بۇگىن جەر كوميسسياسىنىڭ ەكىنشى وتىرىسى ءوتىپ جاتىر. كوميسسيا جۇمىسىنا قر ۇكىمەت باسشىسىنىڭ ورىنباسارى ەرالى توعجانوۆ توراعالىق ەتۋدە.

ول بۇگىنگى وتىرىستا: «جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلداندى»، - دەپ مالىمدەپ، ارنايى زاڭ جوباسىنىڭ ءماجىلىس قاراۋىنا وتكەنىن ايتتى.

«25 اقپاندا ۇلتتىق كەڭەستىڭ بەسىنشى وتىرىسىندا پرەزيدەنتى قاسىم-جومارت توقاەۆتىڭ اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسى بار عىلىمي ورتالىقتارعا، سونداي-اق قانداستارعا بەرۋگە تولىق تىيىم سالۋ تۋرالى ساياسي شەشىمى ارنايى زاڭ جوباسى رەتىندە پارلامەنتتىڭ ء(ماجىلىستىڭ) قاراۋىنا ەنگىزىلدى. زاڭ جوباسىنىڭ ءبىرىنشى وقىلىمى 7 ساۋىردە وتەدى»، - دەدى توعجانوۆ.

ۆيتسە-پرەمەردىڭ ايتۋىنشا، ەل ىشىندە، اسىرەسە الەۋمەتتىك جەلىلەردە جەردىڭ شەتەلدىكتەرگە بەرىلۋى ءھام بەرىلمەۋى ماسەلەسىنە قاتىستى تۇسىنىسپەۋشىلىكتەر مەن جالعان اقپارات تاراتۋشىلار ءالى دە بار.

«جالعان قاۋەسەتتى ادەيى تاراتۋشىلار دا جوق ەمەس ەكەنىن ايتۋىمىز كەرەك. سوندىقتان، تاعى ءبىر ناقتىلاپ ايتامىن: جەردىڭ شەتەلدىكتەرگە بەرىلمەيتىنى جونىندە ناقتى شەشىم قابىلداندى. مەملەكەت باسشىسى قاسىم-جومارت كەمەلۇلى قوعام تاراپىنان كوتەرىلىپ وتىرعان نەگىزگى ماسەلەلەر بويىنشا ءتۇيىندى شەشىمىن ايتىپ، نۇكتەسىن قويدى. قازىرگى تاڭدا كوميسسيا الدىندا اۋىل شارۋاشىلىعى سالاسىنداعى جەر قاتىناستارىن دامىتۋ ماسەلەسى بويىنشا ۇسىنىمدار ازىرلەۋ مىندەتى تۇر. ەندى وسى ماسەلەلەردى جان-جاقتى اقىلداسقانىمىز دۇرىس»، - دەدى ول.

ايتپاقشى، جەر كوميسسياسىنىڭ وتكەن اپتادا وتكەن العاشقى وتىرىسىندا كوميسسيا مۇشەلەرى تاراپىنان ۇزىن-سانى 55 ۇسىنىس ايتىلىپتى.

«جەر كوميسسياسىنىڭ العاشقى وتىرىسىندا 55 ۇسىنىس ايتىلدى. ونىڭ ىشىندە 15-ءى - قۇقىقتىق سيپاتتا، 29-ى - ەكونوميكالىق سيپاتتا، 11-ءى ۇيىمداستىرۋعا قاتىستى سۇراقتار بولدى. بارلىق ۇسىنىس جۇمىس توبىندا كوميسسيا مۇشەلەرىنىڭ، جاۋاپتى مەملەكەتتىك ورگانداردىڭ، سالا ماماندارىنىڭ قاتىسۋىمەن جان-جاقتى قارالدى. بىرقاتار سۇراقتار بويىنشا ناقتى شەشىمدەر جوباسى ازىرلەندى. بۇگىن جۇرگىزىلگەن جۇمىستىڭ قورىتىندىسىن تالقىلايمىز»، - دەدى توعجانوۆ.

جەر رەسۋرستارىن باسقارۋ اگەنتتىگى قۇرىلادى

بۇل تۋرالى جەر كوميسسياسىنىڭ ەكونوميكالىق جۇمىس توبىنىڭ جەتەكشىسى اقىلبەك كۇرىشباەۆ ايتتى.

«ەكونوميكالىق جۇمىس توبىنىڭ وتىرىسىندا 6 ماسەلە قارالدى. وتىرىسقا جۇمىس توبىنىڭ 33 مۇشەسىنىڭ 30-ى قاتىستى. قازىرگى ۋاقىتتا ەڭ وزەكتى ماسەلەنىڭ ءبىرى – جەر رەسۋرستارىن باقىلاۋ بويىنشا بىرىڭعاي مەملەكەتتىك جۇيەنى قۇرۋ. قازىرگى ۋاقىتتا قر اۋىل شارۋاشىلىعى مينيسترلىگىنىڭ جەر رەسۋرستارىن باسقاراتىن كوميتەتىندە تەك ورتالىق اپپارات قالعان. ول جەردە 38 ادام جۇمىس ىستەيدى. بارلىق ايماقتىق جەر ينسپەكتسيالارى 2014 جىلى اكىمدىكتەردىڭ قۇزىرىنا بەرىلگەن. ياعني، اكىم ءوزى جەر بەرەدى، جەردى ءوزى باقىلايدى. وسىعان بايلانىستى ءبىرىنشى قاراعان ماسەلەمىز - اكىمدىكتەردەن جەردىڭ پايدالانىلۋى مەن قورعالۋىن مەملەكەتتىك باقىلاۋ جانە «ازاماتتارعا ارنالعان ۇكىمەت» مەملەكەتتىك كورپوراتسياسىنا مەملەكەتتىك جەر كاداسترىن جۇرگىزۋ فۋنكتسيالارىن بەرە وتىرىپ، جەر رەسۋرستارىن باسقارۋ اگەنتتىگىن قۇرۋ»، - دەدى اقىلبەك كۇرىشباەۆ.

ونىڭ ايتۋىنشا، بۇل باستامانى جۇمىس توبىنا قاتىسقان 30 ادامنىڭ 27-ءسى قولداعان. 3 ادام قارسى بولعان.

ءارى قاراي:

«ەلىمىزدە ا/ش جەرلەرىنىڭ قۇنارىن باقىلايتىن زەرتحانالىق بازانى دامىتۋ كەرەك. «ازاماتتارعا ارنالعان ۇكىمەت» مك توپىراقتىق-گەوبوتانيكالىق زەرتحانالار جەلىسىن، سونداي-اق، اشم-دان «اگروحيميا قىزمەتى رەسپۋبليكالىق عىلىمي-ادىستەمە ورتالىعى» مەكەمەسىن جەر رەسۋرستارى سالاسىنداعى ۋاكىلەتتى ورگانعا بەرۋ كەرەك. قازىرگى ۋاقىتتا كوميتەتتىڭ وزىنە باعىنىشتى ەشقانداي زەرتحاناسى جوق. سوندىقتان ەكى مەكەمەدەگى زەرتحانالاردى تىكەلەي جەر رەسۋرستارى كوميتەتىنىڭ نەمەسە جاڭادان قۇرىلاتىن جەر رەسۋرستارى اگەنتتىگىنىڭ قۇزىرىنا بەرۋ تۋرالى ۇسىنىس ايتىپ وتىرمىز»، - دەدى كۇرىشباەۆ.

بۇل ۇسىنىستى جۇمىس توبىنىڭ 30 مۇشەسىنىڭ 25-ءى قولداپ، 5-ەۋى قارسى بولعان.

جالعا بەرىلەتىن جەر ۋچاسكەلەرىنىڭ شەكتى ولشەمى بەكىتىلەدى

اقىلبەك كۇرىشباەۆ جەتەكشىلىك ەتەتىن جۇمىس توبىنىڭ ازىرلەگەن تاعى ءبىر ۇسىنىسى قازاقستان ازاماتتارىنا جالعا بەرىلەتىن جەر ۋچاسكەلەرىنىڭ شەكتىك ولشەمىن بەكىتۋ بولدى.

«جۇمىس توبىمىزدىڭ وتىرىسىندا قر ازاماتتارىنا جالعا بەرىلەتىن ا/ش ماقساتىنداعى جەر ۋچاسكەلەرىنىڭ شەكتى ولشەمىن بەكىتۋ تۋرالى قر ۇكىمەتىنىڭ قاۋلىسىن قابىلداۋ ماسەلەسى قارالدى. بۇل – وتە وزەكتى ماسەلە. بۇل ۇسىنىستى جۇمىس توبىنىڭ بارلىق مۇشەسى قولدادى»، - دەدى كۇرىشباەۆ.

ونىڭ ايتۋىنشا، تاعى ءبىر ماسەلە – سىبايلاس جەمقورلىق تاۋەكەلدەرىن بولعىزباس ءۇشىن ساۋدا-ساتتىقسىز جەر بەرۋ كەزىندە ينۆەستيتسيالىق جوبانى ايقىنداۋ ءتارتىبىن بەلگىلەۋ كەرەك.

«ءبىزدىڭ جۇمىس توبىندا ا/ش ماقساتىنداعى جەرلەردى تەك قازاقستان ازاماتتارىنا بەرۋ ماسەلەسى قارالدى. بۇل ماسەلە كۇن تارتىبىنەن الىنىپ تاستالدى، سەبەبى ول بويىنشا مەملەكەت باسشىسىنىڭ ناقتى ساياسي شەشىمى بار. بۇل پروبلەما زاڭ شەڭبەرىندە شەشىلەدى، ياعني ا/ش ماقساتىنداعى جەرلەر تەك قازاقستاندىق ازاماتتارعا بەرىلەدى»، - دەيدى اقىلبەك كۇرىشباەۆ.

ونىڭ ايتۋىنشا، ا/ش جەرلەرىن پايدالانباعانى ءۇشىن سالىقتى كوتەرۋ ماسەلەسى دە كۇن تارتىبىنەن الىنىپ تاستالدى.

«سەبەبى بۇل ماسەلە بويىنشا 2020 جىلعى 10 جەلتوقساندا سالىق مولشەرلەمەسىن جيىرما ەسەلەنگەن مولشەردە كوتەرۋدى كوزدەيتىن ءتيىستى زاڭ قابىلداندى.

سوندىقتان اتالعان ماسەلەنى مۇحتار تايجاننىڭ ۇسىنىسىمەن كوميسسيانىڭ قاراۋىنان الىپ تاستاپ، كەيىن بىرىڭعاي اگرارلىق سالىقتى قاراستىرۋ اياسىندا تالقىلاۋ ۇسىنىلدى.

بۇل ۇسىنىس جۇمىس توبى مۇشەلەرىنەن قولداۋ تاپتى. قازىرگى ۋاقىتتا جەر ماسەلەسىنە قاتىستى كوپ سۇراق كەلىپ جاتىر، ونى قاراۋعا ۇزاق ۋاقىت قاجەت. قازىرگى ۋاقىتتا ءبىرىنشى كەزەكتە جەر كودەكسىنىڭ تەك موراتوريگە قاتىستى ماسەلەلەرىن قاراساق دەگەن ۇسىنىسىم بار. ويتكەنى جاڭا زاڭ جوباسىن قابىلداۋعا ۇلگەرمەي قالۋىمىز مۇمكىن»، - دەيدى ول.

تاقىرىپقا تۇزدىق:

مينيستر جەر داۋىن «تەلەفون شالىپ» شەشپەك پە؟

جەر كوميسسياسىنا بۇل جولى كىمدەر كىردى؟ 

العاشقى وتىرىستا قانداي ۇسىنىستار ايتىلدى؟

جەردەن ايىرىلساق، مەملەكەتتەن دە ايىرىلامىز!

ەرالى توعجانوۆ ەسكەرۋى كەرەك!

Abai.kz