شىعىس قازاقستان وبلىسىندا ءماسليحات دەپۋتاتى قايرات داكەروۆ دەيتىن ادام «نۇرسۇلتان نازارباەۆتىڭ قۇرمەتىنە اۋدان اتىن بەرۋ كەرەك» دەپ ۇسىنىس جاساپتى.

شقو ءماسليحاتىنىڭ ۇسىنىسى الەۋمەتتىك جەلىدە قىزۋ تالقى بولۋدا. سونىمەن، دەپۋتات داكەروۆ تۇتاس اۋدان اتىن وزگەرتۋ كەرەك دەگەن پىكىردە.

«ن.ءا. نازارباەۆتىڭ ەڭبەگىن كەلەشەك ۇرپاققا ماڭگىلىك ەتۋ ماقساتىندا 1997 جىلعا دەيىن شەكارادا جاتقان بۇرىنعى تارباعاتاي اۋدانىنىڭ ورتالىعى بولعان اقجار اۋىلىنا اۋدان ورتالىعى ستاتۋسىن قايتارىپ، قازىرگى تارباعاتاي اۋدانىنان اقجار ايماعىن ءبولىپ، بۇرىنعىشا ەكى اۋدان رەتىندە قالپىنا كەلتىرىپ، ەلباسىمىزدىڭ اتىنا بەرسە دەگەن ۇسىنىس. تارباعاتاي اۋدانىنىڭ حالقى ەلباسىمىزدىڭ ەڭبەگى زور ەكەنىن باعالايدى»، - دەپتى داكەروۆ.

«الايدا مۇنداي ۇسىنىستى كوپشىلىك جەكە باسقا تابىنۋشىلىق دەپ اتادى. كەي ساراپشىلار «ۇسىنىس ارقىلى اۋداندى ءبولۋ ماسەلەسىنە نازار اۋدارتۋ» رەتىندە باعالاپ وتىر»، - دەپ جازادى ازاتتىق سايتى.

ەستەرىڭىزدە بولسا وسىدان ءبىر اپتا بۇرىن، 17 ناۋرىزدا سپورتشى، «الەم بارىسى» اتانعان پالۋان ايبەك نۇعىماروۆ سەمەي قالاسىندا نازارباەۆ داڭعىلى پايدا بولىپ، «اباي ارەنانى» سپورت كەشەنىن «ەلباسى ارەنا» دەپ وزگەرتۋ كەرەكتىگى جايلى ۇسىنىس جاساعان ەدى.

ءوز كەزەگىندە پالۋان-دەپۋتاتتىڭ دا ۇسىنىسى قوعامدى قىزۋ تالقى بولىپ، جۇرتتىڭ نارازىلىعىن تۋدىرعان. كەيىن، ەكس-پرەزيدەنت، قاۋىپسىزدىك كەڭەسىنىڭ توراعاسى نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي «تۆيتتەردە» جازبا جاريالاپ، «ەلباسى مۇنداي ۇسىنىستارعا قارسى» ەكەندىگىن جەتكىزگەن.

Abai.kz