدا بولعان. سول كەزدە ولەگ پوچيۆالوۆتىڭ رەسەي ازاماتى ەكەنى تۋرالى اقپارات تاراپ، ءتىپتى كەيبىر قۇجاتىنىڭ كوشىرمەسى جاريا ەتىلدى. وندا ولەگ  پوچيۆالوۆتىڭ تۇرعىلىقتى جەرى ماسكەۋ ەكەنى، ال «ازاماتتىق» باعانىندا «رەسەي فەدەراتسياسى» دەپ جازىلعانىن كورۋگە بولادى. الايدا سپورت باسقارماسىنىڭ وكىلى بۇل اقپاراتتى تەرىسكە شىعارعان.

ال بيىل اقپان ايىنىڭ باسىندا باق-تا قر مەملەكەتتىك قىزمەت ىستەرى جونىندەگى اگەنتتىگىنىڭ شىمكەنت قالاسى بويىنشا دەپارتامەنتىنىڭ باسشىسى ءارى ادەپ جونىندەگى كەڭەس توراعاسى ا.كومەكباەۆتىڭ قالا اكىمى م.ايتەنوۆكە جازعان حاتىنىڭ كوشىرمەسى جاريالاندى.

وندا و.پوچيۆالوۆتىڭ رەسەي فەدەراتسياسى ازاماتتى ەكەنى رەستالىپ، سوعان سايكەس ونىڭ 20.01.2021 جىلى شىمكەنت قالاسى پوليتسيا دەپارتامەنتىنە قازاقستان رەسپۋبليكاسى ازاماتتىعىنان ايىرۋ ءجايىتى تىركەلگەندىگى جازىلعان.

وسىدان كەيىن شىمكەنتتىك شەنەۋنىك وزىندە قوس ەلدىڭ ازاماتتىعى بار دەپ اقپارات تاراتقان پوليتسيانىڭ حابارلاماسى جالعان ەكەنىن مالىمدەدى. ءسويتىپ پوليتسيانىڭ ارەكەتىن زاڭسىز دەپ تانۋ ءۇشىن سوتقا تالاپ ارىز تۇسىرگەن.

ولەگ پوچيۆالوۆتىڭ ارىزى ءال-فارابي اۋداندىق سوتىندا قارالدى. اتالعان سوتتىڭ سۋدياسى نۇرعالي يسمايلوۆ باسقارما باسشىسىنىڭ رەسەي فەدەراتسياسىنىڭ ازاماتى ەكەنى تولىق دالەلىن تاپقانىن ايتىپ، ونىڭ تالاپ ارىزىن قاناعاتتاندىرۋسىز قالدىردى.

«پوچيۆالوۆقا قاتىستى ازاماتتىق ءىستى قاراۋ بارىسىندا ونىڭ رەسەي فەدەراتسياسىنىڭ ازاماتتىعىن العانى تولىق ءوز دالەلىن تاپتى. بۇل ۇقك-ءنىڭ شىمكەنت قالاسى بويىنشا دەپارتامەنتىنىڭ جانە دە رەسەي فەدەراتسياسىنىڭ ىشكى ىستەر مينيسترلىگىنىڭ جاۋاپتارىمەن دالەلدەندى. سول سەبەپتى قالالىق پوليتسيا دەپارتامەنتىنىڭ ارەكەتى زاڭدى دەپ سوتپەن شەشىم قابىلداندى. سوت شەشىمى ءبىر ايدان سوڭ عانا كۇشىنە ەنەدى»،- دەدى سۋديا نۇرعالي يسمايلوۆ.

سۋديا ءتىپتى شەنەۋنىك پوچيۆالوۆتىڭ سوتقا دالەل رەتىندە قانداي دا ءبىر قۇجات ۇسىنباعانىن جەتكىزدى.

«2005 جىلى پوچيۆالوۆ رەسەي فەدەراتسياسىنىڭ ازاماتتىعىن العان، 2007 جىلى پاسپورتىن العان. سول قۇجاتتاردىڭ بارلىعى رەسەي فەدەراتسياسى ىشكى ىستەر مينيسترلىگىنىڭ حاتتارىمەن ءوز دالەلىن تاپتى. ەكى ازاماتتىقتىڭ انىقتالۋىنا بايلانىستى پوچيۆالوۆقا قاتىستى قر-نىڭ ازاماتتىعىنان ايىرۋ جونىندە ماسەلە قويىلعان»،- دەدى سۋديا.

ايتا كەتەيىك، مەملەكەت باسشىسى قاسىم-جومارت توقاەۆ 2020 جىلى قىركۇيەك ايىنداعى قازاقستان حالقىنا جولداۋىندا «ەگەر مەملەكەتتىك قىزمەتشى نەمەسە كۆازيمەملەكەتتىك مەكەمەنىڭ باسشىسى قوس ازاماتتىق السا، ولار قىزمەتىنەن بوساتىلادى»، دەپ مالىمدەگەن.

ال قازاقستان رەسپۋبليكاسى ىشكى ىستەر ءمينيسترىنىڭ ورىنباسارى الەكسەي كالايچيدي بۇقارالىق اقپارات قۇرالدارىندا تەك 2020 جىلدىڭ 11 ايىندا مەملەكەتتىك قىزمەتشىلەرگە قاتىستى ەكى ازاماتتىقتىڭ 431 فاكتىسى انىقتالعانىن ايتقان.

Abai.kz

18 پىكىر