پرەزيدەنت قاسىم-جومارت كەمەلۇلى توقاەۆ 2021 جىلدىڭ 5 قاڭتارى كۇنى ەگەمەن قازاقستانعا "تاۋەلسىزدىك بارىنەن قىمبات" اتتى ماقالاسىن جاريالادى. ماقالا دەر كەزىندە جازىلعان ءارى وزەكتى. سەبەبى بيىل قازاقستاننىڭ تاۋەلسىزدىگىن قالپىنا كەلتىرگەنىنە تۇپ-تۋرا 30 جىل. ال "جەلتوقسان وقيعاسىنا" 35 جىل. 

پرەزيدەنت ءوز ماقالاسىندا تاۋەلسىزدىكتىڭ قىزىل قان، قارا تەر، اتا-بابانىڭ جانقيارلىعى ارقىلى كەلگەنىن جەتكىزىپ، جاس ۇرپاقتى ەڭ قادىرلى بايلىعىمىز ازاتتىقتى ايالاپ وتۋگە شاقىرادى. ءۇش ون جىلدىقتا اتقارىلعان جۇمىستار مەن باعىندىرعان بەلەستەرگە قاتىستى دا ويىن ايتادى. جەمىسىن بەرگەن ءتۇرلى مەملەكەتتىك باعدارلامالار جايلى دا تىلگە تيەك ەتەدى.

پرەزيدەنت ماقالاسىندا تاريحي وقيعالارعا قاتىستى فيلمدەردى ءتۇسىرۋدىڭ اسا ماڭىزدىلىعى اتالىپ وتىلەدى. «الماس قىلىش»، «جاۋ جۇرەك مىڭ بالا»، «توميريس»، «كەيكى باتىر»، «تار زامان» سياقتى تاريحي فيلمدەر تۇسىرىلگەنىن، دەي-تۇرا ونىڭ ازدىق ەتەتىنىن جەتكىزە جازادى. فيلم ءتۇسىرۋ ءۇشىن قارجىمەن قاتار ۇلكەن تالانت كەرەك.

راسىمەن سولاي. قازىرگى جاستى تاريحپەن سۋسىنداتۋدىڭ باستى جولى فيلمدەر ءتۇسىرۋ، سەريالداردى ۇسىنۋ. مىسالى قازىرگى ۇرپاق باتىستىڭ الپاۋىت كينويندۋستريالارى ۇسىنعان "سپارتاك", "ۆيكينگتەر", "ريم", "سوڭعى پاتشا" سەريالدارى ارقىلى ءبىر حالىقتىڭ تاريحىن، تاريحي تۇلعالاردىڭ ءجۇرىپ وتكەن جولىن جاتتاپ الدى. فيلم ءدال وسى ماقساتتا كەرەك-اق. قولىنا كىتاپ ۇستاتىپ، "وقى" دەيتىن ءداۋىر ءوتىپ بارادى. وكىنىشكە وراي جاستار كىتاپحانا جاعالاپ، كىتاپ ءيىسىن سەزىپ، قاعاز كەمىرەر زاماننان گادجەتتەر داۋىرىنە قادام باستى. ءبىر كىتاپتىڭ ايتارىن تولىق بەرمەسە دە، نوبايىن كورسەتەتىن جارتى ساعاتتىق دەرەكتى فيلمدەر مەن كوركەم كينولار جەتەرلىك. ءبىر اپتا وقيتىن كىتاپتىڭ ورنىنا جاستار جارتى ساعات سوعان ۋاقىتىن جۇمسايدى. اششى دا بولسا بۇل شىندىق. پرەزيدەنتىمىز اتالمىش تەندەنتسيانى تەرەڭ تۇسىنە وتىرىپ، تاريحي فيلمدەردى ارتتىرۋ كەرەكتىگىن ۇسىندى. بارلىق ارەكەت جاس ۇرپاق ءۇشىن، دەمەك بۇل شارا دا جاستار ءوز تاريحىن.، باباسىنىڭ ءجۇرىپ وتكەن جولىن ءبىلسىن دەگەن نيەتپەن تۋىنداعانى انىق.

پرەزيدەنت ماقالاسىندا "التىن وردا" جايلى تاريحي سەريال تۇسىرۋگە شاقىردى. زامانىندا جارتى الەمدى اشسا الاقانىندا، جۇمسا جۇدىرىعىندا ۇستاعان ۇلى يمپەريانىڭ ۇرپاعى ەكەنىمىزدى ءبىلدىرۋ، ەڭ الدىمەن جاستارعا ۇعىندىرۋ كەرەك. ونىڭ ءبىر جولى - ۇلى ەپوحا جايلى تاماشا تۋىندى جاساۋ. ەسەنبەرليننىڭ "التىن ورداسىن" وقيتىن ۇرپاق ازايسا، وندا ونى تەلەديداردان كورسىن. ءتۇسىنسىن ءھام ۇعىنسىن.

پرەزيدەنتتىڭ ۇسىنىسى تەك ۇسىنىس كۇيىندە قالىپ قويمادى. ۇسىنىس ىسكە اينالۋدا. "التىن وردا" جايلى ۇلكەن تاريحي كينوجوبا باستالۋدا.

"بۇگىن تاڭەرتەڭ ەكى ۇزدىك گولليۆۋدتىق كومپانيامەن بەينەبايلانىس ارقىلى كونفەرەنتسيا وتكىزدىك، جاقىن ارادا ازيالىق ارىپتەستەرىمىزبەن كەزدەسپەكشىمىز. بۇل جەردە ءوندىرىستىڭ قارجىلىق مودەلىن پىسىقتاۋعا باسا نازار اۋدارعان ءجون. كەيىن بىزدە ريبەيت تەتىگى قوسىلۋى مۇمكىن، ياعني، قازاقستان اۋماعىندا جۇمسالعان قاراجاتتىڭ ءبىر بولىگىن شەتەلدىك كومپانيالارعا وتەۋ. باسقا جاعدايدا  قالالىق جانە وڭىرلىك كينوكوميسسيالار تاراپىنان بارىنشا قولداۋ كورسەتىلەتىن بولادى، ولاردىڭ قۇزىرەتىنە بيلىك ورگاندارىمەن ءوزارا ءىس-قيمىل جاساۋ، اكىمشىلىك رەسۋرستارعا قول جەتكىزۋ، ءتۇسىرۋ جابدىقتارىمەن جانە كولىكپەن قامتاماسىز ەتۋ، تۇراتىن ورىندى دايىنداۋ، اكتەرلەردى، لوكاتسيالاردى، دەرەكتەمەلەردى ىرىكتەۋ، جالپى، ىڭعايلى كينووندىرىسكە كومەكتەسەتىن بارلىق جاعدايدى جاساۋ كىرەدى", - دەدى ۇلتتىق كينونى قولداۋ مەملەكەتتىك ورتالىعى توراعاسى ەسەتجان قوسىباەۆ.

دەمەك جاقىن ارالىقتا ءبىز التىن وردان جايلى تاماشا تاريحي تۋىندىنى تاماشالايمىز دەگەن ءسوز.

Abai.kz