بۇگىن ءماجىلىس توراعاسى نۇرلان نىعماتۋلين بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى لي چجانشۋمەن بەينەكونفەرەنتسيا بايلانىسى ارقىلى كەزدەسۋ وتكىزدى.  

پالاتا سپيكەرى قىتاي حالىق رەسپۋبليكاسى قازاقستاننىڭ ماڭىزدى ستراتەگيالىق ارىپتەسى، دوس جانە تاتۋ كورشىسى ەكەنىن اتاپ ءوتىپ، ەكى ەل اراسىندا ديپلوماتيالىق قاتىناستار ورناعان 29 جىل ىشىندە سەنىمدى ساياسي ديالوگ، تەرەڭ ەكونوميكالىق بايلانىستار ورناپ، جان-جاقتى ىنتىماقتاستىقتىڭ بەلسەندى دامىعانىنا نازار اۋداردى.

كەزدەسۋ بارىسىندا نۇرلان نىعماتۋلين وسىنىڭ بارلىعى قوس مەملەكەت كوشباسشىلارىنىڭ دوستىعى مەن سەنىمدى قارىم-قاتىناسىنىڭ ارقاسىندا قول جەتكىزگەن جەتىستىكتەر ەكەنىنە توقتالىپ، ودان ءارى قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ مەملەكەتارالىق قاتىناستاردىڭ ستراتەگيالىق ارىپتەستىك دەڭگەيىنە جەتكىزۋ جولىنداعى ماڭىزدى ءرولىن اتاپ ءوتتى. سونداي-اق، ءماجىلىس توراعاسى قازاقستاننىڭ قازىرگى پرەزيدەنتى قاسىم-جومارت توقاەۆتىڭ قىتايمەن ىنتىماقتاستىققا ۇلكەن ءمان بەرەتىنىن ايتتى.

ءوز كەزەگىندە، مارتەبەلى مەيمان قازاقستاننىڭ جاقىن دا شىنايى دوس مەملەكەت ەكەنىن، سونداي-اق، ەلدەر اراسىنداعى جوعارى ديپلوماتيالىق جانە ىنتىماقتاستىق بايلانىسقا كوڭىل ءبولدى. سونىمەن قاتار، لي چجانشۋ وتكەن جىل ەلدەر ءۇشىن كۇردەلى كەزەڭ بولعانىن اتاپ ءوتىپ، ىندەت ۋاقىتىندا قىتاي مەن قازاقستان اراسىندا كوروناۆيرۋسقا قارسى ءوزارا قولداۋ بەلسەندى جۇرگىزىلگەنىن ايتتى.

بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى قازاقستاننىڭ گۇلدەنۋىنە نيەتتەس بولا وتىرىپ، مەملەكەت باسشىلارىنىڭ ەلدى دامىتۋ جولىنداعى ايرىقشا ەڭبەكتەرىنە توقتالدى. سونداي-اق، الدا قويعان مىندەتتەر مەن جوسپارلاردىڭ ءساتتى ورىندالىپ، قازاقستاننىڭ تابىستى 30 مەملەكەت قاتارىنا قوسىلاتىنا سەنىم ءبىلدىردى.

كەزدەسۋ بارىسىندا ءماجىلىس توراعاسى كارانتيندىك شارالارعا قاتىستى قازاقستان-قىتاي شەكاراسىنداعى وتكىزۋ بەكەتتەر ارقىلى جۇكتەردى تاسىمالداۋدا قيىندىق ورىن العانىنا بايلانىستى اۆتوكولىك جانە تەمىرجول قاتىناستارىنىڭ ۇزدىكسىز جۇمىسىن قالپىنا كەلتىرۋ ءۇشىن قىتايدىڭ وتكىزۋ بەكەتتەرىندە، "ەكسپرەسس-دالىزدەر", "جاسىل دالىزدەر" جانە جۇك تاسىمالىن ۇلعايتۋ ءۇشىن "تەمىر كەرۋەن" قۇرۋ جونىندەگى باستامانى ىسكە اسىرۋدى جالعاستىرۋعا ەلىمىزدىڭ دايىن ەكەنىن جەتكىزدى.

نۇرلان نىعماتۋليننىڭ پىكىرىنشە، بۇل پاندەميا جاعدايىندا ەۋرازيا قۇرلىعىنداعى "قىتاي-ەۋروپا" باعىتى بويىنشا تەمىرجول قاتىناسىن ودان ءارى دامىتۋ جولىمەن وڭىرلىك ەكونوميكالىق ينتەگراتسيا شەڭبەرىندە قازاقستان-قىتاي ىنتىماقتاستىعىن نىعايتۋعا مۇمكىندىك بەرەدى.

سونىمەن قاتار، ءماجىلىس توراعاسى كەزدەسۋدىڭ قىتاي كوممۋنيستىك پارتياسىنىڭ 100 جىلدىعى قارساڭىنا سايكەس كەلگەنىن العا تارتىپ،  دوستاس  قىتاي ەلىنە وركەنيەت پەن باق-بەرەكە تىلەدى.

Abai.kz