ءدامى جوق تەاترلار كوبەيدى

- ءسىز حالىققا ساتيرا ءارتيسى رەتىندە تانىلدىڭىز. بىراق ماماندىعىڭىز ديري­جەر كورىنەدى. بۇل راس پا؟

- بالا كەزىمنەن كوركەمونەرپازدار ۇيىرمەسىنە قاتىسىپ، ءارتۇرلى مادەني شارالاردىڭ باسى-قاسىندا جۇرەتىنمىن. سودان ارمان قۋىپ، الماتىعا كەلدىم. 1991 جىلدىڭ كۇزىندە قاسكەلەڭ مادەني اعارتۋ ۋچيليششەسىنە ءتۇستىم. «ءاۋ دەمەيتىن قازاق جوق» دەمەكشى، دومبىرا تارتۋدىڭ ىرگەتاسى اۋىلدا قالانعاندىقتان، مۇندا باس دومبىرا اسپابى بويىنشا كور­كەمونەر­پازدار وركەسترىن ديريجەرلەۋ ماماندى­عىن وقىدىم. ۋچيليششە قابىر­عا­سىندا وقىپ ءجۇرىپ، قاپان ساتىبال­دين­نىڭ «ناي­زاعاي» اتتى كومەديالىق قويى­لىمىنا قاتىسىپ، باستى رولدەردىڭ ءبىرىن سومدادىم. ءساتتى شىققان قويىلىم بولدى. وقۋدى ويداعىداي اياقتاعان سوڭ، كيەلى ساحنا ونەرىنە دەگەن قىزىعۋ­شى­لىعىم ارتىپ، قاسيەتتى شاڭىراق - ت.ءجۇر­گەنوۆ اتىنداعى قازاق ۇلتتىق اكادە­مياسىنا بارۋعا بەل بۋدىم. 1993 جىلى اكادەميانىڭ تەاتر جانە كينو فاكۋلتەتىنە - اسقار توق­پانوۆتىڭ سىنىبىنا ءتۇستىم.
اكادەميادا وقىپ ءجۇرىپ، «كۇلكى كەرۋەنى» تەاتر ۇجىمىنا جۇمىسقا كىردىم. ول كەزدە ءازىل-سىقاق شاڭىراعىن گۇلجان قالىباەۆا اپايىمىز باسقاراتىن. كەيىن «تاماشاعا» اۋىسىپ، بىرنەشە جىل قىزمەت ەتكەن سوڭ، قايتادان «كۇلكى كەرۋەنىنە» باردىم. بىراق وندا دا ۇزاق تۇراقتاماي، تەاتردان ءبولىنىپ شىقتىم. قازىر جۇرت وزدىگىمىزدەن كەتتىك دەگەننەن گورى «كەلىسپەي قالىپتى»، «بولىسە الماي قالىپتى» دەگەن اڭگىمەگە قاتتى سەنەدى. بىراق قۇداي ساقتاسىن، گۇلجان اپايى­مىز­بەن ارادا ەش رەنىش بولعان جوق. كە­رىسىنشە، ول كىسىنىڭ رۇقساتىن الىپ، «كۇل­­كىستان» ءازىل-سىقاق وتاۋىن قۇر­دىق.
- بۇل قاي جىل ەدى؟ «كۇلكىستان» وتاۋى­نىڭ قۇرامىندا قانشا ارتيست بار؟
- ءبىز 2008 جىلى اشىلدىق. سىقاق وتاۋى دارحان ءپىرنازاروۆ، دىنمۇحاممەد ءابجاپپاروۆ، جالەل رامانقۇلوۆ، كەن­جەباي ءجۇسىپ سىندى ونەر يەلەرىنەن تۇ­رادى. كوبىنە كەنجەباي ءجۇسىپ، سونداي-اق قىرعىز ەلىنىڭ ازاماتى كۇماندۇر ابىلوۆ ينتەرمەديالارىن پايدالا­نامىز.
- كوپتەگەن ساتيريكتەر «جەڭىل-جەلپى ءازىل­دەر كوبەيىپ كەتتى» دەيدى. ءسىزدىڭ ايتار ءۋاجىڭىز قانداي؟
- راس، اعالارىمىز جاقسى دۇنيەلەر جازىپ جاتىر. بىراق ولار ۇزاق اڭگىمە ەتىپ جازعاندىقتان، ساحنا تالاپتارىنا سىيا بەرمەيدى. ساحنا ماتىنىنە قويى­لاتىن تالاپ ءبىر بولەك، ادەبي سىقاققا قويىلاتىن تالاپ مۇلدە باسقا اڭگىمە. شىن ايتۋ كەرەك، بىزدە ءتىلى وتكىر، مىقتى ساتيريكتەرىمىز كوپ. كوبىنە ولار ءازىل-سىقاق تەاترلارىنا بەرگەن دۇنيەلەرىن مۇرتى بۇزىلماعان قالپىندا كورگىسى كەلەدى. الايدا ينتەرمەديا 7 مينۋتتان اسپايتىندىقتان، بۇل تالاپ ورىندالماي جاتادى. ارتيستەر حالىقتى جالىقتىرىپ الماۋدىڭ امالىن جاسايدى. سوندىقتان اۆتورلاردىڭ جازعانىن قىسقارتىپ، ءسال وزگەرتىپ تە جىبەرەتىن تۇستار از ەمەس. مىنە، سول سەبەپتى دە ءازىل-سىقاق ارتيس­تەرى مەن ساتيريكتەر اراسىندا ءتۇسىنىس­پەۋشىلىك ورنايدى.
ساحنا زاڭدىلىقتارىن بىلگەندىكتەن ءوزى­مىز دە جازامىز. جازعاندا دا، جاي جوق­تان بار دۇنيە شىعارۋ ماقساتىندا ەمەس، قوعامداعى كەمشىلىكتەردى كۇلكىنىڭ سويىلىمەن سوعۋعا، سىن تەزىنە سالۋعا بارىمىزدى سالامىز.
- تەاترلار كوپ بولعانىمەن، باسەكە ارتقانىن بايقامايمىز. نەگە؟
- قازىر ءازىل-سىقاق تەاترلارى كوپ. سونىمەن قاتار ءدامى جوق تەاترلار دا كوبەيگەن. ولار ءۇش ادامنىڭ باسىن قۇراپ، «پالەن تەاتر»، «تۇگەن تەاتر» دەپ شە­تىنەن اشىلىپ جاتىر. تەاتردىڭ ۇلكەن ۇجىمى، ءوز عيماراتى بولۋى كەرەك. ال ءۇش ادامنىڭ باسى قۇرالعان جەردە قانداي تەاتر بولۋى مۇمكىن. ءبىزدى دە جۇرت «كۇلكىستان» ءازىل-سىقاق تەاترى» دەپ شاتاستىرادى. بىراق ءبىز تەاتر ەمەس­پىز، ءازىل-سىقاق وتاۋىمىز. ال تەاتر­لارداعى ءبىر سارىندىلىقتىڭ سەبەبى - باسەكەنىڭ جوقتىعىندا. باسەكە جوق جەردە ىزدەنىس تە بولمايدى. ماسەلە، دراماتۋرگيانىڭ جوقتىعىندا ەمەس، ىزدەنىستىڭ جوقتىعىندا.
- تىم-تىرىس جاتقانىڭىزعا بايلا­نىس­تى، جۇرت سىزدەردى «جابىلىپ قالدى» دەپ ءجۇر...
- راس، سوڭعى جىلدارى قاراجات جا­عى­نان ءبىراز قىسىلدىق. سوعان باي­لانىستى ەل الدىنا شىعا الماي كەتتىك. بىراق بۇل جابىلدىق دەگەن اڭگىمە ەمەس. اللا بۇيىرتسا، جاقىندا كورەرمەن الدىنا جاڭا جوبامەن شىقپاقشىمىز. سونىمەن بىرگە كومەديا جانرىندا فيلم تۇسىرسەك دەگەن جوسپارىمىز بار.
- اڭگىمەڭىزگە راقمەت.

سۇحباتتاسقان
سابينا زاكىرجانقىزى